¹ Na buya bunyusi bwa langi lya ibule na bwa langi lya imanjano na bwa langi lya ligachichu, baitile bichwalaganywa bya byuluwa wa bwino abisa bululi bwaugila wihanaya ihaha, na ulongya bichwalaganywa bihaha gya Haluni, byokabiya nahi byelimlagile MLUME uli Musa. ² Nage guitile giya Naivela, gya bunyishi wa nolo,na bwa langilya ibule na bwa langi lya imanjano, na langi lya ligachichu, na alili asoga a ashingwe. ³ Nabo basulile chiya nolo na uba ihuhu na lubamba abisa, hanyuma bagedile nuuba bunyushi, bululi baooshe ubiluwa hanwechi na bubo bunyishi bya langi lya ibule, na bwa langi lya imanjano, na langi lya ligachichu na alili asoga, mgilo gwa mgichi gwa bwino. ⁴ Nabo balongiche na bihindi bya umaombe wa yulu ya naivela, bilungilwe hamwechi, bilungilwe hamwechi u masonga mabyo mabili. ⁵ Na gugo mchingo gwa mgilo gwa bwenge, gubele hegule hage bului bwa uhamba ihana yage; gubele gwa itu imwechi, na gwa gilo gumwechi na naivela gya nolo, na langi lya ibule, na gwa langi lya imanjano, nalangi lya ligachichu, naalili a asoga a ashingwe; byoka biya nahi biagilwe Musa na MLUME. ⁶ Nabo babadile maya mawe ma shohamu, mene mabiilwe yulu ya ugilucha nolo, mene mabadilwe nahi ugola wa mtumbi, wa machina ma babo baana ba Isilaeli. ⁷ Nage gubiile u biya buhindi bya umaombe bya naivela, bibe mabe mawe ma kengelecho gya baana ba Isikaeli, nahi bilagilwe Musa na MLUME. ⁸ Nage gulongiche guya mfugo gwa uyaahi, mgilo gwa mgichi gwa bwino, nahi gugo mgilo gwa naivela; gwa bunyushi bwa nolo, na bwa langi lya ibule na bwa langi lya imanjano, na bugachichu,na alili a asoga a ashingwe. ⁹ Ibele na masunga mana ma sawa; balongiche guya mfugo gwa uyaali uba gwa ubunga; ulaha wage ubele shubili, (20 cm) na mahida mage shubili, iyaka ibele iya ubungwa. ¹⁰ Nabo babiile milongo gina gya mawe mnda mwayo, mlongo gutangi gubele gwa akiki, na yakuti gyalangi lya imanjano, na bahalamani, bibele mlongo gutangi. ¹¹ Na mlongo gya bubili gubele zumalidi, na yakuti manjano, na almasi. ¹² Na mlongo gwa butatu gubele, hiakintho, na akili chigachichu, na amethisto. ¹³ Na mlongo gwa buna gubele zabalajadi, na shohamu, na yaspi; mamo mawe mabele mabiwe mnda bushamo bwa nolo, yaumwa yoo buchima hage hage. ¹⁴ Na mamo mawe mabele malamane na machina ma baana ba Isilaeli, umina mopi,ulamana na machina mabo; mlingilisho gwa usula wa mtumbi, gegese wa china lyage, wa giya milongo umi na gibili. ¹⁵ Nabo balongiche u guya mfugo gwa uyaali tumbela mlingilisho gwa migochi, mgilo gwa ushingwa wa nolo. ¹⁶ Bano balongilche bushaminyo bubili bya nolo, nabo bachibiile chiya pete chibili u masunga mabili ma guya mfugo. ¹⁷ Nabo babiile tuya tumbwela tubili twa tushingwe u chiya pete chibili chine chibele u masunga mabili ma guya mfugo. ¹⁸ Na masunga maya mange mabili, na tuya tumbwela twa tushingwe, batubiile u buya bushamino bubili, na ubibiya ubiya bihindi bibili bya umaombe bya naivela, luubi lya uyaali. ¹⁹ Nabo balongiche na pete chibili cha nolo, na uchibiya u masongo ma guya mfugo gwa uyaali, wiisula yage, ya luubi lwa mnda mwa naivela. ²⁰ Nabo balongiche pete chopi cha nolo, na uchibiya u biya bihindi bibili bya naivela hasi hage, luubi lwa uyaali, hoka na ifungo yage ya uyaali, hegulu ha gugo mchingo gwa naivela gwine guluwilwe wa bwino. ²¹ Nabo bawenyinye guya mfugo