¹ Alago ano andihuusambila lino wiausa, wiagila, mwaoshe uhamaa na ubula, na ugingila mnda giya sii gyine Mlume gyelibahale bamasenyu; benywe mwigihyilila. ² Gogwe wiengelecha ndila biya gyine Mlume, Abetcha obe gyeliugolwele Gino myaa maumi mana mnda lwanaganywa, Yulu gunenune, guutonde gamane byine bili mnda mtima gobe, ugana nambo wiusa alago age, ao nangu. ³ Guuhimine, guuleile umone ndala, guulishiche na mana, gyoshigidi gogwe ata bamasobe bashigimanine; yulu guumanye ugana mtu gushuibahamaa wa mkati ka, mndi gusuhamaa na yo yose yine usuhuma mnda anywa a Mlume. ⁴ Bichalaganywa byobe bishisambwile, na ata ugulu obe ushibimbile, gigyo myaa maumi mana. ⁵ Gogwe uengeleche mnda mtima gobe, ugana nahi biya shibana byesummambila mwanage, noo Mlujme, Abetcha obe, byeli huuambila. ⁶ Gogwe uuse alago a Mlume, Abetcha obe, waoshe ugyata mnda madila mage, na umnyemya. ⁷ Bululi Mlume, Abetcha obe, gwiugingicha mnda sii gya gisoga, sii gyine gyina bichiba bya maadi, na misula, na bishima, bisisiluwa mnda bibetabeta na u koono; ⁸ sii nya mabele na mipunga, na mizabibu, na miti, na machungwa, na mizeituni gyine gyina mauta, nqa bui; ⁹ sii gyine gyoliya mo mikati, ushi wa ususuwa, ushihungwilwa na ibya yo yose mwagili; sii gyine mawe magyo m bigela, na koono chage chisudabwa mmubo. ¹⁰ Na gogwe wiiya ugyute, wimtona Mlume, Abetcha obe, yulu ya sii gisoga gyeliuhele. ¹¹ Ube lwenge lulume, ushichwe umgibililw Mlume, Abetcha obe, wa nangu uusa alago age, na m'bindo gwage, gwandihusambila lino. ¹² Lingamine, holibi wahuuya na ugyuta, na ugubaa madu mabenju na ushama mwamali; ¹³ na migoma gyobe gya ng'ombe na gya miyoo hagyibula, na lusuu lube na nolo chobe hachibula, na bibya byose byine byoli nabyo habyibula. ¹⁴ bino haho naho mtima gobe gushiginyuwe, wamgibilile Mlume, Abetcha obe, mine guuhuminye mnda sii gya Misili, mnda ndu gya bucha; ¹⁵ mine guugolwele mnda lwanaganywa luya lwata lwa ubabulana, lwine luli na madowa maahya na ngelengele, sii gya yuma gyine gishi na maadi; gyeliuhuminye maadi u huo lya ligumu, ¹⁶ guulishiche mlwanaganywa na mana, bamasibe bashigimanine; yulu gunenune, guutonde, na wisula yube gugilile bya yano. ¹⁷ Haho ushidogome mnda mtima gobe, Uoma wanyi, na uosha wa uboo wanyi noo upele bino bitundu. ¹⁸ Bino wammengeleche Mlume, Abetcha obe, bululi noo gusuuha uoma wa uba na bitundu; yulu gamaite malagano mage melilagene na bamasobe, nahi bino lino. ¹⁹ Alakini nambo wimgibilila Mlume, Abetcha obe, na utugila tunge tubetcha, na utugilia, na ututangila, nihum'bangisiya lino ugana hashi adigwa mwichuimiwa. ²⁰ Nahi biya mioga giya gyine Mlume gyelihuchimya u meeso menyu, byoka biya mwidigwa; bululi mushibanjiche uhulicha liidi lya Mlume, Abetcha enyu.