¹ Mlume, Abetcha obe, helichinga abisa giya mioga gyine na sii giya gyuha Mlume, Abetcha obe, gogwe ubebalama, na ushama hawingi ha mabuga mabo, na mnda madu mabo; ² wabagule mabuga matatu mabe obe hawingi ha sii gyobe, gyine gyiuha Mlume, Abetcha obe, ugihyilila. ³ Walongye ndila gyagabule ng'umba cha sii gyobe, gyiuhyanya Mlune, Abetcha obe, gyabe bihichi bitatu, yulu ya ugana ge gese mine gwihaga mtu gaoshe usinina uya. ⁴ Na uno noo uonona wa mtu mine gwihaga mtu, mine gwisinina ubo gabe na mwego; mine gwihaga miinage wa subisubi, na gushimmonywine utula aala; ⁵ nahi bisugungila mtu na miinage mmisowa ugya ushaba kunyi, gabehila uboo wage na liya temo yulu ya ushina mti, lyo noo usogowa u mminyi gwalyo, temo noo umgeda guya miinage nage nuuwa; haho noo gasinine mnda gimwe gya mano mabuga yulu gabe na mwego; ⁶ gashichwe ulamwa na mmaganyi nanguya gwugiwicha buubi wa buubi bwa maashi, mtima gwage uba gwili na sungu, gee nuum'banga yulu ya ndila m gilahu, nuumaga; nage gushi nakiine gwa uumaga, bululi gushimmonywine utula aala. ⁷ Bululi bwa ino ibalo nilihusambila, na uuganina, Ulibagulile mabuga matatu. ⁸ Na nambo Mlume, Abetcha obe, gabelugana lugumbalobe nahi byelilahile pa bamasobe, genuuha sii gyose gyelibalagile ugana gwibaha bamasobe; ⁹ nagogwe ubeusa malagano mano mose mandi huusambila bino lino, na umaita, umuunda Mlume, Abetchaobe, na ugyata masugu mose mnda madila mage, bibyo walilibiile iyaka mange mabuga matatu, hamwicha na maya matatu namo; ¹⁰ mashichwe ugeseya maashi ma mine gushimlube hawingi ha sii gyobe gyeliuuha Mlume, Abetcha obe, gibe buhyana, gyo niba na maashi yulu yobe. ¹¹ Alakini mtu ge gese gabemmonywa miinage na umgongela na uginywina, na ummula ndaa na uuwa; nage gabesinine m gimwe mbuga; ¹² haho miungu gya mbuga gyage gyihila mwanogahagwe ubo, na gahagwe m muboo wa guya gwa ugiwidicha buubi wa buubi bwa maashi, yulu gawe. ¹³ Liiso lyobe lishimmonene misa, alakini uhunye maashi ma guya mine gushimlube mnda Isilaeli, yulu waoshe ugililwa. ¹⁴ Ushihunye abala ya lugumba lwa m'binji nobe, lwine lubiilwe na batu baala mnda buhyana bobe, bwine bolihyana mnda sii gyine gyiuha Mlume, Abetcha obe, ugihyilila. ¹⁵ M'bangisiyi gumwechi gashimgimanine mtu ge gese ubangisiya wa usona o ose, ao wa buubi bo bose, hene hiluba mtu ge gese; ikoko ibiwe hululu wa tunywa twa babangisiyi babili ao batatu. ¹⁶ M'bangisiyi gwa lulimi gabe gabemginywina mtu ge gese wa ubangisiya yulu yage wa mmonywa; ¹⁷ haho babo batu bene balihuhimana yulu biya bihisho nabagimane bose babili u mbele wa Mlume, u mbele wa bibuli na tululiya bene baliho maya masugu; ¹⁸ nato tululiya na baenge wa chigilwe; nauloola, guya m'bangisiyi gabeba m'bangisiyi gwa lulimi, nage gwahana mangisiyo gya lulimiyulu ya mshiwabo; ¹⁹ haho mwimgilila nahi byelilangile ummitila mshiwabo; bibyo noo byolihunya usona hawingi hobe. ²⁰ Na bene bishigala habihulicha bimona booba, bashigile iyaka usona wa mlingilisho gwa uya hawingi hobe. ²¹ Na liiso lyobe lishimmonene misa; mwego wa mwego, liiso wa liiso, liino wa liino, uboo wa uboo, ugulu wa ugulu.