¹ Nambo wihulicha liidi lya Mlume, Abetcha obe wa chigilwe, uusa umagila malagano mage mose mandihuulaga bino lino, haho Mlume, Abetcha obe, heliuginuna hegulu ha mioga gyose gya ino ibaloo; ² na mihaa gino gyose gyiuchwilila, na uubanga holihulicha liidi lya Mlume, Abetcha obe. ³ Wihalilwa mihaa m mbuga, wihalilwa mihaa na umabala. ⁴ Bihalilwa mihaa ibushi ya gumo lyobe, na ibushi ya sii gyobe, na ibushi ya nyana chobe cha usugwa, migoma gya ng'ombe gyobe, na myoo gya bihichi byobe. ⁵ Yihalilwa mihaa itanga yobe, na mtindo gobe guubila buusu. ⁶ Wihalilwa mihaa holigongola, wihalilwa mihaa holitobowa. ⁷ Mlume gwiita tumangu tobe twine twiginyuwa yulu yoke uhulwa u mbele obe; biuchwila ndila gimwechi, alakini bisina umbele obe u madila njwii. ⁸ Mlume gwisambila mihaa gichwe oli mnda ahombo obe, na bikoko byose byolibiya uboo obe; nage gwiuhalila mihaa mnda sii gyeliuha Mlume, Abetcha obe. ⁹ Mlume gwiuita ube mmoga gwage gwa guhaha, nahi byeliulahile pa; holigotabicha byelilagikle Mlume, Abetcha obe, naugyata mnda madila mage. ¹⁰ Na mioga gyose gya ino ibaloo biumona wagiswa wa china lya Mlume, nabo babi na booba yulu yobe. ¹¹ Mlume gwiuita ube na luhanga lusoga lwingi, wibushi ya gumo lyobe, na ibushi ya nyama chobe chusugwa, na biliwa bya sii gyobe, mnda sii gyine Mlume gyelibalahile pa bamasobe ugana gwibaha. ¹² Mlume gwiununila lindo lyage lisoga, nalyo m gulu, wa unyeshecha mabula ma sii ha mengo mamo, na uuhalila mihaa migilo gyobe gyose gya maboo moba; gogwqe wigambya mioga gingi, alakini gogwe ushigamba. ¹³ Mlume gwiuita ube mswe, na gushi mmila; gogwe ube hegulu ka, na ushibi gwa hasi; hene holihulicha ulaga wa Mlume, Abetcha obe,wine wandihuulaga bino lino, uulingamina na uugila. ¹⁴ usahuhuguluwa u binywa byo byose byine byandihusambila lino, ugya uboo wa ulume ao wa uachi, wa uenga tunge tubetcha na utugilila. ¹⁵ Alakini bibi nambo ushibenja uhulicha liidi lya Mlume, Abetcha obe, usahulingamina ugila ulaga wage ose na alago age, wandihuulaga bino lino, haho noo hiuchwila buloga buno bose nuuwata. ¹⁶ Wilogwa mmbuga, wilogwa na mmabala. ¹⁷ Yilogwa itanga yobe mtondo gwa ubiila buusu. ¹⁸ Yilogwa ibushi ya gumo lyobe, na biliwa bya sii gyobe, migoma gya ng'ombe chobe, na bihichi bya myoo gyobe. ¹⁹ Wilogwa holigingila, wilogwa na holitobowa, ²⁰ Mlume gwiulushisha buloga, na adugwa, na uambilwa, u byose byine byolibiya uboo obe wa ubyita, ndaa na uchimiwa na uchimina wa abilo; yulu ya uya usona wa bigilanywa byobe, olindeele nao. ²¹ Mlume gwiusambanya na bisumi, ndaa na byelihwa uuhunya mnda sii gyolihugingila mwagili wa ugihyilila. ²² Mlume gwiuhula wa lubaba lwa yaali, na wa ihupu, na wa m'bili uchiga, na wa m'bili usele aahya, na wa ahilu, na wa ugumagala wa m'bili, na wa iyoo; nabyo byiuchinga ndaa na udigwe abisa. ²³ Na gulu lyose lyine lili hegulu hobe libi mmubo, na sii gyine gili hasi hobe gibi igela. ²⁴ Mlume gwiita mbuga gya sii gyobe gibe ihwili na isee; gyiuchila hegulu hobe ndaa na uuchimya. ²⁵ Mlume gwiuita uhulwa u mbele wa tumangu tobe; wibagila hegulu habo wa ndila gimwechi, alakini wisina u mbele wabo wa madila njwii; gogwe witelwa uya na uya hawingi ma maoolo mose ma ibaloo. ²⁶ Na