¹ Mus gugile ubasambila Baisilaeli bino byose. ² Gubasambile, Nene lino nisili mtu gwa myaa sambi na maumi mopi; nishinaosha iyaka ugingila na utobowa, na Mlume gusambile, Ushidabuwa luudi Yolodani. ³ Mlume, Abetcha obe, noo gwidabuwa hambele hobe, gwichimya gino mioga hambele hobe, na gogwe wibahyilila; na Yoshua gwidabuwa hambele hobe, nahi byelidogomine Mlume. ⁴ Na Mlume gwibagilile babo nahi byelibagilile Sihoni na Ogu, maolo ma Baamoli, na sii gyabo, bene beligugiche. ⁵ Nage Mlume gwibabiya mnda maboo menyu, benywe mwibagilila ulamana na alago aya andimsambile. ⁶ Mube na uoma na mtima gwa asalulu, mushimone booba na mushibadidibuwe; bululi Mlume, Abetcha obe, gee noo gwigya hamwecho nobe, gushiuhungwila na gushiulecha. ⁷ Musa gumgitile Yoshua, gumsambie u meeso ma Isileliyose, Ube na uoma, na mtima gwa asalulu, bululi wigya hamwechi na bano batu ndaa na sii Mlume gyelibalahile pa bamasabo, ugana gwibaha; na gogwe wibahyanya. ⁸ Nage Mlume, gee noo gubi hambele hobe, gubi hamwechi nobe, gushiuhungwila na gushiulecha; ushimone booba na ushibawe iduba. ⁹ Musa gugolile guno m'bindo, gubahele ba bibuli, baana ba Lawi, bene babele huswala lindo lya ulaga lya Mlume, na baulu bose ba Isilaeli. ¹⁰ Musa gubasambie, guganine, Isula ya mwaa go gose gwa njwii, mengo ma ulecha, mengo mene maganinywe ma lusugu lwa ulitucha lwa bitulatula, ¹¹ Isilaeli yose ihiile u meeso ma Mlume, Abetcha obe, ihana iya yine yelisobola, wagusungule guno m'bindo u bele wa Isileli yose u matu mabo. ¹² Basumbiche batu,balumyana na baachana na baana, na mgenyi gobe mine guli hamichango gyobe bahuliche na uligigya, na umnyemya Mlue, Abetcha enyu, na ulingamine wa ugila binywa byose bya guno m'bindo; ¹³ na baana babo bene bashigidi, baoshe uhulicha na uigigya umnyemya Mlue, Abetcha enyu, masugu mose mene mamwishama mnda sii gyamulihubwila ugya ugihyilila. ¹⁴ Mlume gumsambieMusa, Loola, masugu mobe ma uwa mahuhiya, umgite Yoshua, benywe mugye limonye u hemelya busambeno, yulu namlage mgilo. Musa na Yoshua bagile, balimoninye mnda itulaya busambeno. ¹⁵ Mlume gee nuumoneya mnda Itula mnda ihanda ya timba; na iyaihanda ya timba igimene hegulu ha mchango gwa Hema. ¹⁶ Mlue gumsambile Musa, Lingamine, gogwe wilala na bamasobe; na bano batu bigya, bilama wa lusengu tunge tubetcha twa tugenyi mnda sii yabalihugila uba hawingi habo, nabo bishiga nene na unoga ulaga wanyi, wandiitile nabo. ¹⁷ haho noo hene hichigililwa Mlume yulu yabo mamo masugu, nene nibalecha, nibabisa yenyi yanyi, nabo biliwa, iyaka bichwilwa na bikoko biingi bya bisone na adugwa; na byabigana lulo lusugu, Wi wii! Uchwilwa wetu na uno usona ishi yulu ya ibalo Abetcha etu ashiho hawingi hetu? ¹⁸ Nene nibabisa yenyi yanyi wa chigilwe lulo lusugu, yulu ya usona ose wine wabaitile, wa utugalwila tunge tubetcha. ¹⁹ Bino ligolelwe luno lwimbo, ubagigye baana ba Isilaeli; ulubiya mtunywa twabo, yulu lwabe mangisiyo gyanyi luno lwimbo , u baana ba Isilaeli. ²⁰ Bululi handihwa ubabiyamnda sii gyandibalahile pa bamasabo, gyuhongolowa mabelena bui; nabo habihwa uuya na ugyuta, na uhema; haho noohabigalwila tuto tunge tubetcha, nautugilila, na uunenuna nene, na unoga ualaga wanyi. ²¹ Iyaka habi, habihwa uchwilwa na bikoko bingi bya bisone na adugwa, wibangisiya luno lwimbo u mbele wabo nahi mangisiyo, bululi lushigibililwa mnda tunywa twa bibushi byabo; yulu nidigi malanga mabo mene mabali hulanga, ata bino hambele nishinababiya mnda sii gyandilahile pa. ²² Bibyo Musa gulugolie luno lwimbo loa luya lusugu, gubagigiche baana ba Isileli. ²³ Gumlagile Yoshua, mwaana gwa Nuni, gumsambile, Ube na uoma, na mtima gunyemu, bululi wibahila baana ba Isilaeli mnda sii gyandibalahile pa; nene nibi hamwechi nobe. ²⁴ Bibyo Musa helihwile ugola binywa bya guno m'bindo mnda itabo, byoo nuuhwa. ²⁵ bibyo Musa gubasambile Balawi bene babele baliswale lindo lya ulaga lya Mlume gubasambie, ²⁶ Guhwe ino itabo ya m'bindo, mwibiya mibamba mwa lindo lya ulaga lya Mlume, Abetcha enyu, yulu yabe mangisiyo hegulu halyo. ²⁷ Bululi lubengo lobe nilugidi, na oshi lyobe lya ligumu; lingaminywe, nene nili hamwechi nenyu lino, musili nalubengo yulu ya Mlume; bibi wi handiwa! ²⁸ Musambaninye baulu bose ba bilongo byenyu; na baata benyu na mabuga, yulu nadogome bino binywa m matu mabo, na ulibandisila gulu na sii yulu yabo. ²⁹ Bululi nigidi hanyuma ha uuwa wanyi mwilibulaganya abisa, na uhuguluwa uhuma mnda ndila gyandimsambile; na ubo ugugila ubi ha masugu menyu ma isula, ulamana nabiya byine byameiita usona u meeso ma Mlume um'biya sungu yulu ya migilo gya maboo menyu. ³⁰ Musa guganine binywa bya lulo lwimbo u matu ma sumbilo lya baana ba Isilaeli nabyo nuuhwa.