¹ Wause mwechi gwa Budogo matoswe, wammitile pasaka Mlume, Abetcha obe, bululi gibele mwechi gwa Budogo matoswe huliuhuminye Misili m'busugu Mlume; Abetcha obe. ² Gogwe umshinjiche pasaka Mlumne, Abetcha obe, mnda mgoma gwa myoo na gwa ng'ombe, ha ihana yelisobola Mlume ulishamya china lyage. ³ Ushigiye pasaka na mikati gya gibiwe mshimi; masugu njwii wiya nagyo mikati gishi gyagibiwe mshimi, nagyonagyo m mikati gya asusu; bululi uhumine mnda sii gya Misili wa abilo; yulu waoshe uengelecha lusugu lolihumine sii gya Misili, masugu mose ma mwego gobe. ⁴ Na gushimoneye oli mshimi mengo ma masugu njwii mnda ng'umba chibe chose; ata u chiya nyama cholishinja lusugu lwa lutangi igolo, hashilachi yo yose busugu buyebe ndaa na halwelo. ⁵ Ushigishibje pasaka u michango gyobe gyose gyine gyuha Mlume, Abetcha obe; ⁶ alakini ha ihana yine yisobola Mlume, Abetcha obe, galishamye chiona lyage, haho noo hamwishinjicha pasaka, luubi lwa ubusalilo bwa chuba mmanda, nahi mengo molihumine Misili. ⁷ Gogwe wagichele na ugiya havihana yine yisobola Mlume, Abetcha obe; hanyuma halwelo lwage wagaluwe na ugya witula yobe. ⁸ Masugu mtuba wiiya mikati gishi gyagubiwe mshimi; na lusugu lwa njwii lwabe lumbilo ugengeda wa Mlume, Abetcha obe, ushigichi mgilo go gose. ⁹ Walibalile mayinga njwii; utula mengo molitula uesa biliwa witula ubala mayinga njwii. ¹⁰ Gogwe lusugu lwa ulitucha lwa mayinga waluitile Mlume, Abetcha obe, wa utangila lutangi lwa mtima guhaha lwa uboo obe, lulitangila ulamana na byeliuhalile mihaa Mlume, Abetcha obe; ¹¹ gogwe wiseelela u mbele wa Mlume, Abetcha obe, gogwe na mwalubaga gobe na msiha gobe, na mgichi gobe gwa mlumyana na mgichi gobe gwa mmachana, na Mlawi mine guli ha mchango gobe, na mgenyi na shige, na m'bwile mine guwililwe na mlumyage, bene bali hawingi hobe, ha ihana yisobola Mlume, Abetcha obe, galishamye china lyage. ¹² Gogwe uengeleche ugana ubele mcha mnda sii gya Misili; iyaka uuse ano alago na uagila. ¹³ Ita lusugu lwa ulitucha lwa bitulatula masugu njwii, holihwa uongola byolisola uhuma mnda lubuga lobe lwa biliwa, na uhuma mnda isunyu yobe ya ibugu; ¹⁴ gogwe wiseelela yulu ya lusugu lobe lwa ulitucha, gogwe na mmwalubaga gobe, na msiha gobe, na mcha gobe, na mcha gobe gwa mmachana, na Mlawi, na mgenyi, na shige, na m'bwile guwililwe na mlumyage, bene bali ha michango gyobe. ¹⁵ Masugu njwii ummitile lusugu lwa ulitucha Mlume, Abetcha obe, ha ihana yine yelisobola Mlume; bululi Mlume, Abetcha obe, gwiuhalila mihaa mnda bisolaganywa byobe byose, na u migilo gyose gya maboo mobe, na gogwe waabe mnda useelela wingi abisa. ¹⁶ Nyendo chitatu u mwaa na balumyana bobe bose bamoneye u mbele wa Mlume, Abetcha obe, ha ihana yelisobola; u lusugu lwa mikati gishi gyagibiwe mshimi, na u lusugu lwa ulitucha lwa mayinga, na lusugu lwa ulitucha lwa bitulatula; na bashilimonye u mbele wa Mlume maboo hululu. ¹⁷ Mtu ge gese na gaatangile nahi byelihuosha, wa ulamana na mihaa gya Mlume, Abetcha obe, byeliuhele. ¹⁸ Ubiye tululiya na bilume pambwa u michango gyobe gyose gyiuha Mlume, Abetcha obe, wa lubalo lwa bilongo byobe; nabo babaluliye batu wa ululiya wa kiine. ¹⁹ Ushihengeye ululiya; na ushigegamine yenyi ya mtu; na ushiguhe bugeda milomo; bululi bugeda milomo busubela meeso na bene bali na lwenyi, na ugalula yaabo ya mine gwina kiine. ²⁰ Bya kiine abisa noo byolilama, yulu waoshe uhamaa masugu mengi na ugihyana sii gyolihewa na Mlume, Abetcha obe. ²¹ Ushiune mti go gose uba Awelugulu (Ashela) mobamba mwa butambikilo boligimyila Mlume, Abetcha obe. ²² Na ushigimiye ihanda; yine yelihuonywa Mlume, abetcha obe, gwabionywa.