¹ Ha masugu matatu Ishitele guchwaleli bichwalaganywa byage bya buoolo, gugimene mnda mmibuga ya mnda ndu gya oolo; nalyo oolo gushamine wiisuba yage ya buoolomnda ndu gya buoolo, gubelemhulola u mchango gwa ndu. ² Haho, oolo helimmonine mmaoolo Ishitele mgimanyu mmibuga, Ishitele gupashile uibu u meeso ma oolo; nage oolo gumgolwele Ishitele lubango lwa nolo lwelibele nalo mmuboo. Bibyo Ishitele gushenine, guudile songo gya lubango. ³ Oolo gumsambile mmaoolo Ishitele, ulihubenja ii? Na ulihusaba ii? Wihewa ata ibaa ya buoolo. ⁴ Ishitele guganine, Oolo gabemona bisoga, na gachwe lino, oolo hamwechi na Hamani, wi iliwa ya uya na unywa yanda mmiila. ⁵ Haho oolo guganine, Mtulumunywe Hamani, yulu igiliye nahi byagana Ishitele. Bibyo oolo na Hamani bahiile wi iliwa ya uya na unywa iya yelihiile Ishitele. ⁶ Haho oolo gumsambile Ishitele haya ha iliwa ya uya na umywa, divai, Ulihusaba ii? Ata ibaa ya buoolo wihewa. ⁷ Ishitele gugaile, na gudogomine, Usaba yandi huenga iyino na yandi husaba iyino, ⁸ Uba nahewa uibu u meeso ma oolo, na nambo oolo gabemona bisoga uupa yandihusaba, na ungitila byandihubenja,na gachwe iyaka oolo hamwechi na Hamani wiliwa ya uya na unywa byandibahiila, na nene niita nahi biya byagana oolo. ⁹ Bibyo Hamani guhumine luya lusugu haho guli na saso na mtima gubungubu; bibyo Hamani helimonine Moldekai ha mchngo gwa oolo, ugana gushihugimana na gushihudanda umbele wage, gugilule na sungu yulu ya Moldekai. ¹⁰ Ata bibyo Hamani gulichibile, gugile undu gyage; gugishile magenda magena Zeleshi mmachage. ¹¹ Nage Hamani gubagombwele mwano gwa ugengeda wa bibya byage, na bwingi bwa baana bage, na bihisho byose byine byahumgilila oolo mnda byose, na byelimginune hegulu ha baata ba basolokoto na bagichi bose ba oolo. ¹² Wa uhima bibyo Hamani guganine, Nage mmaoolo Ishitele gushimgaile mtu gegese hamwechi na oolo wi iliwa ya uya na unywa byelihiile, mnene buchima kaa; ata na mmeshi nago nagiswa nage hamwechi na oolo. ¹³ Ata bibyo byose byingita ii; ihindi yandihumona guya Moldekai Myahudi, guli mshameha mchango gwa oolo? ¹⁴ Haho Zeleshi mmachage gumsambile, na magenda mage mose, na gugechwe mti gwa ulaha wa maboo maumi matano, na mmeshi halwelo wadogome na oolo yulu Moldekai gasundiwe hegulu hago; haho noo holigingila na mimwemwe hamwechi na oolo wi iliwa ya uya na unywa. Biino, iyo inywa Hamani guibenjiche, gugechile guya mti.