1 Sumbilo lyose lya baana ba Isilali ligile, uhuma lwanaganywa lwa Sini walwendo lwabo, nahi biya MLUME byelibalagile, bashamine Lefidimu; haho hashibele na maadi, batu banywe. 2 Wa bibyo babo batu bagumene na Musa, baganine, Tuhe maadi tunywe, Mus gubasambile, Yulu yai ugumana nanyi? Yulu yai mulihumtonda MLUME? 3 Babu babele na yuma ya maadi uya; nabo bamdogomine Musa mnda wa mnda, baganine, Yulu yai utuhuminye Misili, na utuhaga beswe na baana betu na nyama chetu na yuuma? 4 Musa gumlilile MLUME, guganine, Nabagilile iii bano babtu? mengo macho bita mawe. 5 MLUME gumsambile Musa, Hita hambeleha batu, wabaguhe bamwe bauulu ba Isilaeli hamwechi nobe; na luya lubango lwine lolihulile luya luudi nalo, uluguhe mmuboo obe , wagye. 6 Loola, nigimana umbele obe, hegulu ha liya liwe lya lyata uya Holebu; na gogwe wilihula liya liwe lya lyata, na maadi mihuma, batu bamanywe. Musa gugilile bibyo u meeso ma baana ba Isilaeli. 7 Guhagishile ha iya ihana china lyage Masa, na Meliba; wa ibalo ya ugubana wa baana ba Isilaeli, wa yulu bamtondile MLUME, baganine, Wi wii! MLUME guli hwingi hetu hetu ao nangu? 8 Mamo mengo Baameleki bachwile, balwile na Baisilaeli uya Lefidimu. 9 Musa gumsambile Yoshua, Tusobolele batu, wachuwe na ugya ulwa na Baameleki; mmeshi nigimana u songo gya luya loono, na luya lubango lwa MLUME nibi nalo mmuboo wanyi. 10 Bibyo Yoshua gugilile nahi biya byelimsambile,gulwile na Baameleki; na Musa, na Haluni, na Huli bashamine heguli ha luya loono. 11 Mengo, maginune Musa uboo wage, Isilaeli ihimine; na helisachiche uboo wage Ameleki guhimine. 12 Mndi maboo ma Musa mabele manyemu; haho baguhile liwe, nuulibiya hasi hage gee nulishamina. Haluni na Huli bawatiliche maboo mage, gumwe lulu lubi na gunge lulu lubi; maboo mage naginyuwe ndaa na igolo. 13 Yoshua gudigile Ameleki na batu bage wa bwigi bwa ahilu. 14 MLUME gumsambile Musa, Ugole guno mwano witabo ya kengelecho, hanyuma walisambe u matu ma Yoshua; bululi niuchima abisa uengechiwa wa Ameleki, ushibe iyaka hasi ha gulu. 15 Musa gugimiye butambikilo, gugishile china lyage Yehiva-Nisi (MLUME noo bendela lyanyi); 16 guganine, MLUME gwalaha; MLUME gubi na bita na Ameleki ibushi ndaa na ibushi.