¹ MLUME gumsambile Musa, Hili inge ihulo imwechi ishinagiliya, yandichwisha uli Falao na Misili; hanyuma ha haho gwimma benywe luhusa muhume uno; nage haho hene hilimma luhusa, gwimchinga muhume uno abisa abisa, ² Biino, gogwe udogome mmatu ma bano batu, na kila mtu gasabe uli m'binji nage na kila mmachana gasabe uli m'binji nage, bitundu bya lufeza na bya nolo. ³ MLUME gubahele babo batu iubu u meeso ma Bamisili. Wa uhima bibyo, gugo Musa gubele mtu mmata mnda sii gya Misili, u meeso ma bagichi ba Falao, na u meeso mabatu bage. ⁴ Musa gubasambile, MLUME gwagana bino, Ha, m'bwingi na busugu nene nigya na uhita hawingi ha Misili. ⁵ na bubele bose bwa sii gya Misili biiwa, utula bubele bwa Falao guya guli mshame wiisuba yage ya buoolo, ndaa na guya mgichi gwa mmachana guli haya hanyuma ha liwe lya uhelela bulo; na bubele bose bwa nyama. ⁶ Haho noo habi na lilo lyata mnda sii gyose gya Misili, mlingilisho gwamo gushinaba mengo momose, na gushibi iyaka mengo momose abisa. ⁷ Bibyo u baana baIsilaeli hashi ata awa amwechi ene utobola lulimi yulu yabo, yulu ya batu na yulu ya nyama; Bululi mwaoshe umana biya MLUME byelibagula Bamisili na Baisilaeli. ⁸ Iyaka babo bagichi bobe bose bisala hasi wandi nene, nabo binginamina, bigana, Ubegya gogwe na bano batu bose bene bali huulama; na hanyuma ha bibyo nitobowa. Haho Musa guhumine wa Falao na sungu chata. ⁹ MLUME gumsambile Musa, Falao gushimmulicha benywe; yulu bisaga byanyi bibule mnda sii gya Misili. ¹⁰ Musa na Haluni bagilile biya bisaga byose u mbele wa Falao; MLUME guguitile mtima gwa Falao uba gugumu, gashibahe baana ba Isilaeli luhusa bahume mnda giya sii.