¹ Nambo mtu gabeguha mmachi wa umgonda, gusahuba na iuli u meeso mage, bululi gwamona inywa ya isone weli, nan gamgolele mkanda gwa umleya, na ugubiya m'muboo wage, na umunya mnda ndu gyage. ² Nage gabehwa uhuma mnda gyage, gwina luhusa lwa ugya na uba mmachi gwa gunge mtu. ³ Na guya mlumyage gwa mmya gabemmonywa, na umgolele mknda gwa umleya, na umma m muboo wage, na umunya mnda ndu gyage; ao gabewa guya mlumyage gwa mmya, mine gumguhile uba mmachage. ⁴ guya mlumyage gwa mtangi mine gumshigile gashimguhe uba mmachage iyaka, gabehwa ubiwa bunyenye; bululi bibyo m lugugicha umbele wa Mlume; yulu ya bibyo ushigibiya sii mnda buubi; gyine gyiuha Mlume, Abetcha obe, gibe buhyana bibe. ⁵ Mtu gabegonda mmachi gwa mmya, gashigye u bita hamwechi na basolokoto, nangashihewe mgilo go gose gwa gugumu; gashame menjwa mwaa gumwechi gugima m ndu gyage, yulu gamseeleche mmachage mine gwagaguha. ⁶ Mtu ge gese gashuiguhe liwe lya uhelela, lya pelo ao lya hasi, uba usendeya; bululi m yuguha mwego gwa mtu usendeya. ⁷ Mtu gabemoneya umgiba gumwe mshiwabo ge gese mwaana gwa Isilaeli, ummita uba mcha, ao umgucha; gugo miibi gawe; bibyo noo byolihunya usona hawingi hobe. ⁸ Lingamina ibakla ya bushondo, uuse wa chigilwe, wa ugila mlingilisho gwa byose byabibagigya ba bibuli Balawi; muuse wa ugila byoka biya nahi byandibasambile bo. ⁹ Engelechiwe, Mlume, Abetcha obe, byelimmitile Miliamu mnda ndila hamuhumine Misili. ¹⁰ Holimsendeela m'binji nobe yo yose yine isusendewa ushigingile mnda ndu gyage ugya uguha sendeo weli. ¹¹ Gimana hambuga, guya gulisendeye weli gulushishe hambuga giya sendeo ¹² Nage gwahuba m mbuchu, ushilachi na sendeo gyage. ¹³ Godogodo wamgiwidiche sendeo chuba halyisala, yulu galale na bichwalaganywa byage, na uumbatila; nagyo gibi m kiine gyobe u mbele wa Mlume, Abetcha obe. ¹⁴ Ushimmonene mgichi gwa uhigwa nage m mbuchu na msabi, uba m mshiwenyu, ao nambo m gumwe mgenyi mine guli mnda sii gyobe, ha michango gyobe; ¹⁵ umme alambwe age wa masugu mage, na chuba lishisale weli; bululi m mbuchu, mtima gwage gwaudagila ao alambwe; gashichwe umlilila Mlume yulu yobe, bo nuuba buubi oli. ¹⁶ Bashibaana bashigagwe yulu ya baana babo, na baana bashihagwe yulu ya bamasabo; mtu ge gese gahagwe yulu ya buubi bwage gee mine. ¹⁷ Ushihuguluye uonona wa mgenyi, na shige; na ushiguhi bichwalaganywa bya m'bwile, bibe sendeo; ¹⁸ bino uengeleche ugana ubele mcha uya Misili, Mlume, Abetcha obe, guuhogonone uya; wa bibyo nihuusambila ugile ino inywa. ¹⁹ Holisola bisolaganywa mnda lubala lobe, ubegibilila mkanda mlubala, ushigiwile uguguha; na gube gwa mgenyi ao gwa shige, ao gwa m'bwile; yulu Mlume, Abetcha obe, guhalile mihaa u migilo gyobe gyose gya maboo mobe. ²⁰ Holisola biguma bya mizeituni gyobe, ushigiwile usola lwendo lwa bubili; byine bishigele byahewe mgenyi na shige,, na m'bwile. ²¹ Holisola zabibu mnda lubala lobe lwa mizabibu, ushisole lwendo lwa bubili; chine chishigele chihewa mgenyi na shige, na m'bwile. ²² Gogwe uengeleche ugana ubele mcha mnda sii gya Misili; wa bibyo nuusambila ugile ino inywa.