¹ Na bino, Ee Isilaeli, hulichiwe alago na uonona namgigye, yulu mwabigile,yulu mwahamee na ugungila na uhyilia sii gyelimma Mlume, Abetcha a bamasenyu. ² Mushiilibiye inywa yandimsambikla na mushiihungule, mwaoshe uusa alago a Mlume, Abetcha enyu, yandihumsambila. ³ Meeso menyu mamonine byelimgilile Mlume wa ibalo ya Baal-peoli; bululi bose bene bamlamine Baal-peoli, Mlume, Abetcha obe, gwabachimya uhuma hawingi hobe. ⁴ Alakini bwenywe bene muhambane na Mlume, Abetcha enyu, mwahamaa ge gese gwenyu ndaa na lino. ⁵ Lingaminywe, namgigya alago na uonona, byoka biya nahi Mlume, Abetcha anyi, byelisambile, yulu mwabigile mnda giya siigyamwigingila yulu ya ugihyilila. ⁶ Byuswe, mwabigile, bululi luno noo lwengu lwenyu na lwenyi lwenyu, u meeso na bawamioga bene bihulicha alago ano ose, nabo bigana, Chigilwe gono mmoga guno gwa gwata m batu bene bina lwengu na lwenyi. ⁷ Bululi hali mmoga nai gwata, guli na Abetcha ene ali hoka nabo, nahi Mlume, Abetcha etu, byeli, ho hose hatusumgita? ⁸ Iyaka hai mmoga nai gwata, guli na alago na uonona wine uli na kiine nahi m'bindo guno gose, gwanduhubiya lino u mbele wenyu. ⁹ Alakini, lwenge lulume na ichuli-chuli yobe ya mwego, uliuse luhuda lobe wa alimakelela, ushichwe ugibilila bikoko biya byolimonine na meeso mobe, byo nuhuma mnda mtima gobe masugu mose ma mwego gobe; bino wabawate u matu baana bobe na baana ba baana bobe; ¹⁰ luya lusugu loligimene u mbele wa Mlumemyobe uya Holebu, Mlume helisambile, Kungwele bano batu, nene nibahulidicha binywa byanyi, yulu baligigya uunyemya nene masugu mabo mose ma uhamaa ha ino ibaloo, baoshe na ubagigya na baana babo. ¹¹ Mwashene, mwagimane hoka na luya loono; loono lulamine aahya ndaa na hawingi ha gulu, wa mdoo na matimba, na mdoo gwiingi. ¹² Mlume gudogomine nanyi uhuma hawingi ha aya aahya; muhuliche liidi lya binywa, alakini mushimonine ibilibili yo yose; m liidi ka. ¹³ Gumsambile alago age, byelimsambile uagila, noo, aya alago umi; guagolile hegule ha giya mibachwa gibili gya mawe. ¹⁴ Mlume gusambile maya mengo namgigya malagano na uonona, mwabigile mnda giya sii gyamwidabwila na ugihyilila ¹⁵ Lwenge lulume na bichuli-chuli byenyu bya mwego; bululi mushimonine itimbigili yo yose luya lusugu Mlume helidogonine nenyu uhuma hawingi ha aahya; ¹⁶ mushichwe ugugicha bichuli-chuli byenyu bya mwego, ulilongecha miicha gya ubada, mlingilisho gwa yenyi yo yose, nahi ya mlumyana ao ya mmachana, ¹⁷ nahi nyama gyo gyose gya hano hamgala, ao nahi anonyi o ose a uguluwa m'bwingi na gulu, ¹⁸ ao nahi ibya yo yose ya ulibula na yaali hegulu ha bitete, ao nahi swii, ao gyo gyose gya mmaadi hasi ha bitete. ¹⁹ iyaka ushichwe uginuna meeso mobe hegulu ha gulu, na holilimona chuba, na mwechi, na tumbalambala, na ihichi yose ya ha gulu lyose nalyo, wabichiwe na ubitambikila, byina Mlume, Abetcha obe gubagabile batu bose hasi ha gulu lyose. ²⁰ Bino Mlume gwamguha benywe, na ummunya mnda yungubila ya bigela, uya Misili, yulu mwabe batu ba buhyana bwage, nahi byamli hano lino. ²¹ Iyaka Mlume guchigiliwe yulu yanyi bululi bwenyu, gulahile pa nishidabuwa Yolodani, na ugana nishigingila mnda giya sii gisoga, gyelimma Mlume, Abetcha enyu, gibe buhyana. ²² Alakini nene niiwa mnda gino sii, nisagitabichiwa udabuwa Yolodani; benywe noo mwidabuwa, na ugihyiligiya sii gisoga. ²³ Lwengelulume na bichuli-chuli byanyu bya mwego, yulu mushichwe ugubilila malagano ma Mlume, abetcha enyu, balilagene nenyu, mulilongeche miishi gya ubada, mlingilisho gwa itimbigili ya ubya yo yose yine yolihanyiwe na Mlume, Abetcha enyu, ²⁴ bululi Mlume, Abetcha enyu, m yaahya uchigya, Abetcha ene ali na buwa. ²⁵ Holibuta baana, na beedulu na twedulula, hanyuma holibi masugu mengi mnda giya sii, m'belibulaganya na