¹ Hanyuma Bezaleli gulongiche butambikilo bwa lutangi lwa uchigya, bwa mti gwa msese ulaha wage ubele wa maboo matano, na bwata bwage bubele bwa maboo matano, bbele byose na ulaha umwechi, na ugya hegu ubele wa maboo matatu. ² Nage gulongiche masunga mage u masongo mage mana; mamomasunga mabele itu imwechi nabo; nage guwilile na lusuu. ³ Hanyuma gulongiche bitundu byose bya butambikilo, noo; byula bya mto byage, na kasu chage, na bilego byage, na kuo chage, na byangilo byage bitundu byage byose gubigilile bya lusuu. ⁴ Nage gubulongeche butambikilo asuso a lusuu guabiile uya hasi uchunguluwa ngubi chose, gubiile hawingi ha bubo butambikilo. ⁵ Nage gusumbuluye pete china cha ubiya u masunga mana ma ao asuso a lusuu, chabe ya iya ihana ya ugingidicha miti gya ubuswalila. ⁶ Nage gulongiche giya miti gya mti gwa msese na ugiwila na lusuu. ⁷ Nage nugibiya giya miti mnda chiya pete chine chibele mmbavu mwa bubo butambikilo, yuluya ubuswala, gugiitile gibe na hundu mnda, wa chiya mbao. ⁸ Hanyuma gulongiche gigyo mbilika gya lusuu, na bushamino bwage bwa lusuu; lusuu lulo lubele biyoo bya baachana bene balihugila, babele hugila u mchango gwa hema lya busabeno. ⁹ Nage gulongiche liya lagala; luubi lwa uboo wa ulume uhugulwila uboo wa ulume, mseketela gwa lagala gubele gwa isanjwa ya alili asoga a ashingwe, nahi ulaha wa maboo sambi; ¹⁰ bichwalaganywa byage bibele maumi mopi, bushamoni bwage bubele maumi mabili, bubele bwa lusuu; magela ma bisanjwa na byundo byage bibele bya lufeza. ¹¹ Luubi lwa uboo wauachi ubele maboo sambi bibi, na buhanda byage maumi mopi, na bushamino byabyo maumi mabili,bubele bwa lusuu; magela ma bisanjwa na byundo byage bibele bya lufeza. ¹² Luubi lwa igolo lubele na mseketela gwa maboo maumi matano, bihanda byage bibele umi, na bushamino byabyo bubele umi; magela ma bibyo bihanda na byundo byage bibele bya lufeza. ¹³ Luubi lwa mlugulu uhugulwila mlugulu maboo maumi matano. ¹⁴ Mseketela gwa luubi lumwechi lwa mchangolubele maboo umi na matano wa ulaha wage; na bisanjwa byage bitatu, na bushamino byage butatu. ¹⁵ byoka biya luubi lwa bubili lwage; lulu luubi na lulu luubi; lulu luubi na lulu luubi lwa mchango gwa lagala ubele na mseketela gwa maboo umi na matano wa ulaha wage; bisanjwa byage bibele bitatu, na bushamino byage butatu. ¹⁶ Miseketela gya bibyo bisanjwa bya liya lagala gibele gichunguluwe ngubi chose chibele cha bisanjwa bya alili asoga a ashingwe. ¹⁷ Na bushamino bwa biya bihanda bubelebwa lusuu; magela mabubyo bihanda na byundo byage bibele bya lufeza; na umiswe wa biya bihanda bibele bya lufeza; na bihanda byose bya lilyo lagala bihambilwe wa mbulu-mbulu gya lufeza. ¹⁸ Na gigyo pashia gya mchango gwa lagala, gubele mgilo gwa ubiya malenda, gibele gya bunyushi bwa langi lya ibule na langi lya imanjano, na ligachichu, na alili asoga a ashingwe; libele lya ulaha wa maumi mabili, na bwata bwage bubele maboo matano, ulungana na guya mseketela gwa lagala. ¹⁹ Na bisanjwa byage bibele bina, na bushamino bwage buna, bubele bwa lusuu; magela mage mabele ma lufeza, na miswe gyage na byundo byage bibele bya lufeza. ²⁰ Na byiiki byose bya bushamo, na bya lagala bibele buchungulubu ngubi chose bibele bya lusuu. ²¹ Usumbicha bibyo bibya byose byine bigililwe wa yulu ya bubo bushamo, bubo bushamo bwa ubangisiya noo bino; nahi byabibalilwe, nahi ulaga wa Musa byaubele, wa yulu ya bugichi bwa Balawi wa uboo wa Ithamali, mwaana gwa Huluni ibuli. ²² Na Bezaleli mwaana gwa Uli, mwaanangwa Huli, gwa ilongoya Yuda, gugilile byose MLUME byelimlagile Musa. ²³ Namwechi nage Bezaleli gubele na Oholiabu, mwaana gwa Ahisamaki,gwa ilongo ya Dani, gubele mino gwa ubada utogola, mgichi gwa mgilo gwa bwenge, nage gubele hubiya malenda ma bunyushi bwa langi lyaiule nalangi lya imanjano na bugachichu, na isanjwa ya alili asoga. ²⁴ Nolo chose chine chigililwe wa yulu ya gugo mgilo, mnda mgilo gugo gose gwa ihana ya ihaha, chicho nolo cha lutangi, chibele ii talanta maumi mopi nayahabula, na shekeli sambi njwii na maumi matatu, nahi ulamana na shekeli cha ihana ihaha. ²⁵ Na lufeza lwa baya bene babalilwe, batu ba lilyo sumbilo chibele talanta sambi, na shekeli oki limwechi na sambi njwii na maumi njwii na chitano, wa ulamana na shekeli cha ihana ya ihaha. ²⁶ mswe beka, noo ugana, abii! ibaa ya shekeli, wa ulamana nashekeli cha ihana ya ihaha, wa lulingo lwa batu baya bene bahitile u baya bene babalilwe, mine gubele na myaa maumi mabili na ugililila, wa yulu ya batu ba balumyana sambi mtuba na oki chitatu, na sambi chitano na maumi matano ( 603.550) . ²⁷ Na chicho talanta sambi cha lufeza chibele cha chisumbuluchiwe yulu ya bushamino bwa ihana ya ihaha na bushamino bwa chicho pashia; bushamino sambi bwa chicho talanta sambi, talanta gimwechi bushamino bumwechi. ²⁸ Na wa chicho shekeli oki gimwechi na sambi njwii na maumi njwii na chitano, gulongiche bifungo bya bibyo bisanjwa, na ugiwila na lufeza giya miswe gyabyo, na uhamba byundo byage. ²⁹ Na lulo lusuu lulushiwe lubele lwa talanta maumi njwii,na shekeli uki chopi na sambi china. ³⁰ Nage gubiitile bya lulo lusuu bushamino bya mchango gwa hema lya busambeno, na bubo butambikilo bwa lusuu, na aya asuso a lusuu wa yulu yabo na yulu ya biya bitundu byage byose bya buya butambikilo. ³¹ na bushaminobwa uchunguluwa ngubi chose, na bushamino bwa mchango gwa lagala, na byiiki byose bya bushamo, nabyiiki byose bya lilyo lagala uchunguluwa ngubi chose.