¹ Ano noo alago na uonona byamwiusa na ubigila mnda sii gyeimma, Mlume, Abetcha bamasobe, ugihyilile, masugu mose mene molihamaa hegulu ya sii. ² Belwe abisa bihana byose byine byababele hutugilila tubetcha twabo mioga gyine gyamwihyilila, hagulu ha koono cha chilahu, na hegulu ha tubandagulu na mmashina na miti gyo gyose gyine gyina byaanyi bya bibisi. ³ benywe belwe butambikilo bwabo, nogwe bihanda byabo, na miishi gyabo gya tuwe lugulu (maashele) twabo tuchigiwe waahya, na miishi gya ubada gya tubetcha twabo tugechwe; na china lyabo lichimwe koo ha ino ihana. ⁴ Benywe mushimgilile bibyo Mlume, Abetcha enyu. ⁵ Bibyo ha ihana hene helisobola Mlume, Abetcha enyu, u bilongo byenyu byose, gahabiye china lyage, noo, ugana ihana yage, hugululwe byenyi byenyu haya, na gogwe wagye haya. ⁶ mwahile haya lutangi lwenyu lwa uchigya, na lutangi lwa nyama chenyu, na imwechi ya umi yenyu, lutangi lwa uginyunywa mmaboo menyu, na ulibindila wenyu, na lutangi lwenyu lwa uhana wa mtima, na lwa babuswa ba batangi ba nyama chenyu ba ng'ombe na ba myoo. ⁷ na uya mwiya u mbele wa Mlume, Abetcha enyu, na benywe museelele u byose byine byamwibiya mnda maboo menyu, benywe na ba mmadu manyu, byeliuhalile mihaa Mlume, Abetcha obe. ⁸ Mushigile nahi ulama bikoko byose byatulihugila hano lino, mtu ge gese nahi byelihumona u meeso mage; ⁹ bululi mushinahyila ulitucha wa buhyana bweliuha Mlume, Abetcha obe. ¹⁰ Alakini hamwihwa udabuwa Yolodani na ushama mnda sii gyelihumyanya Mlume, Abetcha enyu, gwimma ulihocha, gwimmogonona na tumangu twenyu ngubi chenyu, mwishama kolongecho; ¹¹ mamo mengo habi ugana biya bihana byelisobola Mlume, Abetcha enyu, ulishamya china lyage, haho noo hamwilusha bibya byose byandihumsambila; lutangi lwenyu lwa ucgugya, na lutangi lwa nyama chenyu, na imwechi ya umi, nalutqngi lwa uginunywa m maboo menyu, na ulibindila wenyu use wa uhaha wamwibiya wa Mlume. ¹² Benywe mwiseelela u mbele wa Mlume, Abetcha enyu, benywe ba bawalubaga benyu, na misihangyenyu, na bagichi benyu ba balumyana na ba baachana, na Mlawi mine guli ha michango gyenyu; bululi bushi na mtala na gushi na buhyana wa mli. ¹³ Lwenge lulile ushiotangile lutangi lobe lwa uchigya u bihana byo byose byolimona; ¹⁴ alakini u bihana byine byelisobola Mlume u bimwe bilongo byobe, haho noo holitangila lutangi lobe lwa uchigya, haho noo holigila byandihuusambila. ¹⁵ Hamwechi na bibyo unaosha ushinja nyama na ugiya ha michango gyobe gyose, wa ulamana nabyosae byine bilihusimbwa na luhuda lobe, wa mlingilisho gwa mihaa gya Mlume, Abetcha obe, gyeliuhele; gwa mgibe kumbi na gushi gwa mgibe kumbi gunaosha ugiya gigyo nyama, m'bale, na kulungu. ¹⁶ Alakini mushiye maashi; mageswe hegulu ha bitete nahi maadi. ¹⁷ Mushiye u michango gyenyu imwechi ya umi ya matete mobe, na ata ya ibugu yobe, na ata ya mauta mobe, na ata babuswa ba batangi ba bisuganywa byobe, bya ng'ombe na bya miyoo, na ata bya ulibindila obe osubiya ose, na ata lutangi lobe lwa uhana wa mtima, na ata lutangi lwa uginunywa m uboo obe. ¹⁸ Alakini chicho mwichiya u mbele wa Mlume, Abetcha obe, bihana byelisobola Mlume, Abetcha obe, gogwe, na baana bobe, gwa mlumyana na gwa mmachana, na mcha gobe gwa mlumyana na gwa mmachana, na Mlawi mine guli ha mchango gobe; gogwe seelela u mbele wa Mlume, Abetcha obe, u byose byolibi nabyo mnda uboo obe. ¹⁹ Liuse ichuli-chuli yobe ya mwego ushimshige Mlawi masugu mose molihamaa mnda gino sii. ²⁰ Mlume, Abetcha obe, helitala lugumba lobe, nahi byeliulagile, gogwe holigana, Nihusimba uya nyama, bululi luhuda lobe luli husimba uya nyama; unaosha uya nyama, ulamana na byose bilihumba luhuda lobe. ²¹ Na ihana yose yine yisobola Mlume, Abetcha obe, gahabiya china lyage, habeba koo nobe, noo holishinja ubihichi byobe bya ng'ombe ao bya myoo byeliuhele Mlume nahi byandiulagile, gogwe wibiya u mchango gobe, wa ualamana na byose byine bili husimba luhuda lobe. ²² Nahi biya bisuliwa m'bale ao kulungu, noo byamwigiya gigyo nyama; gushigwamgibe kumbi na gwamgibe kumbi bigiya nabo. ²³ Alakini lwenge lulume ushiya na maashi, bululi maya maashi noo mwego; na mwego gusahiliwe hamwechi na nyama. ²⁴ Ushumaye; umagese hegulu ha bitete nahi maadi. ²⁵ Ushimaye; yulu waoshe ugililwa, na baana bobe hanyuma hobe holigila byabigolobu u meeso ma Mlume. ²⁶ Bibyo bibya byobe bya bihaha byine byoli nabyo, na ulibindila obe, wabiguhe nugya nabyo wihana yine yisobola Mlume; ²⁷ gogwe watangile lutangi lobe lwa uchigya, nyama na maashi, hegulu ha butambikilo bwa Mlume, Abetcha obe; na maashi ma nyama chobe cha lutangi wamagese hegulu ha butambikilo bwa Mlume, Abetcha obe, na gogwe waaye nyana chagyo. ²⁸ Binywa bino byose byandihuulaga byose ubiuse na ubihulicha, yulu waoshe ugililwa na baana bibo hanyuma hobe milumbu, haya hene holigila bya bisoga u meeso ma Mlume, Abetcha obe. ²⁹ Mlume, Abetcha obe, helichinga koo gigyo mioga gyine gili u mbele obe, uya oligingilila uhyilika, gogwe wigiguha, na ugishamona sii gyabo; ³⁰ ulilingamine, ushichwe uwaswa, wa ubalama, habihwa uchimiwa u mbele obe; na ushichwe ubucha mwano gwa tubetcha twabo, ugana, Gino mioga gisugilila wii tubetcha twabo? Na nene niita bibyo. ³¹ Ushimmitile nahi bibyo Mlume, Abetcha obe; bululi ho hose hene hali uchigilicha wa Mlume, byesuonywa gee, basubyitila tubetcha twabo; bululi basugitangila ata na bawalubaga babo na misiha gyabo ubachigya waahya u tubetcha twabo. ³² Inywa yoy yose yandihumlaga ilingaminywe na uigila; ushi ilibiye na ushi ihungule.