itumba yobe ibi iliwa ya tuninyi tose twa ha hululu, na ya nyama chose cha ibaloo, hashibe na mtu gwa ubichinga. ²⁷ Mlume gwiuhula wa bihute bya Misili, na wa mshindo gwa abundi, na wa bihele, na wa uligaga, wine ushibi huhola. ²⁸ Mlume gwiuhula wa usumwa wa miishi, na wa buhobu, na wa uchunguluwa mswe; ²⁹ wigyata wa ubabatababata mchuba, na ushigililwa mnda madila mobe; gogwe masugu mose wimonenywa na uwaswa kole, na hashi mtu gwa uuhogonona. ³⁰ Wisindila mmachi na gunge mtu gwilala nage; wugubaa ndu na ushishama mo; wiuna mizabibu na ushiya biguma byago. ³¹ Ng'ombe gyobe gyishinjiwa u meeso mobe, ushiya nyama chagyo; wisapwa punda gyobe u mbele wa meeso mobe wa anene, ushigishiwichiwa; myoo gyobe gyihewa tumangu tobe, ushibi na mtu gwuhogonona. ³² Bawalubaga bobe na misiha gyobe bihewa gunge mmoga; na meeso mobe milungamina, na uchiminya malanga wa ubasimba chuba lyose; na hashibi na uosha o ose mnda uboo obe. ³³ Biguma bya sii gyobe, na asusu obe ose, byiliwa na mmoga gwine goshigidi; wimonenywa ka, na uswagwa hasi masugu mose; ³⁴ na byolibi na miishi wa byine byimonywa na meeso mobe, byolimona. ³⁵ Mlume gwiuhula wa machwi na magulu wa ihute ya yata, yoshonaosha ugilahwa, utula yaasa-asa ya ugulu ndaa na lubombo lwa mswe. ³⁶ Mlume gwiuhila gogwe na oolo lyobe lyine lyolibiya uba hegulu hobe, u mmoga goshigidi gogwe na ata bamasobe; na gogwe uya wigilila tunge tubetcha twa miti na twa mawe. ³⁷ Gogwe ubi ugagicha, na mida, na unenuna, hawingi ha mioga gyose uya wine wiulombwela Mlume. ³⁸ Matete mengi wigya namo u lubala, alakini wisola biicho, bululi njige chyiya mo. ³⁹ Wiuna mizabibu na ugiseulila, na ushinywa u ibugu yagyo, na ata usola yulu byiliwa na byolo. ⁴⁰ Ubi na mizeituni u ng'umba chobe chose na ushilishinya mauta magyo; bululi mzeituli gobe gwiukumuwa. ⁴¹ Wibuta bawalubaga na bawamisiha, alakini bashibi bobe gogwe; bululi bigya u bucha. ⁴² Miti gyobe gyose, na biliwa bya sii gyobe, bibi bya njige. ⁴³ Mgenyi goli nage, gwigililila uguluwa hegulu hobe; na gogwe wigililila usala hasi. ⁴⁴ Gee gwiugambya, alakini gogwe ushimgambya; gee gubi mswe, gogwe ubi mmila. ⁴⁵ Na buloga buno bose bwiuchwilia hegulu hobe, bwiulama na uuwata, ndaa na uchimiwe, bululi ushihuliche liidi lya Mlume, Abetcha obe, uusa ugala wage na alago age eliusambile. ⁴⁶ nao abi hegulu hobe bisaga na bigagicha, nanhegulu ya ibushi yobe milumbu; ⁴⁷ bululi ushimgilile Mlume, Abetcha obe, na useelela wa mtima gwa utona, wa yulu ya bwingi bwa bitundu byose; ⁴⁸ wa bibyo witugilila tumangu tobe twelihila Mlume hegulu hobe, wa ndaala na wa yuma, na wa buchi, na wa lusabo lwa bitundu byose; nage gwiuhamba mioshi mobe igela, ndaa na byelihwa uuchimya. ⁴⁹ Mlume gwiuchwishicha mmoga hegulu hobe uhuma koo, uhuma u songo gya ibaloo, nahi bisuguluwa loochi; mmoga goshigidi liidi lyabo; ⁵⁰ mmoga gwine buli na yenyi ya buhuchi, gwine gushi hulola yenyi ya mmungu, na gushi hugegamina bawalubaga; ⁵¹ nage gwiya ibushi ya ng'ombe chobe cha usugwa, na biliwa bya sii gyobe ndaa na byolihwa uchimiwa; na gushiushigila bisolaganywa, ata na ibugu, ata mauta, ata migoma gya ng'ombe chobe, ata baana ba myoo gyobe, ndaa na byelihwa uuchimya. ⁵² Nage