¹ Holimona ng'ombe gya mshiwenyu ao mmoo gwage gwachimina, ushilibise nahi usamona; godogodo wawigigiwicha wa mshiwenyu. ² Na nambo mshiwenyu gushi hoka nobe, ata uba ushimgidi, wagigihue u ndu gyobe, wabe nagyo ndaa na byelichwa ugienga, gogwe wagigiwiche. ³ Iyaka waite bibyo yulu ya punda gyage; iyaka waite bibyo yulu ya bichwalaganywa byage; iyaka wagile bibyo yulu ya byo byose yine ichimine ya msiwenyu, yine ichimine gogwe ubeimona; ushilibise nahi ushiimonine. ⁴ Holimona punda gya mshiwenyu, ao ng'ombe gyage, gyagwa mibamba mwa ndila, ushilibise nahi ushigimonine; godogodo wimbwatilichaugidabula iyaka. ⁵ Mmachana gashichwale bichwalaganywa byine bilingye mlumyana, na ata mlumyana gashichwale bichwalaganywa bilingye mmachana; bululi ge gese mine gwigila bikoko naho bibyo m ludogya wa Mlume, Abetcha obe. ⁶ Iisa ya anonyi ibemoneya u mbele obe m ndila, u mti go gose, ao hasi, yina baana ao magi, nayo inonyi ili ilalile baana, ao ili hegulu ha magi, ushiiwate inonyi hamwechi na baana bayo; ⁷ godogodo wiileya inonyi iguye lwayo, alakini baana unaosha ubaguha nuugya nabo; yulu waoshe ugililwa, uite masugu mobe uba mengi. ⁸ Hoiligubaa ndu gya gihya, wagimiye mgumbo mibamba mwa ndu gyobe, ushichwe uchwisha maashi yulu yobe, mtu gashichwe ugwa waguli. ⁹ Ushiune mlubala lobe lwa mizabibu mioga gibili gya matete; bishichwe uhunyiwa biguma byose, matete moliunine na bisolwaganywa bya mizabibu gyobe. ¹⁰ Ushilimi na ng'ombe hamwechi na punda balihubula lwasu lumwechi. ¹¹ Ushichwale ichwalaganywa yine ili ichangwe na sufi na bupamba hamwechi. ¹² Ushiitile byaama bya buluba u masunga ma bichwalaganywa byobe bya uliwila. ¹³ Mtu gabeguha mmachi, ulala nage na ummonywa, ¹⁴ hanyuma na ugaba yaabo yulu bikoko bya abule na umginyiya china lya lidogu, ugana, Nimguhile guno mmachana, nene handimmyile nishimonine weli imwe ya bunyundu bwage. ¹⁵ haho sage na guya msiha na mnage noo habiguha ya umonya bunyundu bya guya msiha, baabahe baulu ba mbuga u malimbwa; ¹⁶ na sage na guyavmsiha gwasambile baulu ba mbuga, Guno mlumyana nimmele msiha gwanyi gabe mmachage, nage nuumonywa; ¹⁷ lingaminywe, gwam'biya bikoko bya abule, gwagana, Nisamona uli msiha gobe bya bunyundu. Na baabungule iya isanjwa u mbele wa baulu ba mbuga. ¹⁸ Bibyo baulu ba mbuga bamguhe guya mlumyana na ummonona. ¹⁹ bamlipishe shekeli sambi cha lusuu, bamme sage na guya msiha, bululi gwamgugidicha china guya msiha gwa Isilaeli; nage gaabe mmachage; gushi na luhusa lwa ummanya masugu mage mose. ²⁰ Alakini yahuba m winene iya inywa, wa nangu umoneya weli bya bunyundu bwage; ²¹ haho bamtobole hambuga guya msiha ha mchango gwa sage, balumyana ba mbuga gyage bamte mawe ndaa na byeliwa; wa biya byeligilile bya buhugi mnda Isilaeli, wa uita lusengu mnda ndu gya sage; bibyo noo byolihunya usona hawingi hobe. ²² Gabewatililwa mlumyana na mmachana gwa mgonjwe na mlumyage, bibyo bahaagwe bose babili, mlumyana mine gulalile na mmachana, na guya mmachana nage; bibyo noo byolihunya usona hawingi ha Isilaeli. ²³ Habeba msiha gwasindilwa na mlume, na mlumyana gabem'banga mndila; ge nulala nage; ²⁴ batobolwe hambuga ha limbwa lya giya mbuga, mwabate mawe ndaa na byabiwa; guya msiha bululi bushigabile na liidi, nage guli mnda mbuga; na guya mlumyana, bululi gwamgugicha wa guya mmachi gwa miinage; noo byolihunya usona hawingi hobe. ²⁵ Alakini nambo guya mlumyana gwam'banga u lubala guya msiha gwa gusindilwe, nage mlumyana gwamdogya wa uioma, nulala nage; guya mlumyana mine gwalala nage wa uloma gaahagwe gee buchima; ²⁶ alakini yuga msiha usaguita atu; gushi na buubi guya msiha bulingye ugagwa, bululi m mnlingilisho gwa mtu umginywina miinage na ummaga, noo bili iyo ihisho; ²⁷ bululi gubangilwe u lubala; guya msiha gwa gusindilwe gulilile, na hashibele matu gwa ummogonona. ²⁸ Nambo mlumyana gabemmona msiha gwili inyundu gusinasindilwa, ge nuubwata na ulala nage, babemonywa; ²⁹ guya mlumyana mine gulalile nago guya msiha gahe sage shekeli maumi matano ma lusuu, hanyuma na gabe mmachage, bululi gumdogiche; gushi na luhusa lwa umleya masugu mage mose. ³⁰ Mtu gashiguhe mmachi gwa sage, na gashibuluchi sunga lya bichwalaganywa bya sage.