¹ Buya busugu oolo gushimonine tulo; gusabile gahewe itabo ya migolo gya uengelecha, nayo ilangulwe u mbelewa oolo. ² Hamoneye ugana igolilwe ugana Moldekai gubashitakile Bigthana na Teleshi, bagimanyi bopi ba oolo, hawingi ha baya babele huusa mchango, benebabele huenga umaga oolo Ahasuelo. ³ Oolo guganine, Wi wii! Iyi bunyemu nai ata abega nai elihelwe Moldekai yulu ya iyo ihisho? Bacha ba oolo bene babele humgilila bamsambile, Hashi yeligililwe. ⁴ Oolo guganine, Nanyi guli ulagala? Haho Hamani gubelehugingila mnda lagala lya hambuga lya ndu gya oolo, gadogome na oolo yulu ya umsundiya Moldekai hegulu ha guya mti gweli mlingeche aala. ⁵ Haho bach ba oolo bamsambile, Loola, Hamani noo guli ho, mgimanyu ha sebule. Oolo gubanine na gabegingila. ⁶ Haho Hamani gugingile. Oolo gumsambile, Gaisilwe ii guya mine oolo gulihuunda umnyemya? Hamani guganine mnda mtima gwage, Mnanyi guya mine gulihuunjwa na oolo unyemiwa uhima nene? ⁷ Bibyo Hamani gusambile oolo, Guya mine oolo gulihubenja umnyemya, ⁸ na gachwilwe na bichwalaganywa bya buoolo byine bili biolobele oolo ubichwala, na falasi gyine gisuchina gee mine, na gachwiiwe sala lya oolo mswe mwage. ⁹ na biya bichwalaganywa na giya falasi gahewe gumwe gwa baya baata ba basolokoto ba oolo guya mine gulingye; bululi gamchwiye guya mine oolo gwaunda ganyemiwe, na umchinya hegulu ha falasi na uhitila ndila gya gyata gya mmbuga, na uta mtambila u mbele wage, ugana, Bibyo noo byigililwa guya mtu mine oolo gwaunda umnyemya. ¹⁰ Haho oolo gumsambile Hamani, Abilo! Guha bichwalaganywa na falasi nahi byawagana, umgilile byoba bibyo Moldekai, Myahudi, gulimshame ha mchango gwa oolo; hashihunguwe inywa yo yose yine yawadogoma. ¹¹ Bibyo Hamani heliguhile bichwalaganywa na falasi, gumchwiiche Moldekai biya bichwalaganywa, gumchininye hegulu ha falasi uhitila ndila gya gyata gya mmbuga, gutele mtambila mbele gyage, Bibyo noo byigililwa mtu guya mine oolo gwaunda umnyemya. ¹² Hanyuma Moldekai gugiwile u mchango gwa oolo. Biino, Hamani gugile abilo u ndu gyage, gwina asusu, na mswe guli guwilwe. ¹³ Haho Hamani gubagombwele Zeleshi na magenda mage mose inywa yoyose yine impashile. Hanyuma batu bage benebali na lwengu na Zeleshi mmachage bamsambile, Uba gugo Moldekai, mine gwawatula ugwa umbele wage, igwa ibushi ya Bayahudi, gogwe ushimmosha, bibyo ugwa wigwa u mbele wage. ¹⁴ Haya hababele hudogoma nage, bagimaninyi ba ndu gya oolo bahiile, bammyiche wa abili wiliwa ya uya na unywa Hamani yine ihiile Ishitele.