¹ Haho tugaluwe, tugile ndila gya Bahsani; na Ogu, iilo lya Bashani, gutuchwilile, gee na batu bage bose, uchwa ulwanetu uya Edlei. ² Mlume gusambike, ushimmone booba, bululi nam'biya m muboo obe, gee na batu bage bose na sii gyage; nagogwe wimgilila mlingilisho gwa byolimgilile Sihoni, oolo lya Baamoli, mine gubele hushama Heshboni. ³ Bibyo Mlume, Abetcha etu, gum'biile m maboo metu na Ogu oolo lya Bashani, na batu bage bose; tumlwile, hashishigele yo yose. ⁴ Tuguhile mabuga mage mose mamo mengo; hashibele na mbuga gyine gyatushiguhile wabo m,abuga maumi mtuba, sii gyose g6a Algobu, noo buolo bwa Ogu bwine buli u Bashani. ⁵ Mabuga mamo mose mabele na migumbo gilahu, na michango, na tuhongolo, hamwechi mabuga mene mashibele na migumbo, meengo abisa. ⁶ Tumagugiche abisa, nahi byatumgilile guya Sihoni, oolo lya Hashboni, wa ugugicha abisa mabuga mose mene mabele na batu, hamwechi na baachana na baana. ⁷ Alakini nyama chose cha mbuga, na kole chose cha mabuga, tuguhile uba buhibi bwetu. ⁸ Tuwatile na sii mamo mengo, m maboo ma mamo maolo mabili ma Baamoli bene babangilwe m'bwala mwa Yolodani, wibetabeta ya Alnoni ndaa na u loono lwa Helmoni; ⁹ (na lulo Helmoni Basidoni basulugita Silioni, na Baamoli basulugita Senili); ¹⁰ maguba mose ma sii gya ibandabanda, na Gileadi gyose, na Bashani gyose, ndaa na Saleka na Edlei, namo m mabuga ma Ogu gya Bashani. ¹¹ ( Ugana mmona gwine gushigele u Balefai m Ogu gee bwage, oolo lya Bashani; loola, ingo yage ibele ingo ya bigela; iyo ingo wii! Ishi ya Bugudi u baana ba Amoni? Ulaha wage ibele m maboo yahabula, na mahinda mayo maboo mana, nahi mlingilisho gwa uboo wa mtu). ¹² Na gigyo sii tugiguhile uba ihananyetu, mamo mengo; uhuma Aloeli ene ali wibetabeta ya Alnoni, na ibaa ya sii gya koono cha Gileadi, na mabuga mene mabelemo, nibahele Baleubeni na Bagadi; ¹³ na sii gya Gieladigyine gishigele, na Bashani gyose, bululi bubo buolo bwa Ogu nibahele ibaa ya ilongo ya Manase; sii gyose gya Algobu, nagyo noo Bashani gyose. (Na gino sii gisigiswa sii gya Balefai. ¹⁴ Yaili, mwaana gwa Manase, guguhile sii gyose gya Algobu, ndaa na lugumba lwa Bageshuli na Bamaaka; gugiguhile giya sii Hawoth-yaili, noo china lyage gee mine, ndaa na lino, noo ugana gigyo sii gya Bashani.) ¹⁵ Na Makili nimmele Gileadi. ¹⁶ Na Baleubeni na Bagadi ndaa na ibetabeta ya Alnoni, hawingi ha ibetabeta, na lugumba lwage; ndaa na luudi Yaboki, nalo noo lugumba lwa baana ba Amoni; ¹⁷ Na sii gya Balabu nagyo, na luudi Yolodani, na lugumba lwage, uhuma Kinelethi ndaa na bahali lya babo Baalabu, nalyo noo Bahali lya Miinyu, hasi ha mmundumuo gwa Pisga, luubi lwa mlugulu. ¹⁸ Nibasambile mamo mengo, nibaganine, Mlume, Abetcha etu, gwamma benywe gino sii mushame mwagili, bino dabuwe m'bwala mube na tulume gela u mbele wa bashiwenyu, baana ba Isilaeli, bose bene bali bilume pambwa. ¹⁹ Alakini baachi benyu na baana banyu, na nyama chenyu cha mmabuga, (nimgidi ugana muli nyama chingi), bashame mnda mabuga menyu mandimmele; ²⁰ ndaa na Mlume byelibaha bashiwenyu ulitucha nahi benywe, nabo bahyilile sii gyabihewa na Mlume, Abetcha enyu, m'bwala mwa Yolodani; haho noo hamwigiwila mtu ge gese wihana yage yandimmele. ²¹ Nimsambile Yoshua mamo mengo, nimganine, Meeso mobe mamonine byose bimgilile Mlume, Abetcha enyu, maya maolo mabili, nabyo noo byelibugilila Mlume buolo bo bose uya wine olidabuwa. ²² Ushimshiga, bululi Mlume, Abetcha enyu, noo alihumlwila. ²³ Nilisachiche uli Mlumemamo mengo, nimsambile, ²⁴ Ee Mlume Abetcha, wahutula ummonya mgichi gobe bwata bobe, na uboo obe wa uoma; iyaka ugana hali abetcha nai ha gulu ao mno mibaloo gunaosha ugila wa mlingilisho gwa migilo gyobe, na mlingilisho gwa gwa bigilanywa byobe byine bili na uoma? ²⁵ Nene nusaba nadabuwe, nagimone giya sii gya gisoga gyine gili m'bwala mwa Yolodani, loono lua lusoga, Lebanoni. ²⁶ Alakini Mlujme gusibele mchigililwe yulu yanyi bululi bwenyu, gushipuliche; Mluje gusambile, ushidogome nanyi byahuhwa yulu ya ino ikoko. ²⁷ Sela usongo loono lwa Pisga wagimone wa meeso mobe luubi lwa igolo, na luubi lwa uboo wa uachi na luubi lwa uboo wa ulume, nabluubi lwa mlugulu, walole na meeso mobe, bululi ushidabuwa luudi luno lwa Yolodani. ²⁸ Alakini umlage Yoshua umteyamanye uba na mtima gwata, umme na uoma; bululi gee noo gwilombola udabuwa hambele ha bano batu, na sii gyolimona gee gwibahyanya. ²⁹ Bibyo tushamine mnda ibetabeta ili hulolana na Beth-peoli.