¹ Iyaka habibi bihisho bibyo yose habyuchwilila, mihaa na buloga byine byabiwa umbele obe, gogwe holibyengelecha hawingi ha mioga gyose, uya weliuhila Mlune, Abetcha obe, ² gogwe holimgiwilila Mlume, Abetcha obe, na uwasha liidi lyage, mlingilishi gwa byose byine byandihuusambila hano lino, gogwe na baana bobe, wa mtima goge gose, na wa luhuda lobe lose; ³ haho noo Mlume, Abetcha obe, helibugalula bucha bobe, nage hwiumonena misa, iyaka gwigiwila na uusumbicha uhuma hawingi ha mioga gyose, uya weliusalile Mlume, Abetcha obe, ⁴ Batu bobe bene bolisalile babebaho u songo gya gulu lya isula, uhuma uya gwiusumbicha Mlume, Abetcha obe;uhuma uya gwiuguha; ⁵ gwiulusha Mlume, Abetcha obe, ugingile mnda sii gyine gihyilile bamasobe, na gogwe wigihyilila; nage gwiugilila bya misa, na gwiuita ube batu bengi uhima bamasobe. ⁶ Mlume, Abetcha obe, gwigisha kumbi mtima gobe, na mtima gwa ibushi yobe, yulu ummunde Mlume, Abetcha obe, wa mtuima gobe gose, na wa luhuda lobe lose, wabe na mwego. ⁷ Na buloga bono bose Mlume, Abetcha obe,gwobaloga ba tumangu tobe na baya bene basuuonywa, bene babele huususula. ⁸ Gogwe wigiwila, unyemye liidi lya Mlume, na ugila malagano mage mose mandi huulaga lino. ⁹ Na Mlume, Abetcha obe, gwiuita ube na luhanga lusoga lwingi lwa migilo gya uboo obe, uibushi ua gumo lyobe, na u ibushi ya ng'ombe gyobe, na u biliwa bya sii gyobe; bululi Mlume gwiseelela iyaka yulu yobe wa misa, nahi byeliseelele yulu ya bamasobe; ¹⁰ uba nambo wilama liidi lya Mlume, Abetcha obe, wa uusa malagano mage, na alago age ene agolilwe mnda itabo ino ya m'bindo; nambo wigiwila wa Mlume, Abetcha obe, wa mtima gobe gose, na wa luhuda lobe lose. ¹¹ Bululi ulaga uno wandihuulaga lino, ushi bushito buulu oli, na ushi koo. ¹² Ushi ha gulu, na ugane, M nanyi gwituchinina ha gulu gatulushishe, gachwe gatusambile tuhuliche, na twaoshe ubyiita? ¹³ Na bishi m'bwala mwa bahali, na ugane, M nanyi gwitudabwila bahali, gatulushishe, gachwe utusambila, tuhuliche, twaoshe ubyiita? ¹⁴ Alakini inywa ili hoka nobe abisa, ili mnda anywa obe na mnda mtima gobe, uoshe uyiita. ¹⁵ Lingamina, nuubila lino u mnele obe mwego na misa, na luubu na uluba; ¹⁶ wa bino byandihuulaga lino ummunda Mlume, abetcha obe, ugyta mnda madila mage, na uusa malagano mage, na alago age, na uonona wage, yulu wage na mwego na ubula; Mlume, Abetcha obe, gaoshe uuhalila mihaa mnda sii gyoligingila ugihyilila. ¹⁷ Alakini mtima gobe gubegya mibamba, usahuunda uhulicha, alakini nambo ubebulwa mibamba ugya utambikila tunge tubetcha, na utugilila; ¹⁸ nihumsambila bino lino chigilwe mwichima; mushimaita masugu menyu uba mengi m gino sii, gyolihudabwila Yolodani, ugingile ugihyilila. ¹⁹ Nihubangisiya gulu na sii yulu yenyu lino, ugana nuubila u mbele obe mwego na luubu, mihaa na buloga; bino usobole mwego, yulu wabe wahamee, gogwe na ibushi yobe; ²⁰ ummunda Mlume, Abetcha obe, unyemya liidi lyage, na uwatana nage, bululi gugo noo mwego gobe, na bwingi bwa masugu mobe; waoshe ushama mnda sii gyelilahile pa bamasobe, Iblahimu, na Isaka, na Yakobo, ugana gwibaha.