¹ MLUME gumsambile Musa, Gogwe ugingile wa Falao; bululi m nene naita mtima gwage uba gugumu, yulu namonye bisaga byanyi bino hawingi habo. ² gogwe wadogome mmatu ma baana bobe, na mmatu ma bedulu bobe, m'bigilanywa nai byandigilile yulu ya Misili, na bisaga byanyi byandiitile hawingi habo; bululi mumane ugana nene noo MLUME. ³ Haho Musa na Haluni bagingile uli Falao, na umsambila, MLUME, Abetcha gwa Baeblania, gwagana bino, Wi wii! Wihanya hanya ata mengo nai ulisacha umbele wanyi? Bahe batu banyi luhusa bagye lwabo, yulu bangilile. ⁴ Nambo wahanya ubaha babo batu banyi luhusa bagye lwabo, loola, nilusha njige chigingile u ng'umba chobe; ⁵ nacho chiunina ibaloo yose, mtu gashioshe uimona iya ibaloo; nacho chiya bisunga byine bisigele hanyuma ha giya mbua gya mawe, chiya miti gyose byine gyimena mmabala; ⁶ na madu mobe, na madu ma bagichi bobe, na madu ma Bamisili bose migilula na njige; mlingilisho gwacho bamasobe, ata bamasobulu bashimonine, utula haya hene habatulile uba hegulu ha bino bitete ndaa na lino. Bibyo gugaluwe na utobowa uhuma wa Falao. ⁷ Haho bagichi ba Falao bamsambile, Guno mtu gubi tande-tande watuli ata mengo nai? Ubahe bano btu luhusa bagye lwabo, bamgilile MLUME, Abetcha abo; ushinamana ka ugana Misili gyahudoga? ⁸ Musa na Haluni bahyiichiwe iyaka wa Falao; nage gubasambile, M'begya, umgilila MLUME, Abetcha enyu; bibyo m'bananyi noo bigya? ⁹ Musa gugaile,Twigya na bawalubaga betu na miungu gyetu, na baana betu, na bawamisiha gyetu, twigya na miyoo gyetu na ng'ombe chetu; bululi bitulingye ummitila MLUME lusugu lwa ulitucha. ¹⁰ Falao gumsambile, Ehe, MLUME na gabe hamwechi neenyu, nahi byandimma luhusa mugye lwenyu na baana benyu; lingaminywe, uya umbele wenyu uli usone. ¹¹ Bishi bibyo; giwe benywe bene bali batu babaomu, mwamgilile MLUME; bululi noo ihisho yamulihubenja. Nabo bachingilwe u meeso ma Falao. ¹² MLUME gumsambile Musa, Golola uboo obe hegulu ha sii gya Misili yulu chicho njige, chisale hegulu ha sii gya Misili, chiye byose byine bili bimenyu mnda sii gya Misili, noo biya byine bishigilwe na giya mbua gya mawe. ¹³ Bibyo Musa guginune lubango lwage hegulu ha sii gya Misili, na MLUMEguhilile mnaga uhuma luubi lwa mlugulu hegulu ha sii, chuba lyose, na busugu bose, habuyele guya mnaga gwa mlugulu guchwishiche njige. ¹⁴ Na chicho njige chisalile hegulu ha sii gyose gya Misili, chishamine u bisula byose bya Misili, chibele chibi abisa; chishibele naba njige nahi chiya mengo momose, na hanyuma hacho hashibi chinge nahi chiya. ¹⁵ Bululi chiunine ibaloo yose, na sii gingile mdoo; chilile byose bya bimenyu mnda ibaloo, na biguma byose bya miti byina bishigilwe nagiya mbula gya mawe; hashishigele ata yaanyi imwechi, mti na ata byunywa bya mmabala, mnda sii gyose gya Misili. ¹⁶ Haho noo Falao heligishile Musa na Haluni wa abilo, guganine, Namlubila buubi MLUME gwenyu na Abetcha enyu na benywe byoka biya. ¹⁷ Biino hano, namtendelela, ndeelelwe buubi bwanyi luno lwendoka lumwechi, Sabwe MLUME, Abetcha enyu gapuminye luno lubu. ¹⁸ Musa guhumine wa Falao na umsaba MLUME. ¹⁹ MLUME gugalule mnaga gwa mlugulu gwine gwina uoma wiingi, gwine guhuminye njige na uchihila u bahali lya Shamu; hashishigele ata njige gimwechi mnda ng'umba chose cha Misili. ²⁰ Ata bibyo MLUME guguitile mtima gwa Falao uba gugumu ka, gashibahe baana ba Isilaeli luhusa baligile lwabo. ²¹ MLUME gumsambile Musa, Golola uboo obe uuloshe ha gulu, habe mdoo mnda sii gya Misili, batu baababate-babate mnda mdoo, ²² Haho Musa gugolole uboo wage luubi lwa ha gulu; hoo nuba mdoo mnda sii gyose gya Misili mengo ma masugu matatu. ²³ bashioshiche umonana mtu na gunge nage, na mtu gushioshiche uhuma ha ihana yine yeli hoo mengo ma masugu matatu; haho baana ba Isilaeli babele na lwenge uya u bushamo bwabo. ²⁴ Falao gumgishile Musa, na umsambila, Biini, m'begya umgilila MLUME; miyoo gyenyu na ng'ombe chenyu, muchishige; baana benyu mugye nabo hamwechi nenyu. ²⁵ Musa guganine, bilingye utuhe mmaboo metu na nyama cha utambikila lutangi lwa uchigya, yulu twamshinjiche MLUME Abetcha etu lutangi. ²⁶ Bihiche byetu nabyo byigya hamwechi netu; hashishigala unyuma ata abidi amwechi; bululi bitulingye uguha bibyo yulu ya ugilila nabyo MLUME, Abetcha etu; na beswe tushigidi, mengo matwihiya uya iyitu nai noo yine yatwimgilila nayo MLUME. ²⁷ Ata bibyo MLUME g i u uitile mtima gwa Falao uba gugumu ka, gashigitabuwe ubaha luhusa bagye lwabo. ²⁸ Falao, gumsambile Musa, Ligile, ulilole ushimone yenyi yanyi iyaka; bululi lusugu luya lolindola yenyi yanyi wiiwa. ²⁹ Musa guganine, Wadogoma bisoga; nene nishiulola yenyi yobe iyaka.