¹ Na wa yulu ya bibyo byose, nibiile mnda mtima gwanyi yulu ya ubienge-enge bino; yulu mine gwina kiine, na mine gwina lwengu, hamwechi na bigilanywa byabo byose, bali mnda uboo wa Abetcha; uganaluundo, ao ugana uonywa, mtu gushgidi; bikoko byose byababanga. ² Bikoko byose byababanga bose lulingo lumwechi; hali ihisho imwechi wage guya mine gwina kiine na wa guya mine gushi nakiine; wa mtu msoga na wa mtu msone; wa mtu mmaha na wa mtu gushi gwa mmaha; wage guya gutangila lutangi na wa guya mine gushihutangila lutangi; nahi bili msoga noo bili mtu gwa buubi; guya gusulaha pa na guya mine gususina ulaha pa. ³ Mchibo naiguli mnda bikoko byose bisugilwa hasi ha chuba, m yugana bose bali na byugiliya mmoga gumwechi; ehe, wa uhima bibyo, mitima gya batu giligigiluchu usona, na miiha gilimo mnda mitima gyabo mengo mabili na mwego, na hanyuma nuugya uuwa. ⁴ Bululi hili maudagilo wa guya gwahulichana na bose bene bali na mwego; ( yulu halingye aawa ali namweguuhima tambwe gya giube); ⁵ Bululi bene bali na mwego bagidi ugana biiwa; alakini baabu bashidi inywa yo yose, nabashi na alambwe iyaka; yulu kengelecho gyabo gyagibililwa. ⁶ Luundo lwabo na uuonywa wabo, na masulumanya mabo, byachimiona byose hamwechi; na bashi iyaka na ibaa mnda ikoko yo yose yine ilihugiliya hano hasi ha chuba. ⁷ Gogwe ugye lobe, uuye liwa yobe wa saso, uunywe malwa mobe wa mtima gwa usasamiwa; yulu Abetcha gwahuhwa ugitabicha migilo gyobe. ⁸ Bichwalaganywa byobe na bibe bihaha masugu mose; na mswe gobe gushihulwe malashi. ⁹ Ushame na saso hamwechi na mmachobe mine gosuunda, masugu mose ma mwego gobe gwa bunene, mene molihelwe hasi ha chuba; masugu mose ma bunene bobe, yulu bubu m yiiba ya mwego gobe; na wa yulu ya ususulwa obe ulisusulilwe hano hasi ha chiba. ¹⁰ Yo yose yine uboo wanyi usimbile uiiita, uiite wa uoma obe; yulu ushi mgilo, ata lango, ata malango ata lwengu, uya usinda oligya gogwe. ¹¹ Nugiwile, naumona hasi ha chuba, ugana bashi bene bali naabilo basuhimana u maacha, na bashi bene bali na uoma noo bausuhimana u bita, na bashi bene bali na lwengu basuba na iliwa, na bashi batu bene bali na malanga noo basuba ma bitundu, na bene bali na bwino basuba na ugegaminywa; alakini mengo na bahali bisubabanga bose. ¹² Bululi mtu nage gushibamana mengo mage; nahi swii byagisuwaswa mnda bwila bwa gugugichu, na mlingilisho gwa tunonyi tulihuwaswa mnda magochi wa usabutuwa. ¹³ Iyaka nimonine lwengu hasi ha chuba, nalo luli nahi bino, iyaka wanyi nene bimoneye uba m yiinywa yaata. ¹⁴ Habele na mbuga gya gichi-gicho, na batu mnda mwagyo babele bacho; guchwile oolo mmata wagili, gugichingiluwe gugubae mahuo mata yulu ya ugilwa. ¹⁵ Bibyo, hamoneye mmo mtu mbuchu mine gwina lwengu, nage wa lwengu lwage gugimonine giya mbuga alakini ata bibyo hashibele ata na mtu ge gese mine gummengeleche guya mbuchu. ¹⁶ Bibyo niganine, Bilingye lwengu uhima uoma; alakini lwengu lwa mbuchu lusunenunywa, na binywa byage bishibahulichiwa. ¹⁷ Binywa bya bene bali na lwengu byine bisudogomwa wa lingililo bisuhulichiwa, Uhima uhugumba wage guya mine gusihyilila bahugi. ¹⁸ Lwengu noo lusoga uhima tulumegela twa bita, alakini ngila biibi gumwechi gusugugicha busoga bwiingi.