wa chiya pete chage u naivela uya wine uli langi lya ibule, bululi ishame haya hegulu mchingo gwa naivela guluwilwe wa wino,na ugana mfugo gwa uyaali gushileane na naivela; byoka biya nahi biya bimlagile MLUME uli Musa noo byabagilile. ²² Nage guitile na ichibabo ya naivela mgilo gwa ulwiwa, langi lya ibule yoose; ²³ na liya hundo lyine libebe hawingi hayo, mlingilisho gwa lundu lili u kanjo lya igela, na achingo age uchunguluwa liya hundu, bululi lishiguliye. ²⁴ Nabo babiile u achingo a ichibabo biguma nahi bya machungwa bya bunyushi bwa ibule, na langi lya imanjano, nalgi lya ligachichu, alili a ashingwe. ²⁵ Mabiile na lunga lwa nolo, na ubiya chiya lunga hawingi ha biya biguma bili nahi machungwa ngubi chose, hawingi ha bibyo biguma bili nahi machungwa. ²⁶ luunga na iguma nahi ya chungwa, luunga na iiguma nahi chungwa ubupindilo bwa ichibabo uchunguluwa ngubi chose, na ugila wa iyo; byoka biya nahi bisambilwe Musa na MLUME. ²⁷ Nabo balongiche kanjo lya bichwalaganywa bya alili asoga bya ulwiwa, yulu ya Haluni na wa baana bage. ²⁸ na iyo isanjwa ya ichwalaganywa isoga, na tuya tukusukusu tusoga twa alili asoga, na bibyo bichwalaganywa bya magulu bya alili asoga a ashingwe. ²⁹ na gugo mchingo gwa isanjwa isoga ya alili a ashingwe, na langi lya ibule, na langi lya imanjano, na langi lya ligachichu, mgilo gwa mgichi mine guubiya malenda; byoka biya nahi bilagilwe Musa na MLUME. ³⁰ Nabo baitile itu ya lubambasali ya lilyo sala lya lihaha lya nolo chisoga, na ugola heguluhayo mgolo, mlingilisho gwa mgolo gwa mtumbi, MMAHA WA MLUME. ³¹ Nabo babiile wiisula langi lya ibule yulu ya uhamba iya isanjwa ya uwila umswe luubi lwa hegulu; byoka biya nahi bilagilwe Musa na MLUME. ³² Haho noo habhwile mgilo gose gwa bushamo bwa hema lya busambeno; na baana ba Isilaeli bagilile nahi byose MLUME byelimlagile Musa, noo byabagilile. ³³ Nabo bachwile umma Musa bubo bushamo; noo Hema, na bitundu byage byose, bifungo byage, na mbao chage, na bihoho byage, na bichwalaganywa byage, na bushamino bwage; ³⁴ na luhupo lwage lwa bibambi bya miyoo gya milume bya bibiwe langi lya ligachichu, na luhupo lwa bibambi bya konda, na pashia cha iibi, ³⁵ na lindo lya ubangisiya, miti gyage, na isuba ya uleelela. ³⁶ na mesa, na bitundu byage byose, na mikati gya omonya. ³⁷ na mti gwa tala lisiga, na matala mage, maya matala mubiwa ha ihana yage, nabitundu yage byose, na mauta matala. ³⁸ na butambikilo bwa nolo, na mauta ma ushinyiwa, na buswenge bubenju, na pashia lya mchango gwa hema; ³⁹ na butambikilo bwa lusuu, na asuso age a lusuu, na miti gyage, na bitundu byage byose, na mbilika na bushamino byage; ⁴⁰ na ibambacha ya isanjwa ya lagala, na bihanda byage na bushamino bwage, na pashia lya mchango gwa lagala, na migochi gyage, na byiiki byage, na bitundu byage bya ugililwa mengo ma bugichi bwa bushamo, u lilyo hema lya busambeno. ⁴¹ na bichwalaganywa bya mgilo gwa gusoga gwa bugichi ha ihana ya ihaha, na bichwalaganywa bihaha bya Haluni ibuli, na bichwalaganywa bya baana bage, yulu ya ugila mgilo gwa bwibuli. ⁴² Ulamana na byose byine MLUME byelimlagile Musa, noo byabagili gugo mgilo gose baaba na Isilaeli. ⁴³ Musa gumonine gugo mgilo gose, na loola, babele baguhube; byoka biya nahi bilagile MLUME, babele bagile bibyo; haho Musa gubasabile luhanga lusoga.