ulilongecha miishi gya ubada nahi itimbigili ya ibya yo yose, m'begila bya bisone u meeso ma Mlume, Abetcha obe, na uchigilicha, ²⁶ nihum'bangisiya gulu na sii bino lino, ugana bino hano hoka mwichimiwa abisa mnda sii gyine gyamwidabwila Yolodani ugihyilila, mwiita masugu menyu uba mengi hegulu hagyo, bibyo mwichimiwa abisa. ²⁷ Na Mlume gwimmaha hawingi ha mioga, benywe mwishigala batu bacho ka lubalo lwenyu hawingi ha mioga, wamwihilwa koo na Mlume. ²⁸ Na uya mwigilila tunge tubetcha, mgilo gwa maboo ma batu, noo miti na mawe, gyine gishihumona na gishihuhulicha, gishibaaya, na gishibanyukya. ²⁹ Alakini uya, nambo mwimmenga Mlume, Abetcha obe, ubi nage, ubemmenga wa mtima gobe, na luhuda lobe lose. ³⁰ Na mengo mobi mnda adugwa, ubehwa upaswa na bikoko bino byose, masugu ma isula, wimgiwilila Mlume, Abetcha obe, na uhulicha liidi lyage; ³¹ bululi Mlume, Abetcha obe, m Abetcha a uleeelela; gushiugugicha, na gushiuchimya, na gushigibilila malagano ma bamasobe melibalahile pa. ³² Bululi ubuche masugu menen mahishile, mene mabele hambele hobe, utula lusugu luya Abetcha lwelibumbile mtu hegulu ha sii, na uhuma sunga lili lya gulu ndaa na sunga lili, ugana nambo hahumoneya inya nahi ino yata, ao ugana hahuhulichiwa mwano gwavinywa nahi ino? ³³ Wi wii! Batu mengo mo mose bahuliche liidi lya Abetcha lilihudogoma uhuma mnda aahya, nahi gogwe byolihuliche, bashiwe? ³⁴ Ao Abetcha gugile mengo nai uliguhila mmoga hawingi ha gunge mmoga, wa utonda, na wa bisaga, na wa bigagicha, na wa bita, na wa uboo wa uoma, na wa uboo wa ugolobu, na wa ubabula wa wata, nahi biya Mlume, Abetcha enyu, byelimgilie benywemnda sii gya Misili, u mbele wa meeso menyu? ³⁵ Gogwe umonyiwe bino, yulu uoshe umana ugana Mlue noo Abetcha, hashi gunge nambo gee ka. ³⁶ Uhumina ha gulu wahulicha liidi lya Mlume, yulu gugigye; na hegulu ha sii guumoninye aahya age aulu; uhuliche binywa byage uhuma hamwingi ha aahya. ³⁷ Na wa ibalo gubaundile bamasenyu, na wa iyo ibalo gubasobolile bibushi byabo hanyuma habo, guuhuminye m sii gya Misili wa uba hamwechi nobe, wa uosha wage wingi, ³⁸ yulu ya uchinga mioga u mbele ubo, bene bali bata, bina uoma uuhima gogwe, yulu ya uugingicha, na uuha sii gyabo gibe buhyana bobe, nahi byabili lino. Wa bibyo umane, bino lino, wabiye mnda mtima gobe, ugana Mlume noo Abetcha mnda gulu lya hegulu, na mnda sii hasi; hashi gunge; ⁴⁰ Bino, uuse m'bindo gwage, na alago age, andihusambila lino yulu ugililwe, gogwe na baana bobe hanyuma hobe, na masugu mobe maabe mengi mnda giya sii gyeliuha Mlume, Abetcha obe, milumbu. ⁴¹ Haho Musa gubagule mabuga mattu m'bwala mwa Yolodani luubi lwa buhumino bwa chuba; ⁴² yulu ya ugana mine gwihaga mtu gaoshe usinina uya, mine gwihaga m'binji nage wa subisubi, na gushimmoninywe utula aala; yulu gahamee helisinina m gimwe mbuga gyo gyose giya; ⁴³ namo noo mano, Beseli gya mgala guli mnda sii gya ibandabanda, wa Leubeni; na Lamothi gili Gileadi, wa Bagadi; na Golani gili u Bashani wa Bamanase. ⁴⁴ Na m'bindo Musa gwelibabiile noo guno; ⁴⁵ gino noo mangisiyo, na alago, na uonona, Musa byelibasambile baana ba Isilaeli habahumine Misili; ⁴⁶ m'bwala mwa Yolodani, wibetabeta yine ibele hulolana na Beth-peoli, mnda sii gya Sihoni oolo lya Baamoli, mine gubelehushama Heshboni noo gulwilwe na Musa na baana ba Isilaeli, habahumine Misili. ⁴⁷ bawatile sii gyage, gyo nubaihana yabo, na sii gya Ogu oolo lya Bashani, noo maolo mabili ma Baamoli, bene babekle m'bwala mwa Yolodani luubi lwa ubutobwelo bwa chuba; ⁴⁸ uhuma Aloeli, gyine gili u m'bega gwa ibetabeta ya Alnoni, ndaa na loono lwa Sioni (nalo noo Helmoni), ⁴⁹ Na Ubaalabu ose wine uli m'bwala mwa Yolodani luubi lwa mlugulu, ndaa na Bahali lya Baalabu, hasi ha mmundumuo gwa Pisga.