¹ Habeba na paa hawingi ha batu, babegya ululiwa, na babo batululiya babebaluliya; bamme kiine mine gwina kiine, na bammonone bulubi guya mlubi; ² na bibe bino; nambo bimlingye ugulwa guya mlubi, galachiwe hasi na aluliya, gahulwe u mbele wa meeso mage, ulamana na uluba wage, wa ubala byose. ³ Gunaosha uhulwa tuti maumi mana gashibuche gashichwe umoneya mshiwenyu uba gwanenunywa obe, helim'budicha umuulatuti twingi uhima tuto maumi mana. ⁴ Ng'ombe ushigihambe anywa mengo magili huhula biliwa. ⁵ Habishamahamwechi mtu na mshiwabo, gumwe gwabo gabewa, na gushi na mwaana gwa mlumyana, mmachi gwa guya mine guwile gashigonjwe hambuga na mgenyi; mahiwabo na guya mlumyage gamgingilile gam'biya wage gabe mmachage, gammitile bilingye mshiwabo naq mlumyage. ⁶ Na byabe, guya mine gwibuswa gwa mtangi, gwiginyiwa china lya mshiwabo mine guwile, lishichwe uchimwa china lyage mnda Isilaeli. Na guya nambo gushihuunda uguha mmachi gwa mshiwabo, guya mmachi gwa mshiwabo gaagye u michango gya baulu, gabasambile, Mshiwabo gwa mlumyanyi gulihuhanya uigimiya china lya mshiwabo mnda Isilaeli, gushihuunda ungilila bimlingye mshiwabo mlumyanyi. ⁸ Haho noo baulu ba mbuga gyage baadogome nage; nage gagimane na ugana, Nene nishihubenja umguha guno mmachana, ⁹ bibyo mmachi gwa mshiwabo gammyile u mbele wa babo baulu, gamchule mkalabanda u ugulu wage, na umsululi mate ma yenyi; hanyuma guya mmachana gwigaa, ugana, Mlumyana gwihanya umgubaila mshiwabo ndu gyage na gaiswe bino, ¹⁰ Na china lyage gagiswe bino mnda Isilaeli, Ndu gya mchulwa gwa mkalabanda. ¹¹ Balumyana hababi na paa boo wa boo, gabeshena mmachi gwa gumwe, yulu ya umogonona mlumyage mnda uboo wa mine guli hummula, guya mmachana noo uhila uboo wage, na um'bwata u buchi bwage; ¹² waugede uya uboo wage, liiso lyobe lishibe na misa. ¹³ Ushibe na mawe ma ulingilila namo ma mahishanye, lyata na licho, mnda ahwaba obe. ¹⁴ Ushibe na byulingilila bya bihishane, yaata na icho, mnda ndu gyobe. ¹⁵ Ube na liwe lya liwilile lya kiine, ube na lulingo lwa luwilile lwa kiine; masugu mobe mabe mengi, mnda sii gyine gyiuha Mlume, Abetcha obe. ¹⁶ Bululi bose bene bigila bikoko nahi bibyo, bose bene bigila bishi bya kiine, m ludogya wa Mlume, Abetcha obe. ¹⁷ Engelecha byuitile Ameleki m ndila gyam'bele huhuma Misili; ¹⁸ nahi byeli ubangile mnda ndila, gubalwile bita batu bobe bene bashigele mnyuma, bose bene bashibele huosha lwendo mnyuma mwenyu, holibele mmimu na uchiminya malanga; ushimnyeminye Abetcha. ¹⁹ Bino, bibi haya hene heli uita ulituche Mlume, Abetcha obe,, hawingi ha tumangu tobe tose twine tuli mibamba, mnda sii gyiuha Mlume, Abetcha obe,, gibe buhyana ugihyilile, noo holichima kengelecho gya Ameleki hasi ha gulu; ushigibilichi.