¹ Musa na baulu ba Isilaeli balagene na baya batu babasambile, Uuswe malagano mose mandihumlaga lino. ² Na byabe, lusugu lwamwidabuwa Yolodani ugya mnda sii gyeliuha Mlume, Abetcha obe, waligimyile mawe ma mata wamashilibe, na ushiliba, ³ ubigole binywa byose bya guno m'bindo hegulu hamo, holihwa udabuwa; yulu waoshe ugingila mnda sii gyeliuha Mlume, Abetc obe, sii gilihuhongolowa mabele na bui, nahi byeliulagile Mlume, Abetcha a bamasobe. ⁴ Na byabe, hamwihwa udabuwa Yolodani mwagimiya mawe mano, mandihumlaga bino lino, u loono Ebeli, gogwe washilibe ushiliba. ⁵ Na haya wamgimyile Mlume butambikilo, Abetcha obe, butambikilo mwa mawe, ushibiya ibya yo yose ya igele hegulu habo. ⁶ Ugubai bubo butambikilo bwa Mlume, Abetcha obe, bwa mawe mamabachwe; wamtangile Mlume, Abetcha obe lutangi lwa uchigya hegulu habo, ⁷ watangile na lutangi lwa talala, waye uya; gogwe waseelele u mbele wa Mlume, Abetcha obe,. ⁸ Hanyuma, wagole hegulu ha mamo mawe binywa byose bya guno m'bindo gose, wa hululu abisa. ⁹ Musa na bibuli Balawi babasambile ba Isilaeli bose baganine, Shama pii, Ee Isilaeli; lino usili batu ba Mlume, Abetcha obe, ¹⁰ Bino uhuliche liidi lya Mlume, Abetcha obe, wagile malagano na alago age enenandihuulaga lino. ¹¹ Musa gubalagile batu loka luya lusugu, guganine, ¹² Bano na bagimane u loono lwa Gelizimu yulu ya ubahalila batu mihaa, hamwihwa udabuwa Yolodani; Simeoni, na Lawi, na Yuda, na Isakali, na Yusufu, na Benyamini; ¹³ Bano bagimane hegulu ha loono lwa Ebali yulu ya buloga; Leubeni, na Gadi, na Asheli, na Zabuloni, na Dani, na Naftali. ¹⁴ Hanyuma Balawi na baagae, babasambile bato bose ba Isilaeli wa liidi mbila, ¹⁵ Na gaalogwe mtu gwiita mmishi gwa ubada, ao gwa usumbulula, m ludogya wa Mlume, mgilo gwa maboo ma mtumbi, gabegugimiya ya bubisa. Na batu bose baagae, baagane, Bibe bibyo. ¹⁶ Na gaalogwe mine gwinenuna sage ao mnage. Na batu bose baagae, Bibe bibyo. ¹⁷ Na baalogwe mine gwihunya lugumba lwa m'binji nage. Na bato bose baagane, Bibe bibyo. ¹⁸ Na gaalogwe gwimchiminya ihobu umlubya ndila. Na bato bose baagane Bibe bibyo. ¹⁹ Na gaalogwe mine gwihugulula uonona wa mgenyi, na shige, na m'bwile mine guwililwe na mlumyage. Na bato bose baagane, Bibe bibyo. ²⁰ Na gaalogwe mine gwilala na mmachi gwa sage, bululi gwaunina bichwalaganywa bya sage. Na batu bose baagane, Bibe bibyo. ²¹ Na gaalogwe mine gwilala na nyama gya mmoga go gose. Na batu bose baagane, Bibe bibyo. ²² Na gaalogwe mine gwilala na kachage, msiha gwa sage, ao gwa mnage. Na batu bose baagane, Bibe bibyo. ²³ Na gaalogwe mine gwilala na buo bwage, mnage buo. Na batu bose baagane, Bibe bibyo. ²⁴ Na gaalogwe mine gwimmula miinage wa bubisa. Na batu bose baagane, Bibe bibyo. ²⁵ Na gaalogwe mine gwiguha alambwe a umaga mine gushi na ibalo. Na batu bose baagane, Bibe bibyo. ²⁶ Na gaalogwe mine gushiwasha binywa bya guno m'bindo wa ubigila. Na batu bose baagane Bibe bibyo.