¹ Hulichiwe, lenywe gulu, nene nidogoma; Na sii gihuliche binywa bya anywa anyi. ² Lugigyo lwanyi lwihuluwa nahi mbula, Binywa byanyi byinowa nowa nahi iime; Nahi mbula gya lunyange hegulu ha byanyi ya bibisi; Nahi matata ma mbula hegulu ha byunaganywa. ³ Bululi nilisamba china lya Mlume; Mmewe bwata Abatcha etu. ⁴ Gee Huo, mgilo gwage mguwilile; Bululi, madilamage mose mma kiine. Abetcha a uwilila, gushi na usona, Gee noo mine gwina kiine na yano. ⁵ Bagilile bikoko bya ugugila, Bashibaba baana bage, ano noo abachi abo; Boo m ibushi yanene, yine igobame. ⁶ Wi wii! Mulihuasa Mlume bino, Benywe batu bahugi na tuhoso? Wi wii! Gee gushi sobe mine guuguchiche? Guwitile, na uugimiya masugu mose. ⁷ Engelecha masugu maala, Ulange myaa gya bibushi biingi; M'buche sobe, nage gwiumonya; Miungu gyobe, nagyo gyiusambila. ⁸ Gee Mine gulu heguli helibahele mioga buhyana bwabo, Helibabagule batu, Gubiile ng'umba cha batu, Wa ulamana na lubalo lwa baana ba Isilaeli. ⁹ Bululi iba ya Mlume m batu bage, Yakobo m luti lwa buhyana bwage. ¹⁰ Gum'bangile mnda sii gya lwanaganywa, nalele lya hululu lya luteshi; Gumchunguluwe, gummusile; Gum'bisile nahi abetcha a liiso; ¹¹ Mlimgilisho lwa loochi byalushibateamana yulu ya itala yalo; na uumbatila baana balo, Lwabungula bihwahwa byage, lwabaguha, Lwabaswala hegulu ha bihwahwa byage; ¹² Mlume gee buchima gomgolwele, Na hashine ange abetcha hamwechi nage. ¹³ Gumsediche ihana ya sii gya giginyubu, Nage gulile biliwa bya mmabala; Gumlishich bui bwauhuma mpanga mawe, Na mauta mene mahumine mnda huo lya menga mailu; ¹⁴ Mauta ma ng'ombe, na mabele ma miyoo, Hamwechi na mauta ma mwana mmoo, Mmoo gwa gulume gwa Ibashani, na mbuchi, Na unaga wa ngano cha chisoga; Unywine ibugu, maashi ma mizabibu. ¹⁵ Alakini Yeshuluni guhemine, gutele ipashi; Uhemine, usili mmata, wahema; Bhaho gumleile Mlume mine gummitile, Gumnenune Huo lya uhogonowa wage. ¹⁶ Bammtile uba na buwa yulu ya tunge tubetcha twa tugenyi, Bamchigiliche wa ahyonono. ¹¹ Mlimgilisho lwa loochi byalushibateamana yulu ya itala yalo; na uumbatila baana balo, Lwabungula bihwahwa byage, lwabaguha, Lwabaswala hegulu ha bihwahwa byage; ¹² Mlume gee buchima gomgolwele, Na hashine ange abetcha hamwechi nage. ¹⁹ Mlue gumonine, gubaonywine, Bululi bwa uchigilichiwa na bawalubaga bage na bawa misiha gyage. ²⁰ Guganine, nibabisa yenyi yanyi, Nimona isula yabo ibi wii; Bululi, m yibushi ya anene engi, Baana bene bashi na buwasha mnda mabo. ²¹ Bambiya buwa u ibya yine ishi Abetcha; Banjigilicha wa ibya ya bunene bwabo; Na nene nibabiya buwa wa bene bashi batu, Na nene nibachigilicha wa mmoga gwa guhugi. ²² Bululi, aahya alamiwa yulu ya sungu chanyi, Achigya ndaa na hasi ha usinda, Aya ibaloo hamwechi na biliwa byage, Achigya mishingi gya koono. ²³ Ibiya lugugicha hegulu habo mitala mitala; Nibata wa migwi ganyi ndaa na byagihwa; ²⁴ Bigonda na ndala, biliwa na maalama aahya, Na ugugila wa wata; Nibahilila meno ma byila bya buhuchi, Hamwechi na bulembe bwa bichimu bisulibula mmihwili. ²⁵ Hambuga ahilu mwiwaswa, na mnda ndu mubi luteshi; Widigya mmwalubaga na mmwa msiha, guukoka na mmulu gwa mbwi, ²⁶ Nagana, Nabamsalila koo, Nabasungya kemgelecho gyabo hwingi ha batu; ²⁷ Yandasina m yugongela na tumangu, Tumangu twabo tushichwe