¹ Luyalusugu oolo gummele mmaoolo Ishitele ndu gya Hamani, guya amangu a Bayahudi. Moldekai nage gutulile ugila u mbele wa oolo; bululi Ishitele gusibele gwahumsambila byelibele na Moldekai. ² Haho oolo guchulile lupete lwage, lweli msapile Hamani, gummele lo Moldekai. Nage Ishitele gum'biile Moldekai uba ha ihana yine ibele hugila Hamani. ³ Iyaka Ishtele gudogomine na oolo lwendo lwa bubili, gugwile mmagulu mwage, gumtendelele wa byosochi gahunye malanga mabii ma Hamani, Mmagagi, na mihungu gyeluhungile Bayahudi. ⁴ Haho noo oolo helimgolwele Ishitele lubamgo lwage lwa nolo. Haya Ishitele guchuwile na ugimana u mbele wa oolo. ⁵ Guganine, Oolo nambo gwimona bisoga, nene nambo nahewa iubu u meeso mage, na inywa ibemoneya inyemu u mbele wa oolo, nene nabebenjiwa u meeso mage, gigolwe mikanda gya uhanya mikanda gya Hamani mwaana gwa Hamedatha, Mmagagi, gyelisulile na ugigolayulu ya ubachimya Bayahudi bene bali mnda mikoba gyose gya oolo. ⁶ Yulu yai mnaosha umona buubi bwine bwibachwila batu banyi? Na nibaosha ulingamina udigwa wa ibushi yanyi? ⁷ Oolo Ahasuelo gubasambile mmaoolo Ishitele na Moldekai, Myahudi ugana, Loola, nihwile umma Ishitele ndu gya Hamani, nage guhwile umsundiya hegulu ha mti, bululi bubabiile maboo Bayahudi. ⁸ Biino bagolelwe Bayahudi nabo byo byose byine byamulihubenja, wa chinalya oolo; mwabiye na yaala ya lupate lwa oolo, bululi mgolo guhwile ugolwa wa china lya oolo naubiwa yaala ya lupate lwa oolo hashi gunaosha wiisumbula. ⁹ Biino, bagochi ba oolo bagishilwe hoka haya, lusugu lwa maumi mabili ma mwechi gwa butatu noo mwechi gwa Siwani ( Kandamia ); na nahi biya Moldekai byeliganine, Bayahudi bagolelwe, hamwechi na baata ba basolokoto, na baata ba mabuga, na baata ba mikoba utula ibaloo ya Bahindi ndaa na Kushi, mikoba sambi na maumi mabibli na njwii, kila mkoba wa migolo gyage, na kila mmoga wa liidi lyage; na Bayahudi wa mogolo gyabo na wa liidi lyabo. ¹⁰ Gugolile wa china lya oolo Ahasuelo, na ubiya yaala ya lupete lwa oolo, gugihilile mokanda u maboo ma bahichi ba myano, bali bachine falasi, bali bachine nyama cha chihuhu wa abilo chine chibele hugila yulu ya oolo, chine bachibushiche mnda liha lya oolo. ¹¹ Mnd gigyo mikanda gubasambile Mayahudi mnda kila mbuga basumbile na uusa mwego gwabo, wa uchimya na uhaga, na udiga ihichi yose ya batu ata mkoba gwine gwichwa ulwa nabo, hamwechi na baana na baachana; na uguha bibya byabo ubakole ; ¹² lusugu lumwechi mnda mikoba gyose gya oolo Ahasuelo, noo lusugu lwa umi na butatu lwa mwechi gwa umi na gibili noo mwechi gwa Adali ( Ahuhu teba ). ¹³ Mikanda gya ugolwa,nauta mtambila mnda mikoba gyose, gilisambilwe mnda mioga gyose, na u Bayahudi, babe tayali loka luya lusugu uligiwidich buubi wa buubi u tumangu twabo. ¹⁴ Bahichi ba myano bachuwile, bali bachine nyama cha chihuhu uhinga abilo chine chibele hugila yulu ya oolo, na bali hutulumunywa na ulungwa wa alago a oolo; utelwe mtambila uya Shushani ngomeni. ¹⁵ Nage Moldekai guhumine u meeso ma oolo, gubele mchwale bichwaganywa bya buoolo, bya langi lwa ibule na buhisu, gwina sala lyata lya nolo, na ichibabo ya aliliasoga nalangi lya imanjano. Mbuga gya Shushani mubele mdodo, na useelela. ¹⁶ Ho nuba lwenge na saso na useelela na bunyemu wa Bayahudi. ¹⁷ Na mnda kila mkoba, na mmabuga mose, ho hose hene hahiile alago a oolo na mtambilagwage, Bayahudi bamwene saso na useelela, uya na unywa na lusugu lwa ulitucha. Ata batu beengi ba giya sii baligalulile uba Bayahudi, bululi booba bwa Bayahudi bubagingile.