¹ MLUME gudogomine na Musa, na umsambila, ² Lusugu lutangi lwa mwechi gwa gutangi wigimiya bubo bushamo bwa hema lya busambeno. ³ Na gpgwe wibiya mnda mwalyo lindo lya ubangisiya, na gpgwe wilibisa lilyolindo napashia. ⁴ Gogwe wilusha mesa na umabiya mnda, na ubibiya naubilongya ulamana nabyo hegulu halyo; hanyuma wihila guya mti gwa tala, na umalamya matala mage. ⁵ hanyuma wigimiya butambikilo nolo bwa uchigiha buswenge umbele wa lindo lya ubangisiya, na uiya pashia u mchango gwa bubo bushamo. ⁶ Hanyuma wabiya butambikilo bwa uchigicha lutangi ha mbeleha gugo mchango gwa bushamo bya heme lya busambeno. ⁷ Hanyuma wabiya na mbilika hawingi haheme lya busambeno na bubo butambikilo, na gogwe wabiya maadi mnda gigyo mbilika. ⁸ Hanyuma wagimiye ibambacha ya lagala uchunguluwa ngubi chose, na ugimiya iibi ya mchango gwa lagala. ⁹ Hanyuma waguhe mauta ma ushinyiwa, na ushinya bubo bushamo mauta, na bitundubyose byine bili mnda mwabo, na ububiya bube buhaha, na bitundu byage byose; nabo bubi buhaha. ¹⁰ Hanyuma washinye butambikilo bwa uchigicha lutangi,na bitundu byage byose; na ububiya butambikilo bube buhaha; na bubo butambikilo bubi buhaha abisa. ¹¹ Hanyuma wishinya mbilika mauta na bushamino bwage, na igibiya gibe gihaha. ¹² Hanyuma wimchwisha Haluni na baanabage haho ha mchango gwa heme lya busambeno, gogwe wibagoga na maadi. ¹³ Hanyuma wimchwiya Haluni bichalaganywa bya bihaha; gogwe wimshinya mauta, na um'biya gabe mmaha, bululi gaoshe ungilila mgili gwa bwiibuli. ¹⁴ Hanyuma wabalushe baana bage, na ubachwiya makanjo mabo; ¹⁵ na gogwe wibashinya mauta nahi byolimshininye sabo; bululi bangilile mgilo gwa bwiibuli; na ubo ushinyiwa wabo wa mauta ubi ii wa bwiibuli bwa milumbu mnda bibushi byabo byose. ¹⁶ Musa gugilile bibyo byose; nahi bimlagile MLUME ubigila noo byeligile. ¹⁷ Ndaa na mwechi gwa gutangi gwa mwaa gwa bubili, lusugu lwa lutangi lwa mwechi buya bushamo bugimiwe. ¹⁸ Musa gugimiya bushamo, bubiile bushamino bwabo, gugimiya mbao chabo na uchiokomeya na bihoho byabo, gugimiya na bihanda byabo. ¹⁹ Gugandile heme hegulu ha bushamo, gubiile na luhupo lwa hema hegulu halyo; nahi bilagilwe Musa na MLUME. ²⁰ Guguhile uya ubangisiya, guubile mnda lindo, gubiile miti gyuswalila hegulu ha lindo, guibiile isuba ya uleelela hegulu halindo. ²¹ Hanyuma gulushiche lindo na ulibiya mnda bushamo, nage gugimiye pashia lya iibi,gubisile lindo lya ubangisiya; nahi MLUME byelimsambile Musa. ²² Gibiile mesa mnda hema lya busambeno, luubi lwa bushamo ulola uboo wa uachi lwa pashia. ²³ Gupangile giya mikati hegulu hage umbelewa MLUME; nahi bisambilwe Musa na MLUME. ²⁴ Hanyuma gubiile mti gwa tala mnda hema lya busambeno, hoka namesa, luubi wa bushamo uhugulwila uboo ulume. ²⁵ Hanyuma gulaminye matala mage u meeso ma MLUME, nahi bilagilwe Musa na MLUME. ²⁶ Gubiile butambikilo bwa nolo mnda hema lya busambeno u mbele wa pashia. ²⁷ Guchigiche hegulu buswenge bwa malashi nahi MLUME byelimlagile Musa. ²⁸ Gusundiya pashia lya mchango gwa bushamo. ²⁹ Gubiile butambikilo bwa lutangi lwa uchigya ha mchango gwa bushamo bwa busambeno, gutangile lutangi lwa uchigya hegulu habo, na lutangi lwa busu; nahi MLUME byelimsambile Musa. ³⁰ Gubiile mbilika hawingi ha heme lya busambeno na butambikilo, gubiilena maadi mnda mwagyo ma ugogela. ³¹ Musa na Haluni, na baana bage balisuwile maboo na magulu mabo mnda mwagyo; ³² haya hababele hugingila mnda heme lya busambeno, na haya habashenine butambikilo balisuwile nehi biya MLUME byelimlagile Musa. ³³ Gugimiya ibambacha ya lagala uchunguluwa bushamo na butambikilo, gusundiye pashia lya mchango gwa liya lagala.Bibyo Musa buhwile guya mgilo gose. ³⁴ Haho liya timba liwilile liya heme lya busambeno, na ubo ugengeda wa MLUME ugiluche bushamo. ³⁵ Ata Musa gushioshiche ugingila mnda heme lya busambeno, wa ibalo ya liya timba lishamine hegulu halyo, nauya ugengeda wa MLUME ugiluche bushamo. ³⁶ Haya haginunywe liya timba uhuma hegulu ha bushamo, baana ba Isilaeli bagile hambele ha ng'endo chabo chose, ³⁷ haho nambo liya timba lisaginunywa, maya mengo bashigyatile ndaa na luya lusugu lwa liginunywa iyaka. ³⁸ Bululi liya timba lya MLUME libele husha hegulu ha buya bushamo mengo ma mchuba, na libele na aahya mnda mwalyo mengo ma busugu, umbele wa meeso ma baana ba Isilaeli mnda ng'endo chabo chose.