gwiuchunguluwa u michango gyobe gyose, na na bibambacha byobe bya bilahu, byina bigumbo, gyobele huudagila, gyigwa mnda sii gyobe gyose ngubi chose; nage gwiuchunguluwa u michango gyobe gyose ngubi chose, mnda sii gyobe gyose gyeliuha Mlume, Abetcha obe. ⁵³ Gogwe wiiya ibushi ya gumo lyobe gogwe mine, nyama cha bawalubaga bobe na cha misiha gyobe gyine gyiuhele Mlume, Abetcha obe; yulu ya bitunga na yulu ya uhinywa ulihinywa na tumangu tobe. ⁵⁴ Mlumyana hawingi henyu mine guli na m'bili gwa lebelebe na m'bongu abisa, liiso lyage libi na buwa yulu ya mshiwabo, na yulu ya mmachi gwa myaali yage, na yulu ya mihona gya baana bage bene bashigele nage; ⁵⁵ Na gushiunda gumwe gwabo gahewe nyama cha baana bage bene beliya, bululi hashi ibya yine ishigele weli; yulu ya bitunga na yulu ya uhinywa olihinywa na tumangu tobe u michango gyobe gyose. ⁵⁶ Mmachan hawingi henyu mine guli na m'bili gwa lebelebe na gwa gubongu, mine gushigugicha yaasa-asa ya ugulu wage ugyatila u bitete yulu ya buhungwe bwage na ubonga wage, liiso lyage gugo libi na buwa yulu ya mlumyage gwa m yaali yage, na yulu ya bawalubaga bage na yulu ya bawmisiha bage, ⁵⁷ na yulu ya alenge age ene ahumine mpanga magulu mage, na yulu ya baana bage bene belibuta; bululi gwibaya wa lubisagulu; wa usaba wa bitundu byose; wa yulu ya itunga na uhinywa welihinywa na tumangu tobe u michango gyobe. ⁵⁸ Nambo ushihuunda uusa ugila binywa byose bya guno m'bindo byine bigolilwe mnda ino itabo, waoshe unyemya china lino lya ugema na lya luteshi, Mlume, ABETCHA OBE; ⁵⁹ haho noo Mlume heliita bihulo byobe byabe bya bigagicha, na bihulo bya ibushi yobe, bihulo byata bya chigilwe, byasinge abisa. ⁶⁰ Nage gwiulushisha bisumi byose bya Misli hegulu hobe byine byolibele humona booba, nagyo byiuchwila. ⁶¹ Iyaka usumwa o ose, na bihuli byo byose byine bishibigolwe mnda itabo ya guno m'bindo, Mlume gwiubiya hegulu hobe, ndaa na byolihwa uchimiwa. ⁶² Benywe mwishigala baacho wa lubalo lwenyu, benywe bene mubele bengi nahi mlingilisho gwa tumbala-mbala twa gulu; bululi ushihuliche liidi lya Mlume, Abetcha obe. ⁶³ Iyaka habi, nahi biya byelibele huseelela Mlume yulu yenyu wa umgilila bya yano na ummiita uba bengi, noo byeliseelela Mlume yulu yenyu wa umchiminya na umchimya; benywe mwidandulwa mnda gigyo sii gyamwigingila ugihyilila. ⁶⁴ Mlume gwimsala hawingi ha mioga gyose, utula songo gigi gya ibaloo ndaa na songo gigi gya ibaloo; nangogwe uya wigilila tunge tubetcha twine toshigidi gogwe ata na bamasobe, nagyo m miti na mawe. ⁶⁵ Na hwingi ha gigyo mioga ulimona ulihocha o ose, na ushibi na ihana ya ubiila yahi ya ugolu obe; alakini uya Mlume gwiuha mtima gwa udanda, na meeso ma ubumbwa na luhuda lwa malilo. ⁶⁶ Na mwego gobe ubi wa adugwa u mbele obe, gogwe ubi na booba busugu na mchuba, na ushiudagila mwego gobe; ⁶⁷ Lwelo wigana, Yisuba igolo! Na igolo wigana yisuba lwelo! Yulu ya booba bwa mtima gobe gyagwinyemya, na umona wa meeso mobe byolimona. ⁶⁸ Mlume gwiugiwicha iyaka Misili na mbwato, wa giya ndila gyandiusambile, Ushigimona iyaka ho hose; na benywe uya mwiligucha bichuli-chuli byenyu bya mwego u tumangu twenyu uba bacha nabagichi ba baachana, ata bibyo hashibi mine gwimgula.