¹ Hanyuma ha bibyo, sungu chage oolo Ahasuelo hachisalile, gummengeleche Vashiti, na biya byeligilile, na biya byine biganinywe yulu yage. ² Haho bagichi ba oolo bene babele humgilila bamsambile, Oolo na gaengelwe binyundu mahungwe ma misiha; ³ nage oolo gabiye bagimaninyi mnda mikoba gyose gya buoolo bwage, bululi baongolwe hamwechi binyundu bya mahungwe misiha gyose baagye Shushani ngomeni, u ndu gya baachana mmaboo ma Hegai, mgimaninyi gwa ndu gya oolo, guya guusa baachana; iyaka gahewe bitundu bya ulitogola. ⁴ Guya msiha gwine gwelibenja oolo na gabe mmaoolo hanyuma ha Vashiti, Iyo inywa oolo guibenjiche, nage gugilile bibyo. ⁵ Bibyo habele na Myahudi gumwechi uya Shushani, ngomeni; china lyage Moldekai, mwaana gwa Yaili, mwaana gwa Shimei, mwaana gwa Kishi, gwa mmoga gwa Benyamini; ⁶ mine guwashilwe kole uhuma Yelusalemu hawingi ha bahambwa bene bawashilwe kole hamwechi na Yekonia, oolo lya Yuda; mine Nebukadleza oolo lya Babeli gumguhile. ⁷ Nage noo gummominye Hadasa, noo Ishitele, mwaana gwa mmwabo, bululi gishi na sage na gushi na mnage. Nago guno msiha gubele itimba ibenju nayenyi isoga; na habawile ba sage na mnage, guya Moldekai gumguhile uba msiha gwage. ⁸ Bibyo helihuliche alago a oolo na mtambila gwage, bawamisiha beengi basumbile uya Shushani ngomeni mmuboo wa Hegai; Ishitele nage gugingichwe mnda ndu gya oolo, mmuboo wa Hegai mine gusuusa baachana. ⁹ Guya msiha gubele m'benju u meeso mage, guhelweyano uhuma weli; nage gummele abilo bibya bya ulihahacha nabyo, hamwechi biliwa byage, bagichi ba baachana bene bali kiine gyage, ba mndu gya oolo. Iyaka gum'bulule gee na bagichi bage ba baachana gubabiile ihana ya isoga mnda ndu gya baachana. ¹⁰ Haho Ishitele gushimanyiye abila mmoga gwage ata na ibushi yage, bululi noo bimlagile Moldekai bashibamanye. ¹¹ Na guya Moldekai gubele huenena kila lusugu u mbele wa lagala lya ndu gya baachana, bululi gamane bilihushama Ishitele, na biya byine byigiliya weli. ¹² Haya hawilile mengo ma gumwe msiha gagingile wa oolo Ahasuelo, haho gwahuhwa ugililwa ulamana la m'bindo gwa baachana myechi umi na gibili; noo, byamiwilile masugu mabo ma uhahachiwa, myechi mtuba gya mauta na manemane, myechi mtuba gyamalashi na bibya bya uhahachiwa wa baachana; ¹³ Msiha gusugungila bibyo wa oolo; yoyose yelisaba gusuhewa yugya nayo isuhuma mnda ndu gya baachana bululi bwa ugingila mnda ndu gya oolo. ¹⁴ Gusugya igolo naugiwila halwelo mnda ndu gya bubili gya baachana, mmaboo ma SHaashgazi, mgimenyi gwage oolo, mine gulihuusa bagichi ba mgilo bene basili baachi. Gugo gushigingila iyaka wa oolo, wa uba oolo gwammunda gabe mmachage, nage gwigiswa wa china lyage. ¹⁵ Na hamahiilemengo mage Ishitele, msiha gw Abihaili, mmwabo gwa Moldekai,minegweliguhileuba msiha gwage, yulu gagingile wa oolo, gee gushisabile atu, biya ka bilagilwe na Hegai, mgimaninyi gwa oolo, guya gusuusa baachana. Nage Ishitele gubele na iubu u bose bene bammonine. ¹⁶ Bibyo Ishitele guhililwe wa oolo Ahasuelo, mnda ndu gy buoolo, mwechi gwa umi, noo mwechi gwa Tebethi, ( Aungu ) mwaa gwa njwii gwa uhyilia wage. ¹⁷ Oolo gum'bendiche abisa Ishitele uhima baachana bose, nage guhelwe keene na uibu u meeso mage uhima binyundu binge byose; haho guchwiiche sala lya buoolo mswe mwage, gummitile uba mmaoolo hanyuma ha Vashti. ¹⁸ Bibyo oolo guitile baata ba basolokoto bage biliwa na byunywa biingi na bagichi bage, noo, biliwa na byunywa bya Ishitele; guitile uleelela mnda mikoba gyage gyose, guhanene mmaso ulamanana ugaa batu wa oolo. ¹⁹ Haho binyundu habisumbile lwendo lwa bubili, Moldekai gubele mshame ha mchango gwa oolo. ²⁰ Ishitele gubele gushinamanyia ibushi yage ata mmoga gyage, nahi biya Moldekai byelimlagile; wa bululi Ishitele gubele m'bwashe ulaga wa Moldekai, byokabiya nahi byeliuchiwe nage. ²¹ Ha maya masugu, Moldekai helibele hushamau mchango gwa oolo, gwa bubili gwa bagimenyi ba oolo, Bigthana na Teleshi, buuhemba ha mchango, bachigililwe, batagile ummilila mmaboo oolo Ahasuelo. ²² Haho Moldekai guhuliche mwano gwa iyo ihisho, nage gumsambile Ishitele, mmaoolo; nage Ishitele gumsambile oolo gugo mwano wa china lya Moldekai. ²³ Na iyo ihisho hailolilwe, na winene umoneye, babo batu babili basundiwe hegulu u mti. Bibyo nabyo bigolilwe mnda itabo ya masugu mamwechi u mbele wa oolo.