¹ Bibuli Balawi, ilongo yose ya Lawi, bashibi na mtala ata na buhyana hamwechi na Isilaeli; babihuya lutangi lwa Mlume lwine lwitangilwa waahya, na uba buhyana bwage. ² Na bashibe na buhyana hawungi ha bashiwabo; Mlume noo buhyana bwabo, nahi byeliusambile. ³ Na gino noo gibi kiine gya bibuli u baya batu bene bitangila lutangi, uba m ng'ombe, na ao mmoo bamme ibuli igima ya uboo na matama mabili, na gumo. ⁴ Mitomwe gya biliwa byobe, na ibugu yobe, na mauta mobe, na maso mamatangi ma miyoo gyobe, wimma. ⁵ Bululi Mlume, Abetcha obe, gwamsobola hawingi ha bilongo byobe byose, gaagimane, gaagile yulu ya china lya Mlume, gee na baana bage milumbu. ⁶ Na gabechwa Mlawi ugimana ha michango gyobe gyo gyose, wa Isilaeli ge gese helibele mshame, gabechwa wa luundo lwage lose lwa ichuli-chuli yage ya mwego haihana yine yisobola Mlume; ⁷ na gagile wa china lya Mlume, Abetcha age, nahi bisuita bashiwabo bose, Balawi bene basugimana u mnele wa Mlume. ⁸ Baabe na mtala ulamana na uya wabo, hamwechi na bibyo byine bimmyile wa uguchiwa buhyana bwa bamasage. ⁹ Holihwa ugingile mnda sii gyine gyiuha Mlume, Abetcha obe, ushiligigye ugila wa mlingilisho gwa byuonywa bya giya mioga. ¹⁰ Gashimoneye mtu mine gwihisha mmwalubaga gwage ao msiha gwage waahya, na gashimoneye mtu gulihugya ulola u mlingo, na mtu guli hulingamina mengo mabii, na mine guli hubuwa bugabo, na mine guli na buti, ¹¹ na mine guli guloga wa uta byundo, ao mine gulihusecha punga, na ndogi, na mtu mine gulihusama baabu. ¹² Bululi mtu mine gulihugila bibyo m byauchigilicha Mlume; hanyuma mndi m wa yulu ya iyo ibali Mlujme, abetcha obe, gulihubachinga u mbele obe. ¹³ Ube m'bwilile wa Mlume, Abetcha obe, ¹⁴ Bululi giya mioga gyolihyila gisubahulicha bene bailihuwasha mengo masone na ulingamina mlingo; bino gogwe, Mlume, Abetcha obe, gusuha luhusa ugila bibyo. ¹⁵ Mlume, Abetcha obe, gwiugimaninya mbuwa hawingi ha bashiwenyu nahi byandi nene; mumuliche gee. ¹⁶ Nahi biya byolisimbile wa Mlume, Abetcha obe, uya Holebu, lusugu lwa sumbilo, uganine, Nashihuli iyaka liidi lya Mlume, Abetcha anyi, na nashimone iyaka ano aahya a engi, nashichwe uuwa. ¹⁷ Mlume gusambile, Bagilile bisoga ugana byabaganine. ¹⁸ Nene nibagimyila mbuwa hawingi ha bashiwabo mlingilisho gobe gogwe, na nene nibiya binywa byanyi mnda anywa age, nage gwimsambila byose byine byandimsambila. ¹⁹ Na ha bibi, mtu gusahuhulicha binywa byanyi byelidogoma gugo wa china lyanyi, nibisaba weli gugo. ²⁰ Alakini mbuwa mine gwidogoma inywa wa buhulihuli yulu ya china lyanyi, yine yandishimlagile uigana, ao mine gwigana wa china lya tunge tubetcha, gigyo mbuwa gyihagwa. ²¹ Gogwe ubedogoma mnda mtima gobe, Twimana wi inywa yesadogoma Mlume? ²² Helidogoma mbuwa wa china lya Mlume, isahulamana na iya ikoko na isahuwilila, iyo noo inywa ishidogomine Mlume; wa anene age gwaidogoma gugo mbuwa, ushimmone booba.