¹ Haho Yethlo, ibuli ya ba Midiani, sage buo na Musa, helihuliche mwano gwa bihisho bibyo byose Abetcha byelimgilile Musa, na Baisilaeli batu bage, biya MLUME byeli baleshile Baisilaeli bahume Misili. ² Bibyo Yethlo sage buo na Musa gumguhile Shipola, mmachi gwa Musa, hanyuma gee numgiwicha u ndu gyage. ³ hamwechi na baana bage babili; gugo gumwe, china lya gumwechi ii Gelshomu, bululi guganine, Nene nibele mgenyi mnda sii gya bugenyi; ⁴ na china lya gwa bubili, ii Eliezeli, bululi guganine, Gee Abetcha a tatagubele mwatilicho gyanyi, gupogonone na ahilu a Falao. ⁵ Haho Yethlo, sage buo na Musa, hamwechi na mmachi gwa Musa na baana bage babili bamgilile Musa mya mlwanaganywa, haya helibele mpange, u loono lwa Abetcha. ⁶ Yethlo gumsambile Musa, Nene Yethlo sobe buo naachwa oli, na mmachobe, na baana bobe babili. ⁷ Haho Musa gutobowile hambuga yulu gamgae sage buo, gumginanine na numumbatila; nabo babuchenye myano; hanyuma bagingile mnda itula. ⁸ Musa gumsambile sage buo bibyo bihisho byose byine bigilile Falao na Bamisili yulu ya Baisilaeli, na bihisho bya byata byine bibapashile mndila, na biya bibahogonone MLUME. ⁹ Yethlo guseelele yulu ya yano yose yine igilile MLUME yulu ya Isilaeli, wa byeli bahogonone mmaboo ma Bamisili. ¹⁰ Hanyuma Yethlo guganine, Na gatonywe MLUME guya gummogonone na maboo ma Bamisili, na uboo wa Falao; gubahogonone babo batu bahume mmaboo ma Bamisili. ¹¹ Bino namana ugana MLUME ii mmata uhima tubetcha tose; ehe, wa yulu ya ihisho iya ya bamgilile ya mshaminyi gwa udege. ¹² Yethlo sage buo na Musa gummele lutangi lwa uchigya na lutangi lwa ushinja; na Haluni gee nuuchwa, na bauulu bose ba Isilaeli, baye iliwa hamwechi na sage buo na Musa u mbelewa Abetcha. ¹³ Hamwelo hage, Musa gushamine na ubalapisha batu uonona; na babo batu bagimene bali bamchungulubu Musa utula halwelo ndaa na igolo. ¹⁴ Sage buo na Musa hemwene bibyo byose byine byeligilile babo batu, guganine, Ino iyihisho nai yine yawabagilila bano batu? Wa gogweugimana haho gogwe buchima, na bato batu ugimana oli utula lwelo ndaa na igolo. ¹⁵ Musa gumsambile sage buo, Bululi batu basunjwila nene yulu bam'buche Abetcha. ¹⁶ babechwa na inywa, unjwiila; nene nugeda mlandunhawingi ha mtu na miinage, nene nubasambila alago a Abetcha, na m'bindo gwage. ¹⁷ Sage buo na Musa gumsambile, ino itu yolihugila ishi isoga. ¹⁸ Wa hinene gogwe higonda, na bano batu bose bene boli nabo hamwechi; bululi ino igilanywa ili bushito abisa oli; ushinaosha wigila gogwe buchima. ¹⁹ Hulicha bino inywa yanyi, nilihuuha lango, na Abetcha abe hamwechi noobe; wabe gogwe yulu ya batu u mbele wa Abetcha, gogwe wabe humlushisha Abetcha binywa. ²⁰ gogwe wabagigye batu alago na m'bindo, gogwe wibalangulula ndila giya gyabalingye uhitila, na mgilo gwabalingye ugila. ²¹ Na wa uhima bibyo wilisobolela hawingi ha batu bano batu benebali na uosha, bene bali humnyemya Abetcha, batu na chigilwe, mine gulihuonywa bitundu bya bisapwe; wababiye hagulu habp, babe baosobu ba ma uki, na baosubu ba sambi, na baosobu ba maumi matano, na baosobu ba umi; ²² nabo babaluliye bano batu masugu mose; hanyuma, inywa yoyose yine ibi igumu noo babeuchwila nayo gogwe, na inywa yoyose yicho icho biluliya boo bene; bibyo gogwe ubina ihana ya ulitocha abisa, nabo biswa gugo mchigo hamwechi nobe. ²³ Nambo wigila ino ihisho, na Abetcha abe uulaga bibyo, bino gogwe wiosha ugimana, na batu babo bose bigya umisenge gyabo wa talala. ²⁴ Bibyo Musa guhuliche inywa ya sage buo, gugilile byose byine byeli msambile. ²⁵ Musa gusobole batu bane bali na buosha hawingi ha Isilaeli yose, gubabiile uba miswe hegulu ha batu, baosobu ba ma uki, na baosobu ba sambi, na baosobu ba maumi matano, na maosobu ba umi. ²⁶ Nabo babaluliye batu masugu mose; mihungo gya gigumu bammilie gyo Musa, biya byose bya bicho bicho baluliye boo bene. ²⁷ Hanyuma Musa gulagene na sage buo; nage gugile lwage, ndaa na mnda sii gyage.