¹ Mwaa go gose gwa njwii, isula yago, uite ulecha. ² Na ulecha ubi bino; ge gese mgambwa na gaileye yeligambile miinage, na gashimlipishe miinage ao mshiwabo; bululi yatelwa mtambila gwa ulecha yulu ua Mlume. ³ ujaosha umlipisha mgenyi; alakini yo yose iugambile mshiwenyu m muboo obe wiileya. ⁴ Alakini wenyu ushibi mbuchu; (bululi Mlume gwiuhalila mihaa chigilwe mnda sii gyeliuha Mlume, Abetcha obe, ugihyilile gibe buhyana bobe;) ⁵ ugana nambo wihulicha wa chigilwe liidi lya Mlume, abetcha obe, wause malagano mano mose mene madihuulaga lino, umagila. ⁶ Yulu Mlume, Abetcha obe, gwiuhalila mihaa, nahi byeliulagile; alakini gogwe wigambya mioga giingi alakini gogwe ushigamba; iyaka wihyilila mioga giingi alakini gogwe ushihyililwa nagyo. ⁷ Nambo habeba mtu mbuchu hamwechi nobe, gumwe mshiwenyu, ha gumwe mchango gobe go gose, mnda sii gyobe gyine gyuha Mlume, Abetcha obe, ushigumye mtima gobe, na ushim'bungile uboo mshiwenyu mbuchu; ⁸ alakini um'bungulile uboo obe wa chifgilwe, umgambe wa winene byawilile nahi byelihusimba uba nabyo. ⁹ Ligigye, mushibe na inywa ishilingye mnda mtima gobe, ugana, Gubehioya mwaa gwa njwii, mwaa gwa ulecha; liiso lyobe lyahuba na buwa yulu ya mshiwenyu usahumma ibya; nage gabemlilila Mlume yulu yobe, bubi buubi bobe. ¹⁰ Umme wa winene, na mtima gobe gushinune holimma; bululi gwiuhalilwa mihaa Mlume, Abetcha obe, wa ino inywa ya mgilo gobe gose, na wa yo yose yoliwata mnda uboo obe. ¹¹ Bululi ba mbuchu bashisunga mnda sii gyobe milumbu; bino nihusambila, nihugana, Um'bungwile wa winene uboo obe mshiwenyu, msabi gobe, mbuchu gyobe, mnda sii gyobe. ¹² Nambo mshiwenyu, gwa Ieblania gwa mlumyana, ao gwa mmachana gwa Ieblania, gabeguchiwa oli, nage gabeugilila myaa mtuba; mnda mwaa gwa njwii umleche na buhulu gahume oli. ¹³ Na gogwe holimlecha buhulu gahume oli, ushimleche gagye wage maboo hululu; ¹⁴ wamlingamine wa misa mnda ihichi yobe, na buhulilo bobe bwa biliwa, na isunyu yobe ya ibugu, wamme nahi byolihalilwe mihaa na Mlume, Abetcha obe. ¹⁵ Na gogwe uengeleche ugana uibele mcha mnda sii gya Misili, guuhogonone Mlume, Abetcha obe, wa bibyo nene nuusambila ino inywa bino lino. ¹⁶ Ata nambo gabeusambile, Nishihuma obe; bululi guunda gogwe na ndu gyobe, yulu guli bisoga oli; ¹⁷ haho haguhe mtubulo, wagutunge u litu lyage gwagingile ndaa na u wiibi ya mchango, nage gubi mgichi gobe milumbu. Na mgichi gobe gwa mmachana nage wammite byoka biya. ¹⁸ Na ushomone m bigumu, holimlecha gahume obe, yulu guugilile myaa mtuba alambwe nyendo chopi yulu ya uhigwa; na Mlume, Abetcha obe, gwiuhalila mihaa wa byose byoligila. ¹⁹ Babusw ba batangi ba milume bose bene bibuswa mnda migoma gyobe gya ng'ombe na gya miyoo, wigibiya mibamba yulu ya Mlume, Abetcha obe, ushigile mgilo na m'buswa gwa mtangi gwa ng'ombe chobe, na ushimgechi maso m'buswa gobe gwa mtangi gwa mmoo. ²⁰ Wigiya u mbele wa Mlume, Abetcha obe,mwaa wa mwaa ha ihana yelisobola Mlume, gogwe na ndu gyobe. ²¹ Alakini gwahuba na ilema, gwahuba huchuliya, ao gwahuba ihobu, ao gwahuba na ilema yo yose ya isone, ushimtangile wa Mlume, Abetcha obe, uba lutangi. ²² Wigiya ha mchango gobe; bashibabagibe kumbi na babagibe kumbi bigiya, nahi byosuya m'bale na kulungu. ²³ Hamwechi na bibyo ushiye maashi magyo; wamagese hasi nahi maadi.