¹ Bino noo binywa bya malagano ma Mlume mene melisambile Musa baabigile na baana ba Isilaeli mnda sii gya Moabu, hamwechi na malagano mene melibiila nabo Holebu. ² Musa gugitile Isilaeli yose gubasambile, Mumonine byose Mlume byelimmitile Falao mnda sii gya Misili u mbele wa meeso menyu, gee na bagichi bage bose, na sii gyage gyose; ³ uya utonda wata wine umonine meeso mobe; biya bisage na bigagicha byata; ⁴ alakini Mlume gushimmele mtima gwa umana, na meeso ma umona, ata matu ma uhulicha, ndaa na ata na lino. ⁵ Nene myaa maumi mana nimgolwele mnda lwanaganywa; bichwalaganywa gyenyu bishisaswile hegulu ha mibili gyenyu, na ata mikalabanda gyobe gishisaswile u ugulu obe. Mushilile mkati, na mushinyune ibugu, ata malwa; yulu mwaoshe umana ugana nene noo Mlume, Abetcha enyu. ⁷ Benywe hamuchwile ha ino ihana, batutobwele ulwa netu Sihoni oolo lya Heshboni, na Ogu oolo lya Bashani, tubahulile; ⁸ tusapile sii gyabo, nagyo tubahele Baleubeni, na Bagadi, na ibaa ya ilongo ya Manase, gibe buhyana bwabo. ⁹ Uswe binywa bya mano malagano mwabyiita, yulu mwagililwe u byose byine byamwiita. ¹⁰ Lino mwagimana bose u meeso ma Mlume, Abetcha enyu; muingu gyenyu, na bilongo byenyu, na baulu benyu, na baata ba mabuga benyu, balumyana bose ba Isilaeli. ¹¹ bawalubaga bebyu, na baachi benyu, na mgenyi gobe mine guli hawingi ha bushamo9 bobe, utula mshabi gwa kunyi chobe ndaa na mtahi gwa maadi mobe; ¹² yulu wagingile mnda malagano ma Mlume, Abetcha obe, na ulaha pa wage, welilaha pa nobe Mlume, Abetcha obe, bino lino; ¹³ yulu guubiye lino ube mmoga gwage nage gaabe Abetcha oli, nahi byeliusambile, na nahi byelibalahile pa bamasobe, Iblahimi, na Isaka, na Yakobo. ¹⁴ Na nishihuita nenyu benywe buchima mamo malagano na uno ulaha pa; ¹⁵ alakini ata guya mine gugimene hano netu bino u mele wa Mlume, Abetcha etu, na ata naguya mine gushihamwechi netu lino; ¹⁶ (yulu mugidi byamubele bashame mnda sii gya Misili, na na byatuchwile uhita hawingi ha mioga giya gyine gyamuhitile hawingi hagyo; ¹⁷ benywe mumonine ludogya lwabo, na miishi gyabo, na gya miti na mawe, lusuu na nolo, chyine chibele wabo;) ¹⁸ hashibe mtu hawingi henyu, mlumyana aoa mmachana, ao ibushi ao ilongo, gwigaluwa mtima gwage lino umkleya Mlume, Abetcha enyu, ugya ugilila tunge tubetcha twa gigyo mioga; hashibe hawingi henyu shina usuma na bululu; ¹⁹ uba helihulicha binywa bya buno buloga, gugo mtu galihalile mihaa mnda mtima gwage, na ugana, Nishama mnda talala, ninangwa nuhugyata mnda uchimina wa mtima gwanyi wa ugugicha bya bibisi na bya bigumu; ²⁰ Mlume gwimleelela gugo mtu, alakini mamo mengo sungu cha Mlume na buwa bwage habwisuwa mii hegulu ha guya mtu, na buloga bose bwine bugolilwe mnda ino itabo bwimsahamina hegulu hage, na Mlume gwichima china lyage hasi ha guli. ²¹ Mlume gwim'bagula yulu ya usona wage, uhuma mnda bilongo byose bya Isilaeli, wa buloga bose bwa malagano meme magolilwe mnda guno m'bungo gwa migolo gya m'bindo. ²² Na ibushi ya hanyuma, baana benyu bene biginyuwa hanyuma henyu, na mgenyi mine gwichwa uhuma sii gya koo, bigana, habimona bihulo bya giya sii, na mbaba chilibiile Mlume; ²³ ugana sii gyage gyose m yabigo, na miinyu, na uchiga na ushila, gishiunywa, na gishiha biguma, na byanyi bishimena mwagili, nahi utipulwa wa Sodoma na Gomola, Adma, na Seboimu, melitipulile Mlume, wa uchigililwa wage na sungu chage. ²⁴ mioga gyose gyigana, Yulu yai Mlume gwagigilila gino sii bino? M yii udabamwa wa sungu chino chata? ²⁵ haho noo batu habidogoma, M yulu baleya malagano ma Mlume, Abetcha a bamasabo, melibiile nabo haya helibahuminye mnda sii gya Misili; ²⁶ bagile na ugilila tunge tubetcha, batutambikile tunge tubetcha twabashigidi, tweshibahele gee. ²⁷ haho noo hene haklamine sungu cha Mlume hegulu ha gino sii, wa ulusha hegulu hagyo buloga bose bwine bugolilwe mnda ino itabo; ²⁸ Mlume gubachulile mnda sii gyabo wa sungu, na nuchigililwa, na uambila wata, gubatelile bagye ginge sii nahi bino lino. ²⁹ Bikoko bya lubisaguli m bya Mlume, Abetcha etu; alakini bikoko byine biununywe noo byetu beswe na baana betu milumbu, yulu tubyiiya binywa byose bya guno m'bindo,