¹ Mlume, Abetcha obe, heliubiya mnda sii gyolihugila ugihyilila, helichula mioga gingi gihume u mbele obe, Mmiti, na Mgilgashi, na Mmamoli, na Mkanaani, na Mpelizi, na Mhivi, na Myebusi, mioga njwii gya gyata gyine gili na uoma uuhima gogwe; ² haho Mlume, Abetcha obe, heligya u mbele obe ulwa nabo, na gogwe wilwa nabo; mamo mengo noo holibahonya abisa; nangu uhulichanya nabo, na nangu ubamonena misa; na nangu ugondana nabo. ³ msiha gobe ushiguhe mlume, ata mmwalubaga gobe ushiguguhile mlume msiha gwage. ⁴ Bululi gwimmugicha mmwalubaga gashindame, yulu baatambikile tunge tubecha; haho noo sungu cha Mlume hachilama yulu yenyu, nage gwiuchimya wa abilo abisa. ⁵ Alakini bagililwe bino; mubundule butambikilo bwabo mugwishe bihanda byabo, mugwishe maashela mabo, chigiwe wa aahya miishi gyabo gya ubada. ⁶ Bululi gogwe uli mmoga guhaha gwa Mluje, Abetcha obe; Mlume Abetcha obe, guusobole ube batu bage, uhima mioga gyose gyine gili hegulu han yenyi ya sii. ⁷ Mlume gushimmundile benywe, ao gushimsobole benywe, wa ibalo m'bele bengi uhima mioga gyose, yulu m'bele bacho uhima batu bose. ⁸ mndi m wa ibalo Mlume gulihummunda, na wa ibalo gubenjiche gawiliche ulaha pa wage welilahile pa bamasenyu, noo ibalo Mlume gummuminye na uboo wage wa uoma, gummogonone uhuma mnda ndu gya bucha, mnda uboo wa Falao, oolo lya Misili. ⁹ Bino manywe ugana Mlume, Abetcha enyu, noo Abetcha; Abetcha aawilile, gusuwasha malagano magena uleelela wage uli bene balihummunda, na uusa alago age, ndaa na bibushi uki; ¹⁰ nage gusubaha bene basummonywa u mbele wa byenyi byabo, ubachimya. Gushibi lebelebe wage mine gusummonywa, gwimma u mbele wa yenyi yage. ¹¹ Bino uuse alago, na m'bindo, na uonona wandihuusambile lino, wabyiite. ¹² Na habi, wa ibalo mwahulicha uno uonona, na uusa na uugila, bibyo Mlume, abetcha obe, gwiuwilidicha malagano ma uleelela welibalahile pa bamasobe; ¹³ nage gwiuunda na uuhaliola mihaa na uubucha iyaka gwihalila mihaa ibushi ya gumo lyobe, na ibushi ya sii gyobe, biliwa byobe na ibugu yobe, na mauta mobe, bisuganywa bya ng'ombe chobe, na myoo gyobe gya gicho-gicho, mnda sii gyelibalahile pa bamasobe ugana gwibaha. ¹⁴ Wihalilwa mihaa uhima mioga gyose; hashibi mlumyana ao mmachana guli igimba hawingi henyu; ata u nyama chenyu cha usugwa. ¹⁵ Na Mlume gwiuhuminya bisumi byose; na gushibiya oli mitongo gyo gyose giibi gyoligidi gya Misili, alakini gwigibiya hegulu habo bose bene bali huuonywa. ¹⁶ Gogwe chimya mioga gyose gyine gyiuha Mlume, Abetcha obe; liiso lyobe lishibamonene misa, na ushigilile miishi gyabo; bululi iyo ikoko ibi m gochi oli. ¹⁷ Na gogwe ubegena mnda mtima gobe, Mioga gino m gingi upima nene; niosha wi ubahunya m bihana byabo? ¹⁸ Ushibamone booba; ummengeleche abisa Mlume, Abetcha obe, byelimgilile Falao na Misili gyose. ¹⁹ Uengeleche uya utonda wata wine umonine meeso mobe, na biya bisaga, na bigagicha, na uboo wa uoma, na uboo wa ugolobu, weliutobolile nao hambuga Mlume, Abetcha obe; noo byelibaita Mlume, Abetcha obe, mioga gyose gyine gyoli humona booba. ²⁰ Iyaka Mlume, Abetcha obe, gwihila lulago hawingi habo, ata giya mihona, gyine gyilibisa, bahagwe u mbele obe, ²¹ Ushigingilwe na iduba yulu yabo; bululi Mlume, Abetcha obe, guli hawingi hobe, Abetcha a ata, ene asusinywa. ²² Nage Mlume, Abetcha obe, gwigitele hambuga giya mioga u mbele obe lemba-lemba; bishilingye ubachimya lwendo lumwechi, nyama cha mgala chishichwe uubulila. ²³ Haho Mlume, Abetcha obe, gwibahunya u mbele obe, gwibabiya adugwa, adugwa aata, ndaa na byabihwa uchimiwa bose. ²⁴ Na maolo mabo gwiubiila bo mmaboo mobe, na gogwe wichiminya machina mabo lihume hasi ha gulu; hashi mtu mine gwiosha ugimana u mbele obe, ndaa na btyolihwa ubachimya bose. ²⁵ Miishi gya ubachwa na tubetcha twabo mwutuchigya na aahya; ushisimbe lusuu ao nolo chine chili wabo, na ushichiguhe chibe chobe ushichwe uwaswa nacho; bululu m byuchigilicha wa Mlume, Abetcha obe; ²⁶ na byuchigilicha ushibibiye mnda ndu gyobe, ushichwe gugwe mlingilisho gwa ibya ishi isoga, uionywe abisa; na uihanya abisa; bululi m yibya ihanyiwe abisa.