¹ Haya oolo na Hamani bagile uya na unywa hamwechi na mmaoolo Ishitele. ² Oolo gumsambile Ishitele iyaka lusugu lwa bubili hokahaya ha uya na unywa divai, Mmaoolo Ishitele ulihusaba ii? Na wihewa; na ulihubenja ii? Ata ibaa ya buoolo wigililwa. ³ Haho mmaoolo Ishitele gumgaile, guganine, Oolo, uba nahewa iubu u meeso mobe, na oolo gabemona bisoga, nahewe mwego gwanyi uba usaba wanyi, na batu banyi uba byandihubenja. ⁴ Bululi twagulwa, nene na batu banyi, yulu tudogiwe na uhagwa, na uchimiwa. Nambo twabagulwa nahi bacha na bagichi ba baachana, naba shama pii; naata bibyo asusu atu ashi hulingilishiwa uchiminya wa oolo. ⁵ Haho oolo Ahasuelo heliganine, gumsambile mmaoolo Ishitele, Mnanyi gugo iyaka guli uhi, mine mtima gwage gwatonda ugila bibyo? ⁶ Ishitele guganine, Imsusuchi, iyaka iyamangu, noo gugu Hamani, mtu m'bii abisa. Haho Hamani gugingilwe na booba u mbele wa oolo na mmaoolo. ⁷ Oolo guhumine wa uchigililwa wage uhuma u uya na unywa divai, gugingile mnda lubala lwa u mgumbo. Hamani nage gugimene yulu ya ulisabila mwego uli mmaoolo Ishitele; bululi gomonine ugana gwalangilwa bisone na oolo. ⁸ Hanyuma oolo gugiwile uhuma u lubala lwa u mgumbo ndaa na wihana ya uya na uynwa divai. Haho Hamani gulitelile hasi wi ingo wineubele Ishitele. Oolo guganine uli wii! Wi wii! Gwimmitila mmaoolo anene ndaa na umeeso manyi mnda ndu gyanyi? Na inywa haihumine mmanywa mwa oolo, Bammupi Hamani yenyi. ⁹ Haho noo hadogomine Halbona, mgimaninyi gwa ndu gumwe gwa baya bene babele hugila u mbele wa oolo, Loola, bino mti gwa ulaha wage wa maboo maumi matano, Hamani gwelim'biile tayali Moldekai, mine gudogomine bisoga yulu ya oolo, guli gugimiwe u ndu gya Hamani. Oolo guganine, Msundiwe hegulu hago. ¹⁰ Bibyo bamsundiye Hamani hegulu ha mtigwelibiile tayali Moldekai, Uchigililwa wa oolo usalile.