¹ Nambo habemoneya mtu gwahagwa mnda sii gyeliuha Mlume, Abetcha obe, ugihyilila, mlachu mlubala, na gushigichiwe m nanyi gummagile; ² haho batobowe baulu na tululiya tobe; nabo baalingilile haya ndaa na mabuga mene mali mamchungulubu gugo mine guhagilwe. ³ na gyahuba, mbuga giya gyine gili hoka na guya mine guhagilwe, baya baulu ba giya mbuga baaguhe mchibe gwa ng'ombe, gwine gushinagila mgilo gwa ubula kasu cha ulima wa uhambwa mti gwa mioshi. ⁴ baulu ba gigyo mbuga baaguhe guya mchibe ndaa na wibetabwta yine ili na maadi ma luudi, yine ishibalimwa, na ishibaonywa, baagonoge oshi lyago guya mchibe uya wibetabeta. ⁵ nabyo bibuli baana ba Lawi baashene hoka, bululi noo basobolwe na Mlume, Abetcha obe, bamgilile, na ulihalila mihaa china lya Mlume na inywa yo yose yine yiitilwa mahindi, na bihulo byo byose, bibi ulamana na binywa byabo. ⁶ na baulu bose ba giya mbuga, gyine gili hoka abisa na guya mione guhagilwe, na bagoge maboo mabo hegulu ha gogu mchibe gwine gunogilwe oshi lyago uya wibetabeta; ⁷ Na baagaane, ugana, Maboo metu mano mashigesile mano maashi, na ata meeso metu mshimamonine. ⁸ Ee Mlume, leelela batu bobe Isilaeli, bolohogonone, na ushilee maashi ma mine gushi mlubinushama hawingi ha bato bobe Isilaeli. Na maya maashi mileelelwa wabo. ⁹ Bibyo noo byolihunya maashi na mine bushimlube hawingi hobe, hene holigila bya bisoga u meeso ma Mlume. ¹⁰ Hene holigya u bita ulwa na tumangu tobe, Mlume, Abetcha obe, helibabiya mmaboo mobe, gogwe holibawata kole, ¹¹ ubemona hawingi ha kole hungwe lya mmachana, wahubiya itima weli, ubesimba umguha gabe mmachobe; ¹² bibyo ugye nage wenyu u ndu gyobe, nage gwibega mswe, gagede na ndaala. ¹³ gaachule na bichwalaganywa bya uwaswa kole wage gaashame mndu mwobe, gababiile malilo ba sage na mnage mwechi gugima, hanyuma noo wabegingila weli wabe mlumyage, nage gaabe mmachobe. ¹⁴ Iyaka holomona ushi na saso nage, wamme luhusa gaagye welibenja; alakini ushimguche abisa na lusuu, ushimmite nahi mcha, bululi umdambiche mmee. ¹⁵ Nambo mtu gwina baachi bopi, guli huunda gumwe na gushi huunda gunge, nabo bamtila baana, gwili huunda na gweshi huunda bose bopi; na bubele bwage m mwaana gwa guya mmache mine gushi baunjwa; ¹⁶ bibyo bibi ugana helibahyanya baana bage byeli nabyo, gashim'biye guya mwaana gwa mine gusuunjwa uba bubele bwage u mbele wa guya gwa mwaana gwa mine gweshibaunda, nage noo bubele bwage bubo. ¹⁷ alakini, gamgitabiche buya bubele bwa guya mine gweshibaunda, wa umma mitala gibili gya byose byine byeli nabyo; bululi noo butulilo bwa uoma wage; kiine gya bubuswa bwa butangi m bwage gee. ¹⁸ Mtu gwahuba nabmwaana gwa buhulihuli, mmugi, gushibanyemya liidi lya sage, ao liidi lya mnage, inangwa bamsangula tuti gushibabahulicha. ¹⁹ bibyo sage na mnage bam'bwate, na ummila u baulu ba mbuga gyage, u mchango gwa mbuga gyage. ²⁰ babasambile baulu ba mbuga gyage, Gugu mwanetu gwina buhulihuli, m mmugi, gwina anene, gushibahulicha madi metu; m gwa masei, kolwambi. ²¹ Balumyana bose ba mbuga bamtelele mawe, gawe; bibyo noo byolihunya uosa hawingi hobe; na Isilaeli yose habihulicha bimona booba. ²² Nambo mtu bageita buubi bwine bulingye uwa, gabehagwa, gogwe wamsunduye hegulu ha mti; ²³ itumba yage ishishame busugu bose nabo nuuya yili hegulu ha mti; godogodo wimchiya loka lulo lusugu; bululi mine gusundiwe gulogilwe na Abetcha; ushichwe ubiya bunyenye mnda sii gyobe gyiuha Mlume, Abetcha obe, gibe buhyana bobe.