¹ Hanyuma nigiwile na umona lugugicha lose lwine lulihugiliya hasi ha chuba; na loola, byosochi byabo bene basapilwe, bene bashi na mmungya; na luubi lwa baya bene basapene ubele na uosha, alakini baya bashibele na mmungya. ² Wa bibyo nibtonine baabu benebahwile uuwa uhima bene bali na mwego bene bili na poo; ³ ehe, wa uhima babo bose nimgitile luhanga lusoga gee guya mine gishibaho, mine gushimonine bibiibyine bilihugiliya hasi ha chuba. ⁴ Iyaka niengeleche bikoko byose, na migilo gya bwino, ugana gisuhuma wa mtu uhimana na miinage. Bibyo nabyo m bunene nanlilisha mnaga. ⁵ Mmugi gusubunga maboo mage. Nage gusuya iliwa yage ya bulema; ⁶ Luhanga lusoga hamwechi ya ganda limwechi lya usengemena, Uhima maganda mopi hamwechi na asusu; na ulilisha mnaga. ⁷ Hanyuma nigiwile iyaka, na umona bunene hasi ha chuba. ⁸ Hali mtu mine guli gee buchima, na gushi n gunge gwa bubili, gushi na mwaana na gushi na mshiwabo; ata bibyo migilo gyage gishi na isula, na meeso mage mshihugyuta bu mbona, Bino, gwagana, m wa yulu ya nanyi nihugila mgilo, na uligima ichuli chuli yanyi ya mwego bisoga? Bibyo nabyo m bunene, ehe, m yasusu aata. ⁹ M bisoga uba babili uhima gumwechi; Bululi bihewa alambwe a mgilo gusoga gwabo. ¹⁰ Bululi babegwa, gumwe gwabo gwimginuna miinage; alaki luganga lubi wage guya guli gee buchima bwage gabegwa, na gushi na gunge gwa umginuna! ¹¹ Iyaka babili babelala hamwechi, haho bipata aahya; alakini gumwechi mine guli gee buchima ka gunaosha wii umona aahya? ¹² Na wa bibyo mtu gumaosha ummima guya mine guli gee buchima, babili bimmima; na ata mguchi gwa mishinga gitatu gushibautuwa abilo. ¹³ Luhanga lusoga wa mmwalubaga mbuchu mine gwima lwengu Uhima mmungu gwa oolo guhugi. ¹⁴ Wa bululi uhuma u m'bulogo guchwile ihyilila, ehe, ndaa na mna buolo bwage gubutilwe mnda mishaminyi gya bu mbuchu. ¹⁵ Nimonine bose bene bali na baluhugyta hasi ha chuba, ugana bahulichane na guya mmwalubaga, guya gwa bubili mine gugimanine hanyuma ha guya. ¹⁶ Bashibele na isula babo batu bose, babo bose bene belibele hegulu habo; alakini ata bibyo baya bali humlama hanyuma hage bashimseelela, chigilwe bibyo nabyo m bunene, na ulilisha mnaga.