¹ Holichuwa ugya ulwa bita na tumangu tobe, na umona falasi, na tubilibili na batu bengi uuhima gogwe, ushibamone booba, bululu Mlume, Abetcha obe ali hqamwechi nobe, mine guusidiche uhuma mnda sii gya Misili. ² Na byabe, hamwishena u bita, ibuli yashene udogoma na batu, ³ gabasambile, Hulichiwe, ee Isilaeli, bino line mwashena ugya u bita na tumangu twenyu mitima gyenyu gishididibuwe; nangu uwa booba, na mushidanji, na mushigingilwe na iduba yulu yabo; ⁴ bulili Mlume, Abetcha enyu, noo igya hamwechi nenyu ulwa na tumangu twenyu, yulu ya ummogonona benywe. ⁵ Balochi ba mabuga badogome na batu, na ubasambila, M nanyi gwa mtu guli hano gugubae ndu gya gihya, nage gushi nagitomona? Mlewe gagye na ugiwila u ndu gyage, gashichwe uuwa u bita, gyo nuutomonywa na gunge mtu. ⁶ M nanyi gwa mtu guli hano mine guunine lubala lwage lwa mizabibu, na gushinaya biguma byage? Mlewe gagye na uguwila u ndu gyage gashichwe uuwa u bita biguma byo nuuliwa na gunge mtu, ⁷ M nanyi gwa mtu guli hano gusindile mmachi nage gushinagonda? Mlewe gaye gagiwile u ndu gyage gashichwe uuwa u bita, gugo mmachana nuuchwa ugonjwa na gunge mlumyana. ⁸ Iyaka balochi ba mabuga bidogome abisa na batu babasambile, M nanyi gwa mtu guli hano gwina iduba na mtima gwa mababu? Mlewe gagye gagiwile u ndu gyage, gishichwe mitima gya bashiwabo gyo unogeya nahi mtima gwage. ⁹ Habi haya hene hihwa bilume pambwa udogoma na batu, na baabiye bilume pambwa bya basolokoto hegulu ha batu. ¹⁰ Holishena hoka na mbuga ugya ulwa bita nagyo, haho noo holibatangila lutangi lwa talala yulu yabo. ¹¹ Haya hene habiugaa wa talala, uubugulila malimbwa mabo, haho noo hene himoneya batu bose mmo biugilila mgilo gwa mabala, na uugilila wa uoma. ¹² Nambi gishihubenja uita talala nobe, alakini wilwa bita nagyo, haho wagichunguluwe; ¹³ na Mlume, Abetcha obe, heligibiya mnda uboo obe, mmage mlumyanange gese mine guli mnda mbuga wa bwigi mwa ahilu; ¹⁴ alakini baachana na baana, na nyama chan m mbuga, na chine chili u tusoi tose, nacho m kole chobe chose, wabiguhe byabe kole oli; gogwe wiiya kole cha tumangu tobe chine chiuhele Mlume, Abetcha obe. ¹⁵ Wimaitila bibyo mabuga mose mene mali koo nobe abisa; mashi ma gino mioga. ¹⁶ Alakini mabuga ma gino mioga mene muuhele Mlume, Abetcha obe, uba buhyana, ushiishige na mwego ibya yo yose yine ilihuhemena. ¹⁷ alakini ubichimye abisa, Mmiti, na Mmamoli, na Mkanaani, na Mpelizi, na Mmivi, na Myebusi, nahi byusambile Mlume, Abetcha obe; ¹⁸ bashichwe umgigya uita mlingilisho gwa uchigilicha wabo ose, wababele huitila tubetcha twabo; bibyo iyuluba yulu ya Mlume, Abetcha enyu. ¹⁹ Gogwe holichunguluwa mbuga masugu mengi wa ugiita itunga ya bita yulu yagyo, yulu ugiwate, ushigugiche miti gyagyo wa ugisinda na temo, bululi unaosha uya biguma byabyo; na ushigisasule, yulu gugo mti gwa mlubala, Wi wii! M mtu na wamchibile? ²⁰ Nambo mti guligidi ugana gishibaluwa biguma, haho ugusasule; wagubai migumbo gya gilahu wa mali mabuga maya mene molilwa namo bita wamali; ndaa na byamigwa.