¹ Abetcha gudogomine bino binywa byose guganine, ² Nene noo MLUME, Abetcha obe, niuhuminye mnda sii gya Misili, mnda ndu gya bucha. ³ Ushibe na tunge tubetcha upima nene. ⁴ Ushiliitile mmishi gwa gubade, na wa ata mlingilisho gwa itu yoyose yine ili ha gulu, ata yine ili hasi ha ibaloo. ⁵ Ushibiginamine na ata ubigilila; bululi nene, MLUME, Abetcha obe, nili Abetcha ali na buwa; nisuonona baana buubi bwa bamasabo, ata ibushi ya butatu na ata ya buna ya bene balihukonywa, ⁶ nene nisuleelela mauki uki bene bali hukunda, na uwasha alago anyi. ⁷ Ushililumbuchi bunene china lya MLUME, Abetcha obe, bululi MLUME gushim'bala uba na abachi mtu guya gulihulimbula china lyage bunene. ⁸ Uluengeleche lusugu lwa Sabato uluhahache (ushama nangu ugila). bululi mlwanyi. ⁹ Masugu mtuba ugile mgilo, ugile bigilanywa byobe byose; ¹⁰ bululi lusugu lwa njwii m Sabato gya MLUME, Abetcha obe, lulo lusugu ushigichi mgilo go gose, gogwe, ata mwanobe, ata msiha gobe, ata mcha gobe, ata mgichi gobe gwa mmachana, ata nyama chobe cha chisugwe, ata mgenyi mine guli ha mchango gobe. ¹¹ Bululi MLUME mnda masugu mtuba guitile gulu, na sii na bahali, na byose byine bilimo, gulitudiche lusugu lwa njwii;wa bibyo MLUME guluheleleche lusugu lwa Sabato mlwage. ¹² Banyemye sobe na mnobe; masugu mobe maabe mabuchu mnda sii gyolihewa na MLUME, Abetcha obe. ¹³ Ushihagane. ¹⁴ Ushyite masei. ¹⁵ Ushigibe byangwa. ¹⁶ Ushim'bangisiye m'binji nobe lulimi. ¹⁷ Ushibe na itima yulu ya ndu gya m'binji nobe, ushibe na itima yulu ya mmachi gwa m'binji nobe, ata mcha gwage, ata mgichi gwage gwa mmachana, ata ng'ombe gyage, ata punda gyage, ata yo yose yine yeli nayo m'binji nobe. ¹⁸ Batu bose bamonine tuhenyu-henyu na miukulo na liidi lya tusiba, na luya loono uhuma mii; na batu habamonine bibyo badandile, bagimene koo. ¹⁹ Bamsambile Musa, Gogwe noo udogome netu, beswe twihulicha, biino Abetcha gashidogome netu, bululi tunawa. ²⁰ Musa gubasambile batu, Mushimone booba, Abetcha achwa bululi amtonde, na idubayage ibe umbele wenyu, yulu mushigile buubi. ²¹ Haho babo batu bagimene koo, nage Musa gushenene guya mdoo gwaata gwa Abetcha helibeleo. ²² MLUME gumsambile Musa, Basambile baana ba Isilaeli bino, Benywe bene mwamona nadogoma nenyu uhumina hagulu. ²³ Mushiite tunge tubetcha hamwechi nanyi; tubetcha twa lufeza, ata tubetcha twa nolo mushituite. ²⁴ Wingimyila butambikilo bwa bitete, gogwe witambikile lutangi lobe hegulu habo; lutangi lwa uchigya, na lutangi wa talala, na miyoo gyobe, na ng'ombe chobe, kila ihana yandibiya kengelecho gya china lyanyi, haho noo handiuchwila na uuhalila mihaa. ²⁵ Gogwe ubengimyila butambikolo bwa mawe, ushibugubaa bwa mawe ma mabachwe; bululi wahuba gogwe wahugila itundu yobe wa uibada waibiya abachi. ²⁶ Iyaka ushigya ubutambikilo bwanyi wa usila hegulu yulu buchi bobe bishimoneye hegulu habo.