¹ Maya mengo Mlume gusambile ulibadile mibachwa gibili gya mawe nahi giya gya gitangi, hanyuma noo wachwe wandiuno u loono, wanongeche nalindo lya mti. ² Nene naagole hegulu ha gigyo mibachwa binywa biya byine bibele bigolwe u giya gya gitangi, gyolibelile, gogwe wagibiye mnda liya lindo. ³ Bibyo nilongiche liya lindo lyab mti gwa msese, nibadile mibachwa gibili gya mawe mlingilisho gwa guya gya gitangi, niselile m'ya mloono, na giya mibachwa gibili m muboo wanyi. ⁴ Nage nuugola hegulu ha gioya mibachwa nahi migolo gya gitangi, aya alago umi, abasambile Mlume uya u loono uhuma hawingi ha aahya lusugu lwa sumbilo; Mlume noo upa. ⁵ Haho nigaluwile nisalile uhuma mloono, nigibiile mibachwa mnda lindo lyandilongiche; nagyo gilimo mnda nahi byelisambile Mlume. ⁶ (Baana ba Isilae;li bachuwile uhuma bishima bya Bene-Yaakani ugya Mosela; Haluni noo uwa uya, guchiilwe uya; na Eleazali mwanage gugilile mgilo gwa bwibuli hanyuma hage. ⁷ Bachuwile uhuma uya ugya Gudgoda; bahumine Gudgoda bagile Yotbatha, nagyo m sii gya bichiba bya maadi. ⁸ Na mamo mengo Mlume gubalulile ilongo ya Lawi yulu baabe huliswala liya lindo lya malagano ma Mlume, baabe hugimana u mbele wa Mulme yulu ya umgilila, na wa ubahalila mihaa batu wa china lyage, ndaa na lino. ⁹ Bibyo gushibi na mtala gwa Lawi, na gashibe na buhyana hamwechi na bashiwabo, Mlume noo buhyana bwage, wa nahi biya bimsambile Mlume, Abetcha obe.) ¹⁰ Nishamine m'ya mloono nahi haya hatangi, masugu maumi mana busugu na chuba; Mlume gupuliche mamo mengo namo; Mlume gushibanjiche uuchumya. ¹¹ Mlume gusambile, Gimana, ugiwile u mele wa meeso ma batu; nabo bigingila ugihyilila sii, gyandibalahile pa bamasabo ugana nibaha. ¹² Na bino, Isilaeli, Mlume, Abetcha obe, alihuisimba ii oli, myunyemya Mlume, Abetcha obe, na ugyata mnda madila mege mose, na umunda, na umgilila Mlume Abetcha obe, wa mtima gobe gose, na wa luhuda loe lose; ¹³ uusa alago a Mlume na m'bindo gwage, gwandihusambile lino, uba luhanga lusoga. ¹⁴ Loola, gulu m yibya ya Mlume, abetcha obe, na sii, na bitundu byose byine bilimo. ¹⁵ Iyaka, Mlume guseelele bamasobe, na ubaunda, gubasobole babuswa babo hanyuma habo, ehe, na benywe uhima mioga gyose nahi bino lino. ¹⁶ Bino, ligishiwe kumbi gya mitima gyenyu, na mushigumye maoshi menyu. ¹⁷ Bululi Mlume, Abetcha enyu, gee noo Abetcha a tubetcha, na Mlume gwa balume, Abetcha a ata, gusudanja, gushibagegemina byenyi bya batu, na gushibaguha bugeda milomo. ¹⁸ Gusubaitila mashige na mawilwa uonona wa kiine, nage busumunda mgenyi, gusumma iliwa na bichwalaganywa. ¹⁹ Bino, mmunjwe mgenyi, wa iyo ibalo na benywe mubele bagenyi mnda sii gya Misili. ²⁰ Mnyemye Mlune, Abetcha obe, umgilile gee; umbatilana nage, na ulaha pa wa chinanlyage. ²¹ Gee noo ugema obe, nage noo Abetcha obe, mine guugilile bikoko bina bya byata, bya usinywa, byolimonine na meeso mobe. ²² Bamasobe basalile Misili nahi batu maumi njwii; na bino Mlume, Abetcha obe, uubucha bwingi bobe nahi tumbala-mbala twa gulu.