¹ Bululi bwa bibyo ummunde Mlume, Abetcha obe, na uusa masugu mose mihano gyage, na alago age, na uonona wage, na malagano mage. ² Benywe lino manywe; bululi nishihudogoma lino na bawalubaga benyu, bene bashimanine, na mashimonine buhuchi bwa Mlume, Abetcha enyu, bwata bwage, na uboo wage wa uoma, na uboo wage wa ugolobu, ³ na bisaga byage, na migilo gyage gyelimgilile Falao oolo lya Misili, na sii gyage gyose, m'bwingi mwa Misili; ⁴ Na byelibagilile basolokoto ba Misili, falashi chabo, na tubilibili twabo; nabyelibaunine na maadi ma Bhali lya Shamu hababele humlama, na Mlume byeli bachimimye ndaa na lino; ⁵ na bikoko byelimgilile benywa mndala, ndaa na byamuhiile ino ihana; ⁶ na byelibagilile Dathani, na Abilamu, baana ba Eliabu mwaana gwa Leubeni; sii byagiununine anywa age, gibaminine, na bene babele m madu mabo, na bitula byabo, na ibya yo yose yine ibele na mwego hubalama, hawingi ha Isilaeli yose. ⁷ alakini meeso menyu mamonine migilo gyata gwa Mlume gyeligilie, gyose. ⁸ Wa bibyo uuswe malagano mage mose mandi humlaga bino lino, mwaoshe uba na uoma, na ugingila ugihyilila sii gyamulihudabuwa yulu ya uguhyilila; ⁹ benywe mwaoshe umaita masugu menyu uba mengi mnda sii Mlume gyelibalahile pa bamasenyu, ugana gwibaha bo na ibushi yabo, sii gilihuhongolowa mabele na bui. ¹⁰ Bululi sii gyamulihugingila ugihyilila, gishi nahi sii gya Misili gyamuhumine, gyolibele huuna matete mobe mo na ugichwisha maadi na magulu mobe, nahi lubala lwa minanyi; ¹¹ alakini sii gyamulihudabwila ugihyilila m sii gya tuono na bibetabeta, nagyo gisudoba na maadi ma mbula gy6a gulu; ¹² nagyo m sii gisuuswa na Mlume, Abetcha obe, gya hegulu hage, utula ubutulilo bwa mwaa ndaa na isula ya mwaa. ¹³ Iyaka bibi hamwihulicha wa chigilwe malagano manyi menemandihumlaga lino; na ummunda Mlume, Abetcha enyu, na umgilila wa mitima gyenyu na luhuda lwenyu lose; ¹⁴ haho noo handimnyeshecha mbula hegulu ha sii gyenyu ha mengo magyo, mbula gya budogo, na mbula gya lunyange, waoshe usola biliwa byobe, na ibugu yobe, na mauta mobe. ¹⁵ Nene niuha byanyi mnda mabala mobe yulu ya ulisha nyama chobe cha chisugwe, gogwe wiiya na ugyuta. ¹⁶ Liuswe bichuli-chuli byenyu bya mwego, mitima hyenyu gishichwe ubichiwa, ugaluwa na ugilila tunge tubetcha na ututambikila. ¹⁷ sungu cha Mlume chishichwe ulama hegulu henyu, nage nuuhamba gulu hashibe na mbula, ata na sii gishihe biguma byagyo; uchimiwa abilo muhume mnda sii gisoga gyelimma Mlume. ¹⁸ wa bibyobibiwe binywa byanyi mnda mitima gyenyu na m luhuda lwenyu; bihambwe bibe ibala hegulu ya maboo menyu; nabyo bibi nahi yaanyi hawingi ha meeso manyu. ¹⁹ Nabyo bigigiwe baana benyu wa ulisamba holishama mnda ndu gyobe, na hobihugyata mndila, na holisendama, na holigimana. ²⁰ Iyaka ubigole hagulu ha mtatala panya gwa ndu gyobe, nanhegulu ya michango gyobe; ²¹ yulu masugu menyu maiswe uba meengi, na bawalubaga benyu nabo, yulu ya sii gyine Mlume gyelibalahile pa bamasenyu ugana gwibaha, nahi bili masugu ma gulu hegulu ha sii. ²² Bululi ugana nambo mwiusa wa chigilwe malagano mano mose mandihumlaga, umagila; umunda Mlume, Abetcha enyu, na ugyata mnda madila mage mose, na uhambana nage. ²³ haho Mlume noo hene helichinga mioga gino gyose u mbele wenyu, na benywe mwihyilila mioga gya gyata gyina uoma ummima benywe. ²⁴ Ihana yo yose yina yamwigyatila na maasa ma magulu menyu ibi yenyu; utula luya lwanaganywa lwa Lebanoni, na utula luudi Flati, ndaa na bahali lya igolo, chibi noo ng'umba chenyu. ²⁵ Hashibi mtu mtu mine gwigimana hambele henyu; Mlume, Abetcha enyu, gwibiya luteshi lwenyu na usinywa wenyu hegulu ha sii gyose gyine gyamwigyatila, nahi byelimsambile. ²⁶ Lingaminywe, nam'biila hambele henyu bino lino mihaa na buloga; ²⁷ mihaa m haya hene hamwihulicha malagano ma Mlume, Abetcha enyu, mandihumlaga lino. ²⁸ na buloga m haya hene hamushihulicha malagano ma Mlume, Abetcha enyu, m'behuguluwa uhuma mnda ndila gyandihumlaga lino, wa utugila tunge tubetcha twamushigidi. ²⁹ Iyaka habi heliulusha Mlume, Abetcha obe, na uubiya mnda sii gyolihugila ugihyilila, haho wabiya mihaa hegulu ha loono Gelizimu, na buloga wabubiye hegulu ha loono Ebali. ³⁰ Wi wii! Chishi m'bwala mwa Yolodani? Unyuma wa ndila gya ususala chuba, mnda sii gya Bakanaani bene basushama Ubalabu uhugulwila Gilgali, mibamba mwa giya miamba gya Mole? ³¹ Bululi benywe mwidabuwa Yolodani mwagingile uguhyilila sii gyimma Mlume, Abetcha enyu, benywe mugihyilile na ushamamo. ³² Benywe lingaminywe mwagile alago na uonona ose bwandihum'biila lino u mbele wenyu.