ulanga bya lulimi, Bashichwe ugana, Uboo wetu waginyuwa, Na ata Mlue gushilile bibyo byose. ²⁸ Bululi bano m mmoga gwine gushi na lango, Na mnda mwabo mushi malango. ²⁹ Nambo bisuba na lwenyi, na ulanga bino, Na ulanga isula yabo. ³⁰ Mtu gumwechi gwabachyinga batu uki, Babili babasinya uki umi, Nambo huo lyabo lisababagucha? ³¹ Bululi, Huo lyabo m nahi Huo lyetu, Mndi tumangu twetu to twine noo byatulihuonona. ³² Bululi, mzabibu gwabo noo mzabibu gwa Sodoma, Nago m gwa lubala lwa Gomola; Zabibu chabo m zabibu cha bululu, Byaama byabo bya buluba bili bululu. ³³ Ibugu yabi m bulembe bwa madowa, Usuma wingi wa ndowa, Wi wii! ³⁴ Bino bishibiilwe wandi mbuto? Na ubiwa yaala m lindo lyanyi? ³⁵ Ugiwidicha buubi wa buubi m wanyi nene ugiwidicha, Mengo hamisebutuwa magulu mabo; Bululu masugu ma asusu abo mahuhiya, Na bikoko byine byibabanga byiita abilo uchwa. ³⁶ Bululi Mlume gwibaluliya batu bage, Gwibamonena misa batu bage, Helimona uoma wabo wabahuma, Na uba hasashigala mtu, mine guhambilwe na mine gushihambilwe. ³⁷ Nage gwigana, Gili tuli uhi tubetcha twabo, Huo liya lyabaudagile; ³⁸ Lyine lilile mauta ma nyama na ma swii lutangi lwabo, Na unywa ibugu yabo ya lutangi lwabo lwa byunywa? Bino bagimane na ubwatilicha benywe; Na baabe babo ihanda yenyu. ³⁹ Ubemana ugana Nene, ehe, Nene noo gee, Na hashi ange Abetcha m Nene ka; Nene nisuhaga, Nene nisuhana mwego, Nisubongola iyaka nisuhonya; Na hashi mine gunahogonona mnda uboo wanyi, ⁴⁰ Bululi, naginuna uboo wanyi ha gulu, Na ugana, Nahi Nene byandisuhamaa milumbu, ⁴¹ Nabeamona ahilu anyi a ahenyuhenyu, Uboo wanyi ubewata uonona, Nibagiwidicha buubi wa buubi tumangu twanyi, nibasusula bene bali hukunywa. ⁴² Niocha migwii gyanyi na maashi, Ahilu anyi iya nyama; Hamwechi na maashi ma bene bahagilwe na bene bawatilwe kole, u miswegya baata ba tumangu. ⁴³ Seelelwe, benywe ba mioga, hamwechi na batu bage; Bululi gwiguha ugiwidicha buubi wa buubi bwa maashi ma bacha bage, Gwibasaba ugiwidicha buubi wa buubi tumangu twage, Iyaka gwitangila nyama yulu ya sii gyage, na batu bage. ⁴⁴ Musa guchwile gudogome bino binywa byose bya luno lwimbo u matu mabatu, gee na Yoshua, mwaana gwa Nuni. ⁴⁵ Musa gee nuhwa ubasambila Isilaeli yose binywa bino byose. ⁴⁶ gubaambile, Bibiwe mnda mitima gyenyu binywa bino byose byine byandabangisiya wenyu bino lino; nabyo mwabasabile baana benyu, babiuse na ubigilabinywa byose bya guno m'bindo. ⁴⁷ Bululi ishi ihisho yine ishilingye wenyu; bululu, noo mwego gwenyu, na wa ino ikoko mwiita masugu menyu uba mengi mnda sii gyine gyamwidabwila Yolodani uguhyilila. ⁴⁸ Mlume gudogome na Musa loka lulo lusugu, gumsambile, ⁴⁹ Sela u loono luno lwa Abilamu, ndaa na u loono lwa Nebo, lwine luli mnda sii gya Moabu, uhugulwila Yeliko; walingamine sii gya Kanaani gyandibaha baanaba Isileli ugihyilila; ⁵⁰ waawe hegulu ha loono, uya olisela, wasumbichiwe wabe hamwechi na ilongo yobe; nahi byeliwile mshiwenyu Haluni u loono lwa Holi, gusumbichiwe gabe hamwechi na batu bage; ⁵¹ bululi mundubile benywe hawingiha baana ba Isilaeli ha maadi ma Meliba uya Kadeshi, mnda mgala gwa Sini; bululi mushipaheche hawingi ha baana ba Isilaeli. ⁵² Bululi wigimona giya sii u mbele obe, alakini ushigya o ugigingila giya sii gyandibaha baana ba Isilaeli.