¹ Nugusambile mtima gwanyi, Bino, niutonda wa ndila gya saso bino uliseelele wa byugema, na loola, bibyo nabyo nuuba bunene. ² Nidigomineyulu ya mimwemwe, M miishi; na yulu ya saso, Byiita ii? ³ Mnda mtima gwanyi nidindile yulu ya uhocha m'bili gwanyi na malwa, na (mtima gwanyi gwili hunombwela wa lwengu) ndila gya uwhambana na buhugi, ndaa na byandimona bya misa bibalingye batu, yulu babiite bibyo hasi ha gulu masugu mose ma mwego gwanyi. ⁴ Niliitile migilo gyine gili gya gyata, niligubaile ndu; niliunine mabala ma mizabibu. ⁵ Nililimine lubala na tubooboo, na uuna mmo miti gyine gisuhaa biguma bya mioga gyose; ⁶ Nilidabile ishimaya maadi, ma unywisha isowa ya yuunywe miti gya gichogicho. ⁷ Nene nigulile bacha na bacha ba baachana, nibele na bene babutilwe mna ndu gyanyi; iyaka nibele na bitundu biingi bya ng'ombe na myoo, uhima bose bene batangile uba mnda Yelusalemu. ⁸ Iyaka, niliongwele lusuu na nolo, na mmaso gwa buolo na gwa uhuma u mabuga mamata. Niliengele bagimbi, balumyana na baachana,nabo baya bene balihuseelelwa na batu, baachi banyi ba bacha beengi. ⁹ Haho nibele mmata, nigililile uhima bose mnda Yelusalemu; iyaka lwengu nishamine nalo. ¹⁰ Na nishimagimine meeso manyi yo yose yamasimbile; na nishiguchibile mtima gwanyi wa saso lyo lyose; bululi mtimagwanyi guseelele wa ibalo ya migilo gyanyi gyose, nanino ibele ibaa ya yanyi mnda migilo gyanyi gyose. ¹¹ Hanyuma nigilingamine migilo gyose gyine giitilwe na maboo manyi, na asusu ose ene andisuswile mnda ugiita; na loola, byose m bunene na ulilisha mnaga, na alambwe ashiho hano hasi ha chuba. ¹² Nigaluwe yulu ya ubagulanya lwengu, na miishi na buhugi. Bululi mtu mina gulihumlama oolo gaite wii? Iyo nayo ihwile uiswa. ¹³ Bibyo haho nimonine ugana lwengu m luhima buhugi, nahi bili lwenge uhima mdoo; ¹⁴ meeso mage mine gwina lwengu maliu mswe gwage, alakini mmugi gusugyata mdoo; alakini ata bibyo nimanine ugana m yihisho imqwechi ya isula isubabanga batu bose lulingo lumwechi. ¹⁵ Nidogome mnda mtima gwanyi, Nahi isuum'banga na mmugi, noo byayimanga na nene; bino, yulu yai nabe na lwengu lwingi? Niganine mnda mtima gwanyi uba bibyo byose m bunene. ¹⁶ Bululi hashi kengelecho gya milumbu gya guya gwa lwengu, na gya mmugi; wa ibalo masugu menemiochwa basibi bahugibiliwa. Na guya gwa lwengu byesuwa byoka biya nahi mmugi! ¹⁷ Bino, nionywine mwego; wa ibalo mgilo gwine guli hugiliya hasi ha chuba bibele bigugichu wandi; noo bikoko byose m bunene. ¹⁸ Nene nionywine migilo gyose gya maboo manyi gyandiliiminye nagyo hano hasi ha chuba; bululi bilingye nene umshigila guya mine gwindama. ¹⁹ M nanyi gugidi ugana gugo gubi na lwengu ao gubi mmugi? Ata bibyo gwihyilila hegulu ha migilo gyanyi gyose gyine byandiliiminye nagyo, gyine mnda mwagyo nene nimoninye lwengu hasi ha chuba. Bibyo nabyo m bunene. ²⁰ Wa bibyo nigaluwe ugeda maudagilo mnda mtima gwanyi yulu ya migilo gyanmyi gyose gyandiliiminye nagyo hasi ha chuba. ²¹ Bululi hali mtu mine migilo gyage m gya lwengu, na gya malango, na wa bwino, nage gwimshigila mtu guya mine gushilidegiche nagyo ata wa ibaa yagyo. nabyo m yadungu guba. ²² Bululi mtu gusumona ii yulu yai migilo gyage gyose, na yulu ya bichigililwa byage bya mtima gwage byelilidrgiche hasi ha chuba. ²³ Bululi masugu mage mose m yunyogwa, ehe, ata m'busugu mnda mtima gwage mushi talala. Bibyobyose m bunene. ²⁴ Mtu gushi bamona ya isoga uhima uuya na unywa, na uhocha luhuda lwage wa misa mnda migilo gyage. Bibyo nabyonimonine ugana bisuhuma mnda uboo wa Abetcha. ²⁵ Bululi m nanyi mine gunaosha uuya na uhocha mtima gwage upima nene? ²⁶ Bululi gusuumma guya mine gwagaha lwengu na malango na saso; mndi mlubi gusumma asusu. Yulu ya uongola na utela, gaoshe uumma guya mine gweliha. Bibyonabyo m bunene na ulilisha mnaga.