¹ Haho MLUME gumsambile Musa, gogwe ugingile wa Falao, umsambile, MLUME, Abetcha a Baeblania, gwagana, Bahe luhusa batu banyi bululi bagye ungilila. ² Nambo wihanya ubaha luhusa bagye, na ugililila ubachibila, ³ loola, uboo wa MLUME uli hegulu ha nyama chobe chusugwa chine chili u mabala, hegulu ha falasi, nahegulu ha punda, na hegulu ha ngamia, na hegulu ha ng'ombe, na hegulu ha miyoo; habi na bisumi byata abisa. ⁴ Hanyuma MLUME gwibagula nyama cha ba Baeblania na nyama cha Bamisili; na hashiwa itu yoyose ya baana ba Isilaeli. ⁵ Nage MLUME gubiile mengo, guganine, Mmeshi MLUME gwigila ino ihsho mnda gino sii. ⁶ MLUME gugilile iyo ihisho lusugu lwage lwa mabili, na nyama chose cha usugwa cha Bamisili choo nuuwa; bibyo nyama chose cha baana ba Isilaeli hashiwile ata gimwechi. ⁷ Falao gutumine batu, loola, hashi ata gimwechi gyine giwile u nyama cha baana ba Isilaeli, Ata bibyo mtima gwa Falao gugililile uba gunyemu, gushibahele babo batu luhusa bagye lwabo. ⁸ MLUME gusambile Musa na Haluni, Liguhilwe ganda lya mto gwa mmasuga, hanyuma Musa gagugulule ha gulu umbele wa Falao. ⁹ Nago gubi ihwili ihuhu hegulu ha sii gyose gya Misili, nago gubi ii bihute bya uhuma maadi na umena bihana byose bya batu na bya nyama, na mnda sii gyose gya Misili. ¹⁰ Bibyo baguhile mto gwa mmasuga, na ugimana umbele wa Falao; na Musa noo ugugulula ha gulu nago nuuba bihute bya uhuma maadi na umene bihana byose bya mibili gya batu na gya nyama. ¹¹ Nabo baya bagabo bashioshiche ugimana umbele wa Musa bululi bwa bibyo bihute, yulu babo bagabo babele na bibyo bihute, na Bamisili bose babele nabyo. ¹² MLUME guguitile mtima gwa Falao uba gugumu, gashibahuliche; nahi byoka biya bidogomine MLUME uli Musa. ¹³ MLUME gumsmbile Musa, Chuwa lwelo lwa umayaya, wagimane umbele wa Falao, wamsambile, MLUME, Abetcha a Baeblania, gwagana, ubahe batu banyi luhusa bagye ungilila. ¹⁴ Bululi mano mengo nilusha bihulo byanyi byose hegulu ha mtima gobe, na hegulu ha bagichi bobe, na hegulu ha batu bobe; yulu umane ugana hshi gunge mlingililsho gwanyi nene mgino sii gyose. ¹⁵ Bululi mano mengo nisuba nahugolola uboo wanyi, bahuuhula gogwe na batu bobe, kwa bisumi, gogwe wabachingwa koo na uhunyiwa mnda gino sii; ¹⁶ ata bibyo niugimiye gogwe wa yulu ya yoka ino ibalo, yulu ya uumonya uosha wanyi, iyaka yulu ya china lyanyi lilisambwe mnda ibaloo yose. ¹⁷ Na gogwe wi wii! ata bino ulihulitona hegulu ha batu banyi, ushibahe luhusa baligile lwabo? ¹⁸ Loola, mmeshi mengo naho mano, ninyesha mbula gya mawe ma bushito abisa, gyine mlingilisho gwagyo gushinaba Misili utula luya lusugu hagitulile uba ndaa na lino. ¹⁹ Bino hano, utume wa abilo bagingiche mnda nyama chobe na biya byose byine byoli nabyo umabala; noo ugana kila mtu na nyamya chose chyine chili umabala, chine chishihyichwa u madu, gigyo mbula gya mawe gyinya wabali, nabo biiwa. ²⁰ Guya mine gunyeminye inywa ya MLUME hawingi ha bagichi ba Falao gusininye bagichi bage na nyama chage bagingile mnda ndu; ²¹ na guya gushiibiile mnda mtima inywa ya MLUME gubashigile bagichi bage na nyama chage umabala. ²² MLUME gusambile Musa, golola uboo obe ulosha ha gulu, yulu ya mbula gya mawe mnda sii gyose gya Misili, na hegulu ha bose bene bali na m'bili na hegulu ha nyama chose na hegulu ha byanyi byose byine bisuliwa bya mmabala, mnda sii gyose gya Misili. ²³ Musa gugolole uboo wage uulosha ha gulu; haho MLUME guleshile mmukulo na mbula gya mawe, na aahya asalile hegulu ha sii gyose gya Misili. ²⁴ Bibyo habele na mbula gya mawe, na aahya ene abele alisupaganye na giya mbula gya mawe, ginyemu abisa, gyine hashibele naba ginge nahi giya mnda sii gyose gya Misili utula hagitulile uba mmoga. ²⁵ Na giya mbula gya mawe ginyenene yoyose yine ibele umabala, batu na nyama, mnda sii gyose gya Misili, gigyo mbula gya mawe gihulile biunaganywa byose bya mmabala, na unoga kila mti gwa mmabala. ²⁶ Hahi mnda sii gya Gosheni gyoo buchima, gibele gishame baana ba Isilaeli, mbula gya mawe gishibele oo. ²⁷ Falao gutumine batu, na ubagita Musa na Haluni, na ubasambila, Nene naluba mano mengo; MLUME gwina kiine, nene na batu banyi tuli basone. ²⁸ Msabwe MLUME; bululi miukulo gisili giingi gwata na gino mbula gya mawe; bino nene nimma luhusa muligile lwenyu, na mushisinge abisa. ²⁹ Musa gumsambile, Biino handihuma mnda mbuga nimginunina MLUME uboo wanyi; na gigyo miukulo gyisunga, na mbula gya mawe gishinya iyaka; bululi wamane ugana gino sii ii gya MLUME. ³⁰ Mndi, gogwe na bagicho bobe, nigidi ugana mushihumnyemya MLUME Abetcha ata. ³¹ Na ludamba na shayiri (nahi ngano) bihulilwe; bululi shayiri chibele na mihunga ludamba chibele huhunya buluba. ³² Bibyo ngano na kushemethi bishihulilwe bululi bishibele na lusa. ³³ Musa guhumine mmbuga, uhuma wa Falao, gumginunine MLUME maboo mage; na giya miukulo na giya mbula gya mawe gisungile, na mbula gishinyene iyaka hegulu ha sii. ³⁴ Falao helimonine mbula na mbula gya mawe na miukulo gyahusunga,gugililile ugila buubi, na uita mtima gwage uba gugumu, gee na bagichi bage. ³⁵ Mtima gwa Falao gubele gugumu nage gushibahele baana ba Usilaeli luhusa bagye lwabo; nahi biganine MLUME waanywa a Musa.