¹ Wa bikoko byo byose byina mengo mage, Na mengo na ikoko yo yose wa lango lyage hasi ha gulu. ² Mengo ma ubuswa, na mengo muuwa; Mengo ma uuna na mengo ma uchula; ³ Mengo ma uuwa, na mengo muhonya; Mengo muubele na mengo mugubaa. ⁴ Mengo mulila, na mengo museya; Mengo mubiya malilo, na mengo muina. ⁵ Mengo mutela mawe; na Mengo musumbicha mawe; Mengo muumbatila, na mengo mashi muumbatila. ⁶ Mengo muenga, na mengo muuchiminya; Mengo muubiya, na mengo mutela. ⁷ Mengo musambula, na mengo mushona; Mengo mushama pii, na mengo mudogoma; ⁸ Mengo muunda, na mengo muuonywa; Mengo ma bita, na mengo ma talala. ⁹ Wi wii! Mgichi gwina alambwe nai na biya byine byelihulidegya nabyo? ¹⁰ Nimonine asusu ahelwe batu na Abetcha, yulu ya ususuwa mnda mwao. ¹¹ Ibya yo yose guiitile isoga wa mengo mayo; iyaka guibiile milumbu mnda mitima byabo; alakini m wa ndila giya mtu gushinaosha ubisula mgilo gwa Abetcha gwelihugila, utula ubutulilo ndaa na wisula. ¹² Nene nigidi ugana hashi isoga wabo uhima useelela, na uita bisoga batu bali huhaama. ¹³ Iyaka m bumana bwa Abetcha mtu ge gese gaoshe uuya na uunywa, na ulihocha wa bisoga mnda migilo gyage gyose. ¹⁴ Nigidi ugana mgilo go gose gwelihugila Abetcha gwishama milumbu; bishi nawechegana ubucha itu, na uhungula itu; nage Abetcha gubiitile yulu batu mamnyemye gee. ¹⁵ Biya byine biliho; na bibyo byine byichwa bihwile ubaho; nage Abetcha gusubyenga iyaka bikoko byine bihwile uhita. ¹⁶ Wa uhima bibyo, nimonine iya hasi h chuba ugana, Ihana yine ili uonona hali usona, Na ihana yine ili kiine noo hali busapanyi. ¹⁷ Niganine, mnda mtima gwanyi, Abetcha ionona bene bali na kiine na bene bashi na kiine; bululi hali mengo uno wa lango lyo lyose wa mgilo go gose. ¹⁸ Niganine mnda mtima gwanyi, Na wa yulu ya batu, yulu Abetcha abatonde, nabo bamone ugana boo bene bali bahwanane na nyama. ¹⁹ Bululi byine bilihubabanga batu noo bili huchibanga nyama; ihisho imwechi yababanga; bisuuwa gugu noo bisuwa gugu; ehe, bose bina luhuda lumwechi; ata mtu gushi na itu ya ugihima nyama; bululi byose m bunene. ²⁰ Bose basugya ihama imwechi; bose busuhuma mnda ihwili; ndaa na wihwili gusugiwila iyaka. ²¹ M nanyi gugidi ugana luhuda lwa mtu lusugya ha gulu, nambo luhuda lwa nyama lusugya hasi? ²² Bibyo nimonine ugana hashi ya isoga uhima mtu useelela migilo gyage, wa ibalo ino noo ibaa yetu; bululi m nanyi gwimgiwicha iyaka yulu gamone byine byimlama hanyuma.