¹ Ushimshinjiche Mlume, Abetcha obe, ng'ombe ao mmoo gwa ilema, na ata inywa yo yose ya igugichu; bululi bibyo m uchigilicha wa Mlume, Abetcha obe. ² Nambo habemoneya hawingi hobe, mnda michango gyobe gyo gyose, mlumyana ao mmachana gulihugila gya bisone u meeso ma Mlume, Abetcha obe, wa ubela malagano mage, ³ nage gwagya ugilila tunge tubetcha na utuginamina, uba chuba, ao mwechi, ao byine bili ihichi ya bya hegulu byose, byandishilagile nene; ⁴ ubesambilwa bibyo na gogwe ubihuliche, haho waenge wa chigilwe, na loola, uba m winene yina chigilwe iya ikoko, ugana yaiswa wa uchigilicha mnda Isilaeli; ⁵ bibyo wimtobola hambuga ha michango gyobe, guya mtu uba mlumyana, ao uba mmachana, mine gugilile iya ihisho ya igugichu; wabate mawe baawe. ⁶ GUya mine gwihagwa na gaahagwe wa tunywa twa babangisiyi babili, ao babangisiyi batatu; gashihagwe wa anywa na mbangisiyi gumwechi. ⁷ Maboo ma baya babangisiyi na mabe matangi hegulu hage wa ummaga, hanyuma noo maboo ma batu bose. Haho noo holihunya usona hawingi hobe. ⁸ Ubeginyuwa inywa yina ili ya bushito uuhima gogwe, wa wiiluliya hawingi ha maashi na maashi na hawingi ha yaabo na yaabo, na hawingi ha bihulo na bihulo, nabyo bilihuhidaninywa ha michango gyobe; haho gogwe wichuwa na usela ugya ha ihana yelisobola Mlume, Abetcha obe; ⁹ wabagile ba bibuli Balawi, na tululiya mine gubiho maya masugu; wababuche; nabo biumonya uonona wa ululiya; ¹⁰ gogwe wagile ulamana na uonona wabiusmbila ha iya ihana yine yelisobola Mlume; gogwe usa na ugila wa mlingilisho gwa byose byine byabiugigya. ¹¹ wa mlingilisho gwa m'bindo gwine gwabiugigya, na wa mlingilisho gwa uonona gwabiusambila, wagile bibyo; ushigaluwe mnda uonona wine wabiumonya, ugya luubi lwa uboo ulume ao uboo wa uachi. ¹² Nambo mtu gabegila wa ulisusula, wa nangu ummulicha ibuli mine gulimgimanyu haya wa umgilila Mlume, Abetcha obe, ao ube myaluliya, nabgaawe gugo mtu; gogwe haho wihunya usona mnda Isilaeli. ¹³ Na babo batu bose bihulicha na umona booba, bashigila iyaka wa ulisusula. ¹⁴ Holihwa ugingila mnda sii gyiuha Mlume, abetcha obe, ugihyilila, na ushama mwagili; gogwe holigana, Nibiya oolo hegulu hanyi mlingilisho gwa mioga gyose gyine gili mibamba mwanyi; ¹⁵ ushihanye um'biyaguya mine gwisobolwa na Mlume, Abetcha obe, gabe oolo hegulu hobe; wam'biye gumwe hawingi ha bashiwenyu gaabe oolo heguluhobe; ushimte mginyi buusu uba hegulu hobe, mine gushi mshiwenyu. ¹⁶ Alakini gashiite falasi chage uba chingi, na gashibagiwiche batu Misili, yulu gashioshe uita falasi chage uba chingi; bululi Mlume gumsambile, Utula aala ushigiwilile iyaka giya ndila. ¹⁷ Na gashilibudiche baachi, yulu mtima gwage gushigaluwe; na gashiite lusuu lwage na nolo chage uba chingi abisa. ¹⁸ Iyaka na byabe, hene halishamiwa wisuba yage ya buolo bwage, galigolele mikanda gya guno m'bindo mnda mibungo gya migolo, ulamana na iya yine ili hambele ha bibuli Balawi; ¹⁹ nage gabe nayo, gaasungule mmo masugu mose mene milihamaa; yulu gaoshe umnyemya Mlume, Abetcha obe, gause binywa byose bya guno m'bindo ano alago, wa ubigala. ²⁰ mtima gwage gushichwe uginyuwa hegulu ha bashiwabo, na gashigaluwe hegulu ha malagano, ugya uboo wa ulume ao uboo wa uachi; yulu gaoshe uita masugu mage uba mengi mnda buolo bwage, gee na baana bage, hawingi ha Isilaeli.