¹ Musa gugitile Isilaeli yose, gubasambile, Yenywe Isilaeli, hulichiwe alago na uonona byandihigana m matu menyu lino, muoshe uligigya na uloola ubigila. ² Mlume, Abetcha etu, guitile malagano netu haya Holebu. ³ Mlume gushiitile mano malagano na bamasetu, m na beswe, noo, beswe bene baliho hano twili na mwego. ⁴ Mlume gudogomine nenyu yenyi wa yenyi u loono, uhumina hawingi haahya; ⁵ (na nene maya mengo nigimene hawingi ha Mlume na benywe, yulu ya uummonya inywa ya Mlume; bululi, mumonine booba bwa aya aahya, na mushiselile u loono); nage guganine, ⁶ Nene noo Mlume, Abetcha obe, mine guuhuminye mnda sii gya Misili, mnda ndu gya bucha. ⁷ Ushibe na tubetcha tunge nambo nene ka. ⁸ Ushiliitile miishi gya ubada, mlingilisho gwa ibya yo yose yine ili ha gulu, ao yine ili hasi ha ino ibaloo, ao yine ili mmaadi hashi ya sii. ⁹ Ushibiginamine ao ubigilila; bululi nene Mlume, Abetcha obe, nili Abetcha ali na buwa, nisulipisha baana usona wa bamasabo; ndaa na ibushi ya butatu na ya buna ya bene basukonywa. ¹⁰ nene nisuleelela mauki uki bene basukunda, na uusa alago anyi. ¹¹ Ushililumbule benene china lya Mlume, Abetcha obe; bululi Mlume gwim'bala uba na abachi, mtu mine gwililumbula china lyage bunene. ¹² Luuse lusugu lwa Sbato uluhahache, nahi Mlume, Abetcha obe, byeliusambile,. ¹³ Masugu mtuba ugile mgilo, uhishe bihisho byobe byose; ¹⁴ alakini lusugu lwa njwii m Sabato gya Mlume, Abetcha obe; lulo lusugu ushigichi mgilo go gose, gogwe, ata bawalubaga bobe, ata misiha gyobe, ata ng'ombe chobe, ata punda chobe, ata nyama chobe cho chose, ata mgenyi mine guli ha mchabgo gobe, yulu mgichi gobe gwa mmachana na mcha gobe balituche byoka biya nahi gogwe. ¹⁵ Gogwe uengeleche ugana ubele mcha mnda sii gya Misili, na uga Mlujme, Abetcha obe uuhogonone uya wa uboo wage wine uli na uoma, na uboo wa ugololwe; wa iyo ibalo Mlume, Abetcha obe, uusambile uuse Sabato. ¹⁶ Ubanyemye sobe na mnobe; nahi Mlume, Abetcha obe, byeliusambile, masugu mobe mabe mabuchu, na gogwe waoshe ugililwa mnda sii gyolihewa na Mlume, Abetcha obe. ¹⁷ Ushihagane. ¹⁸ Ushyite masei. ¹⁹ Ushigibe. ²⁰ Ushim'bangisiye m'binji nobe bya lulimi. ²¹ Ushibe na itima u mmachi gwa m'binji nobe; na ushibe na itima u ndu gya m'binji nobe, ata lubala lwage, ata mcha gwage, ata mgichi gwage gwa mmachana, ata ng'ombe gyage, ata punda gyage, ata ibya yo yose yine yeli nayo m'binji nobe. ²² Bino noo binywa byine Mlume byelisambile sumbilo lyenyu lyose u loono wa liidi mbila uhuma hawingi haahya, na timba, na mdoo gwingi; na gushilibiye inywa. Gubigolile heguilu ha mibachwa gibili gya mawe, gee nuupa. ²³ Haya, hamuhuliche liya liidi uhuma hawingi ha mdoo, na moka mamo mengo luya loono lubele hulama aahya, bibyo mupyile, ehe, bahele bose ba bilongo byenyu, na miungu gyenyu. ²⁴ muganine, Loola, Mlume, abetcha etu, gwatuonya ugengeda wage, na bwata bwage, na beswe twahulicha liidi lyage uhuma hawingi haaya; mwamona lino ugana Abetcha gusudogoma na mtu, nage nuuhamaa. ²⁵ Bino hano, yulu yai tusawa?Bululi bwai aahya engi ituchigya; tubehulicha iyaka liidi lya Mlume, Abetcha etu, twiwa. ²⁶ Bululi u bato bose bene bali na mibili m nanyi guhuliche liidi lya Abetcha ene ali na mwego, gulihudogoma uhuma hawingi ha aahya, nahi biya beswe, gashiwe? ²⁷ Gogwe noo ugye hoka, wahuliche byose byeligana Mlume, Abetcha etu; watusambile byose byeliusambila Mlume, abetcha etu; beswe twbuhulicha na ubigila. ²⁸ Nage Mlume guhuliche liidi lya binywa byenyu byamusambile; Mlume gusambile, Nahulicha madi ma binywa bya bano batu byabuganine; bagana bisoga byose byine byabagana. ²⁹ Ehe, bisuba na mtima nahi guno mnda mwabo masugu mose, gwa uunyemya, na uusa alago anyi ose masugu mose, baoshe ugiliwa boo na baana babo milumbu! ³⁰ Ugye ubasambila, Giwilwe u bitula byenyu. ³¹ Alakini gogwe, gimana hano hoka nanyi,na nene nidogoma nobe m'bindo gose, na alago na uonona, byolibagigya, baoshe ubigila mnda sii gyandibaha ugishama. ³² Bino uswe, meigile nahi byamusambilwe na Mlume, Abetcha enyu; mushigaluwe uboo wa ulume ata wa uachi. ³³ Giwe ndila gyose gyine gimlagile Mlume, Abetcha enyu, mwabe na mwego, na ugulilwa, mwaite masugu menyu uba mengi mnda sii gyamwihyili.