¹ Hanyuma ha bibyo oolo Ahesuelo gumlibyile Hamani mwaanagwa ange abega, Mmagagi, gumsediche, gum'biile isuba hegulu ha baata bose ba basolokoto bene babele hamwechi nage. ² Nabo bgichi bose ba oolo, benebabele hushama ha mchango, bam'bungile machwii na umginamina Hamani, bululi noo biganine oolo wa yulu ya mwano gwage. Haho Moldekai gushiginamine, na ata um'bungila machwii. ³ Baya bagichi ba oolo bene bbele hushama ha mchango gwa oolo bamsambile Moldekai, Buluili bwai goge wanoga alago a oolo? ⁴ Haya, hababele hudogoma nage masugu mose nage gushibahuliche, bamsambile Hamani, yulu ya ulola nambo bihisho bya Moldekai byigimana; bululi gubele m'basambile ugana gee ii Myahudi. ⁵ Haho Hamani helimonine ugana Moldekai gushihuginama na gushi hubunga machwii, guchigililwe abisa. ⁶ Gumonine bishi bisoga umaga wa maboo mage gee mine; bululi bamsambila mmoga gwage Moldekai; wa bibyo Hamani gubenjiche ubahaga Bayahudi bosebene babele bashame hasi ha buoolo bose bugima bwa Ahasuelo, noo batu ba Moldekai bahagwe. ⁷ Haho mwechi gwa gutangi, noo mwechi gwa Nisani, noo (Alengule), mwaa gwa umi na bubili gwa oolo Ahasueli, Batele Puli, noo, luti, umbele wa Hamani, lusugu wa lusugu,na mwechi wa mwechi, ndaa na mwechi gwa umi na gibili noo mwechi gwa Adali (Ahuhu teba). ⁸ Bibyo Hamani gumsambile oolo Ahasuelo, Uli mmoga gumwechi gusaliye na ushama ihana ya haya na haya hawungi ha mioga gyose gyine gili mnda mikoba gyose gya buoolo bobe. Nabo m'bindo gwabo guli gusambuane na m'bindo gwa mioga gyose; na bashihuwasha alago a oolo; wa bibyo bishilingye oolo uhulichana nabo. ⁹ Biino, nambo oolo gwimona bisoga, hagolwe ugana bahagwe; nene nihana talanta uki umi cha lufeza mmaboo mabo bene iyo ihisho, bachibiya mnda lindo lya oolo. ¹⁰ Haho oolo guchulile lupeta lwage uboo, gummele Hamani mwaana gwa Hamedatha, Mmagagi, amangu a Bayahudi. ¹¹ Hanyuma oolo gumsambile Hamani, Buya bumina wabaha, na na batu nabo, ubegila yolihumona isoga. ¹² Biino, bagochi ba oolo bagishilwe, lusugu lwa umi na bitatu lwa mwechi gwa Alengule; na mikanda gigolilwe, nahi biya biganine Hamani byose, wa baata ba basolokoto ba oolo, na baata ba mabuga, bene babele hegulu ha mikoba gyose,na bauulu ba kila mmoga; mikoba gyose wa mgolo gwage, na mioga gyose wa liidi lyage; gigolilwe wa chinalya oolo Ahasuelo, na ubiwa yaala wa lupate lwabe. ¹³ Mikanda gihililwe wa maboo ma bahichi ba myano ndaa na mikoba gyose gya oolo yulu ya ubachimya Bayahudi bose, na ubahaga, na ubadogya, bawalubaga na miungu, baana ba tulela na baachana bose, lusugu lumwechi, noo, lusugu lwa umi na butabu lwa mwechi gwa umi na gibili noo mwechi gwa Adali ( Ahehe teba); na uguha bitundu byabo uba kole. ¹⁴ Mgolo gwa mikanda gya ugya ubo na ubo, nautewa mtambile kila mkoba, gutelwe u mioga gyose babe balilongye lokaluya lusugu. ¹⁵ Bahichi ba mwano bachuwile na bagile abili wa alago a oolo; hatelwe mtambila uya Shushani ngomeni. Oolona Hamani bashamine yulu ya unywa divai; haho mbugagwa Shushani gigingile iduba.