¹ Mine gubongowile mmigandaganda, ao usi m'bili wage, mtu gugo gashigingile mnda sumbilo lya Mlume. ² Mwana gwa ubuswa u masei gashigingile mnda sumbilo lya Mlume; ndaa na ibushi ya umi gashigingile mine guli gwage, mnda sumbilo lya Mlume. ³ Mmamoni ao Mmoabu bashigingile mnda simbilo lya Mlume; na ata ibushi ya umi mtu gwabo gashigingile mnda sumbilo lya Mlume milumbu; ⁴ bululi haya hene hamuhumine Misili bashimgaile na biliwa na ata na maadi m ndila; na bululi yulu yobe bammigile Balaamu mwaana gwa BBeoli uhuma Petholi gyine gili Mesopotamia, gachwe umloga. ⁵ Alakini Mlume, Abetcha obe, ashigitabiche ummulicha gugo Balaamu; Mlume, Abetcha obe, gugalule buya buloga uba mihaa, wa biya byeliuundila Mlume, Abetcha obe. ⁶ Usheenge talala gyabo ao luhanga lusoga lwabo masugu mobe mose milumbu. ⁷ Ushimmonywe Mmedomi; bululi m mshiwenyu; ushimmonywe Mmisili, bululi ubele mgenyi mnda sii gyage. ⁸ Baana babo bene bibuswa mnda ibushi ya butatu baagingile mnda sumbilo lya MLume. ⁹ Holichuwa ugya nahi solokoto ulwa na tumangu tobe na gogwe uli mnda bushamo, liuse na inywa yo yose ya ibii. ¹⁰ Hahube wenyu uli ge gese gushi mmaha yulu ya byine byamchwila m'busugu, gaahume hambuga ha kambi, na gashigingile mnda mwa lilyo kambi. ¹¹ alakini hamasibi mengo ma igolo gaaligoge maadi; na chuba hailsibi lyahuhwa uchinda gwigingila mnda kambi. ¹² Iyaka wabe na ihana hambuga ha kambi, ha utobwela hambuga. ¹³ gogwe wabe na ahamba a lwasu u tuya tulume gela tobe; haho holitondama hambuga wadabe na luya lwasu, wagaluwe na uhulila yine yiuhuma mnda; ¹⁴ bululi Mlume, Abetcha obe, gwiuenena mnda kambi guhogonone, na uuhuminya tumangu tobe hambele hobe; wa bibyo kambi gyobe gyabe gihaha; gashichwe umona itu ya igugichu oli, gee nuugaluwa na uushiga. ¹⁵ Ushimgiwiche wa mlumyage mcha mine gwalihogonona uhuma wa mlumyage na uchwa obe; ¹⁶ na gashame nobe, hawingi hobe, ha gumwe mchango gobe, ihana yelisobola uba isoga u meeso mage; ushimmanane. ¹⁷ Hashibe na sengu hawingi ha misiha gya Isilaeli, na hashibe mmube gwumwego u baana ba Isilaeli gwa mlumyana. ¹⁸ Ushilushe alambwe a sengu, na alambwe a aawa, mnda ndu gya Mlume, Abetcha obe, wa yulu ya ulibindila o ose; bululi ubo myugugila u meeso ma Mlume, Abetcha obe, byose byopi. ¹⁹ Ushimgambye mshiwenyu yulu ya ugiwidichiwa na alambwe; alambwe a lusuu, alambwe a biliwa, alambwe a ibya yo yose yine igambilwe wa alambwe; ²⁰ mgenyi unaosha ugambya wa alambwe, alakini ushimgambye mashiwenyu wa alambwe; alakini Mlume, Abetcha obe, gaoshe uuhalila mihaa wa yo yose yine yoliuda na uboo obe, mnda sii gyoligingila ugihyilila. ²¹ Holibiya ulibindila wa Mlume, Abetcha obe, ushisinge uuhunya; bululi Mlume, Abetcha obe, gushileya uusaba oli; nao bino ubi buubi oli. ²² Alakini nambo walichibila ubiya ulibindila, hashibi buubi oli. ²³ Byine bihumine mnda milomo gyobe uuse ubigila; nahi mlingilisho gwa byine byolim'biile Mlume, Abetcha obe, m lutangi lwa uhana wa mima olilagile wa aanya obe. ²⁴ Holigingila mnda lubala lwa mizabibu lwa m'binji nobe, uamosha uya zabibu na ugyuta, nahi byolihubenja; alakini ushibiya mnda ndaha gyobe. ²⁵ Ubegingila mnda byumaganywa bya m'binji nobe unaosha uhulula ma pulula na uboo obe alakini ushigechi na ahilu byunaganywa bya m'binji nobe.