¹ Biino, uonona olibiya u mbele wa babo batu noo uno. ² Ubemgula mcha gwa Iebulania, gwiugilila mengo ma myaa mtuba; mwaa gwa njwii gwihuma oli bunene nangu ulipa atu. ³ Nambu gungile uli gee buchima kaa, gwihuma byoka biya gee buchima; nambo gugondile, mmachage gwihuma na ugya hamwechi nage. ⁴ Nambo ii mlumyage noo gumgondele gugo mmachi, nage gwam'butila baana, balumyana na baachana; guya mmachana na baya baana babi bibya bya mlumyage, nage guya mlumyana gwigya gee achiye. ⁵ Nambo guya mcha gabedogoma wa hululu, Nene nilihummunda mlumyanyi, na mmachanyi na baana banyi; nishihubenja ugya na ulewa bunene. ⁶ haho guya mlumyage gwimchwisha umbele wa Abetcha na um'biya ha mchango, na ata ha mtatala mbeba gya mchango; na mlumyage gwimchibula litu lyage na mtubulo; haho gwigilila masugu mage mose. ⁷ Nambo mtu gabegonja msiha gwage nahi mgichi gwa mmachana, gushihuma nahi bisuhuma mcha gwa mlumyana. ⁸ Uba mlumyage gwa mgilo gusam'benja, uba gwamgonja, haho gwigitabuwa gahogononywe; gee gushi na inywa ya umgonja na gunge mtubululi gwamgilila wa buhuli-huli. ⁹ Ugana gwamgonja msiha gwage, gwimgilila nahi bilingye ugililwa misiha ginge. ¹⁰ Ugana gwaliguhila gunge mmachana, iliwa yage gugo, na bichwalaganywa byage, na ulala nage, gushimmwingwila. ¹¹ Nambo gushimgilila bibyo bigilanywa bitatu, haho gwihuma na ugya bunene gushihana bumona. ¹² Mtu gegese gwimmula mtu, gee nuuwa, hashi umleya gugo mmaganyi gwiwa. ¹³ Nambo iwa subi-subi, ube ii Abetcha ka am'biya mnda uboo wage; bibyo niumonya ihana yelisinine. ¹⁴ Nambo mtu gwamgila gunge nage wa anene, yulu gammage wa abachi; gugo mmaganyi ndaa na u butambikilo bwanyi, gahagwe. ¹⁵ Gwihula sabe ao mnage, ishala butala gwihagwa. ¹⁶ Gegese mine gwigiba mtu, nuumgucha, gugo gabemoney mmuboo wage, gugo ishala butala gwihagwa. ¹⁷ Guya gwilahya sage ao mnage, ishala butala gwihagwa. ¹⁸ Batu babegumana, na gumwe numta minage liwe, ao kone, gusawa biino, gwalachwa wiingo yage; ¹⁹ helibyuwa guya na ugyta hambuga na uliwatilicha na lubango, haho noo guya mine gummulile helilechiwa; bibyo gwilipa yulu ya maya mengo mage mene machimine, nage gwimgundahya ata helihona abisa na usumwa ose. ²⁰ Mtu gwahummula mcha gwage, ao mgichi gwage gwa mmachana, wa langulo, nage nuwila mmuboo wage, gulingye uononywa. ²¹ Nambo gabehona ha lusugu lumwechi ao mopi gushiononywa; bululi, ii bitundu byage. ²² Balumyana babegumana hamwechi, babemgwila mmachana gwa gumo na gumo nuhuma, na gushihusumwa wa ndigili-ndigili; gugo gwihanana bumona ulamana na biya byibanda mlumyage gwa guya mmachana; gwilipa nahi biya byigana tululiya. ²³ Nambo hali ndigili-ndigili abisa, haho hihanywa mwego wa mwego, ²⁴ liiso wa liiso, liino wa liino, oboo wa uboo, ugulu wa ugulu, ²⁵ uchigya wa uchigya, lase wa lase, ushubuwa wa ushubuwa. ²⁶ Mtu gabemmula mch gwage u liiso, ao liiso lya mgichi gwage gwa mmachana, na ulibela; gwimlecha gagye bunene yulu ya liya liiso lyage. ²⁷ Nambo gabemmula mcha gwage u liino lyo nuhuma, ao liino lya mgichi gge gwa mmachana, gwimlecha bunene yulu ya liino lyage. ²⁸ Ng'ombe gwahuta mlumyana ao mmachana meega, nabo nuuwa, gigyo ng'ombe gyihagwa wa utewa mawe, nyama chage chishiliwe, haho mine giya ng'ombe gwilewa. ²⁹ Nambo gigyo ng'ombe giolobele uta batu meega utula aala, na mine nagyo gumoninywe iyoihisho, nage gushigichibile, nagyo gyahaga mtu mlumyana ao mmachana, gigyo ng'ombe gyihagwa wa utewa mawe na guya mine nagyo gwihagwa nage. ³⁰ Nambo gwigolelwa uhogonona, haho noo helihana bumona yulu ya mwego gwage iya yine yeligolelwa. ³¹ Uba ng'ombe gyamta mwaana gwa mlumyana meega mnda, ata uba gyamta mwaana gwa mmachana, gwigililwa oka uya uonona. ³² Ng'ombe twahumta meega mnda mcha gwa mlumyana ao mgichi gwa mmachana; mine na gigyo ng'ombe gwihana uli mlume gwa baya bacha shekeli maumi matatu ma lufeza, nagiya ng'ombe gyihagwa wa utewa mawe. ³³ Nambo mtu gwiununa iina, ata udaba iina, nage gusaihulila, hanyuma ng'ombe ata punda gyahugwa mo, ³⁴ miine na iya iina gwihana; gwimma mina na giya nyama bumona, na giya nyama gibi gyage mine na iina. ³⁵ Ng'ombe gya mtu gibebongola ng'ombe gya gunge tu nagyo nuuwa; haho bigucha giya ng'ombe gya poo, na ugabulana bumona hawingi; na giy ng'ombe gyagiube nagyo bigigabula. ³⁶ Nambo gibemanyia ugana giya ng'ombe utula aala noo mgilo gwagyo utana meega, na mine nagyo gushigichibile; haho gwigiwicha ng'ombe wa ng'ombe, na giya ng'ombe gyagiube gibi byage gwiguha.