¹ Na babibi, holihwa ugingila mnda sii gyeliuha Mlume, Abetcha obe, gibe buhyana, na ugihyilila, na ushama mnda mwagyo; ² haho waguhe mtomwe gwa bitete, golisola uhuma mnda sii gyeliuha Mlume, Abetcha obe; wabibiye mnda itanga, wagye ndaa nanihana iya yine yelisobola Mlume, Abetcha obe, yulu ya ulishamya china lyage uya. ³ Wagye uli ibuli yine ibiho maya masugu, wamsambile, Nagitabicha lino wa Mlume, Abetcha obe, ugana nagingila mnda sii gyelibalahile paa Mlume bamasetu ugana gwituha. ⁴ Nayo ibulu yiguha iya itanga uhuma mmuboo obe, gaibiye hasi u mbele wa butambikilo bwa Mlume, Abetcha obe. ⁵ Gogwe wagae, wagane u mbnele a Mlume, Abetcha obe, Tata gubele Mmalamenea hoka na uchimina, gusalile Misili, gushamine uya u bugenyi, nabo babele bacho wa lubalo lwabo; gee nuuba mmoga gwata ubo, gwina uoma na batu bengi. ⁶ Bamisili batumonene, batususule, batugudiche bucha bwa bwata. ⁷ Tumlilile Mlume, Abetcha a bamasetu; Mlume guhuliche madi metu, gumonine na tuhunago twetu, na migilo gyetu, na umonenywa wetu. ⁸ Mlume gutuhuminye uhuma Misili wa uboo wa uoma, na wa uboo wa ugolobu, na wa luteshi lwingi, na wa bisaga, na wa bigagicha. ⁹ nage gwatugingicha ino ihana, na utuha gino sii, sii vya gigiluchu mabele na bui. ¹⁰ Na bino, loola, nalusha mitomwe gya gyunaganywa bya bitete byolipele, Ee Mlume. Hanyuma waibiye hasi u mbele wa Mlume, Abetcha obe, waginame u mbele wa Mlume, Abetcha obe. ¹¹ waseelele na yano yose yine yeliuhele, Mlume, Abetcha obe, na ndu gyobe, gogwe na Mlawi, na mgenyi mine goli nage. ¹² Hene holihwa utangila imwechi ya umi, u imwechi ya umi yobe ya biliwa bya mwaa gwa butatu, goo noo mwaa gwa utangila imwechi ya umi, wamme Mlawi imwechi ya umi, na mgenyi, na shige, na m'bwile, yulu baaye ha michango gyobe na ugyuta; ¹³ gogwe wadogome u mbele wa Mlume, Abetcha obe, Bibya bya bihaha nabihunya mnda ndu gyanyi, na nene nabaha Balawi, na mgenyi na shige, na m'bwile, nahi ulaga ube ose olisambile; nishilubile ulaga obe o ose, na nishiugibilile; ¹⁴ u bibyo bibya nene nishibilile mengo ma ushama u malilo, na nishibihuminye na ubibiya mibamba hambele na bunyenye, na nishibitangile u babu bibyo bibya; liidi lya Mlume, Abetcha anyi, nilihuliche, nigilile byose, nahi byelisambile. ¹⁵ Ulingamine uhuma ha bushamo bobe buhaha ha gulu, ubahalile mihaa batu bobe Isilaeli, na sii gyolibahele nahi byolibalahile pa bamasetu, sii gilihuhongolowa mabele na bui. ¹⁶ Lino hano guusambila Mlume, Abetcha obe, uite ano alago na uonona; bino ubyuse na ubigila wa mtima gobe gose na luhuda lobe lose. ¹⁷ Wamgana Mlume lino, ugana gee noo Abetcha obe, na ugana byulingye ugyata mnda madila mage, na uusa alago age na malagano mage, na uonona wage, na uhulicha liidi lyage; ¹⁸ Nage Mlume guugana hano lino mmoga gwa gubagulwe gube gwage gee, nahi byelilagile, na ugana byulingye uwasha malagano mage mose; ¹⁹ na ugana gwiuginuna hegulu ha mioga gyeliitile, wa punda, na china, na bunyemu, bululi gogwe wabe mmoga guhaha gwa Mlume, Abetcha obe, nahi byeliganine.