¹ M nanyi guli nahi mine gwina lwengu; Nage m nanyi gugidi ulangulula inywa? Lwengu lwa mtu lusumgemya yeenyi yage, Na ugumagala wa yeenyi yage usugaluwa. ² Nene nagana bino, Uuse alago a oolo; na bibyo yulu ulahilapa wa Abetcha. ³ Ushiite abilo ugya u mbele wa yeenyi yage; ushigililikle uita bya bigugichu; bululi gee gusuita yo yose yine yelihuunda. ⁴ Bululi inywa ya oolo yinauoma; nage m nanyi gunaosha umsambila gugo, Ulihuita ii? ⁵ Guuwasha alago gushimana inywa ya igugichu; Na mtima gwa mina gwina lwengu gusumana mengo ma uonona. ⁶ Bululi wa lando lyo lyose hali uonona; wa ibalo ya adugwa a mtu ene ali hagulu hage m yaata. ⁷ yulu gushigidi yine ibiho; yulu m nanyi gunaosha umsambila byine bibiho? ⁸ Hashi nine gwina uosha yulu ya luhuda gachibile luhuda; Na gushi na uhyilila yulu ya lusufgu lwa uuwa; Na hashi guna sambilwa yulu biya bita; Na ata usona ushimmogono na guya mine gushi mmuolobele. ⁹ Bikoko bibyo byose nibimonine, nibiile mtima gwanyi mnda migilo gyo gyose gigililwe hasi ha chuba, Hali mengo mene gumwe mtu gumwechi guli na uhyilila yulu ya miinage wa sungu chage. ¹⁰ Iyaka nimonone osona wachiwa, nabo bahiiya u sinda; iyaka bene bagilile bisoga bahuma ha hahaha, nabo bagibililwa m mbuga. Bibyo nabyo m bunene. ¹¹ Bululi uonona hegulu ha igilanywa ya iibi ishihugilwa abilo, mitima gya batu gigimanine mnda mwabo yulu ya ugila bisone. ¹² Inangwa mine gwina buubi gwagila bisone nyendo sambi, gabebucha masugu mage; alakini ata bibyo nigidi chigilwe ugana bibi luhanga lusoga uli baya balihumnyemya Abetcha, mine guli na iuli u mbele wage; ¹³ Alakini lushibi luhanga lusoga u basone, na gushibucha masugu mage, mene mali nahi ichuli chuli; bululi gushi na iubu u mbele wa Abetcha. ¹⁴ Hali bunene bwine buli hugiliya hegulu ha sii, ugana hali bene bali na kiine nabo bagigila nahi migilo gya benebali na kiine, nene niganine bibyo nabyo m bunene. ¹⁵ Hanyuma nitonine saso, bululi mtu gushi na inywa yo yose yine ili isoga hasi ha chuba, uhima uuya na uunywa, na uina; na ugana iyo ishame nage mnda bu mbona bwage, masugu mose ma mwego gwage melihelwe na Abetcha hasi ha chuba. ¹⁶ Nene handibiile mnda mtima gwanyi yulu yumana lwengu, na ubumona bugichi bwine bugililwe hegulu ya sii, (yulu hali gishibamona tuulo mnda meeso mage chuba na busugu); ¹⁷ bino, nimonine migilo gyose gya Abetcha, yulu gishichimiwa na mtu migilo giitilwe hasi ha chuba; bululi mtu gabelidegya ulamana na byelihuosha ubienga, ata bibyo gushibimona; ehe, uhima bibyo, mine guli na lwengu inangwa gunalanga gwibimana, alakini gee gushiosha ubimona.