¹ Sauli gugilile udogoma binywa bya ubasinya na ulanga ubahaka bahilwa ba mlume, gukile wa ibuli yata. ² Kugile usaba mkanda gukya Dameski gugolilwe umasinagogi, yuli gabemona bata ba ndila gigi, balumiana nahi baachana, gabahambe na ubahila Yelusalemu. ³ Na hebele hugia, gusibele hoka na Dameski, wa msabutuo lwenge lumlamie ngubi chose uhuma hegulu. ⁴ Gukwile hasi, guhuliche liodi lilihum'bucha Sauli, Sauli, yulu yai ulihususula? ⁵ Sauli gumgaile, gogue wii nanyi mlume? Nage guganine, nene noo Yesu golihususula gogue. ⁶ Bino ubegimana, ugingile mmbuga, na gogue wisambilwa biolilingie ugila. ⁷ Na baya batu beele nabo bikimene pii, bahuliche lidi, nangu umona mtu. ⁸ Sauli gugimene hasi, na meso mage hamabuluile, gushimonine atu, bamputile uboo na ummila Dameski. ⁹ Gubele masugu matatu gushihumona, gushihuya na gushi hunywa. ¹⁰ Uya Dameski ubele mkikiwa china lyake Anania. Mlume gumsambile umalo, Anania, kugaile nene guno mlume. ¹¹ Mlume gumsambile, Gimana, ugie lobe mgia ndila gilihugiswa gigolobu, wabuche mndu gya Yuda mtu gulihugiswa Sauli, gwa Talso, yulu, lola, gulihusaba. ¹² Nage guamona mtu china lyage Anania, gwakingila na ubiila maboo mage hegulu hage, bululi gamone iyaka. ¹³ Anania gugaile, mlume nihulile mwano gwa gugo mtu ubange batu, bubi bwingi bwelibagilile bahaha bobo uya Yelusalemu. ¹⁴ Hoka hano gwa hewa mmano guhuma u bibuli biata gabahambe bose bene balihulilumbula china liobe. ¹⁵ Bibyo, mlume gumsambile, ugieka, yulu gugo isili ibya ya isobolwe wanyi, galisuali china lyanyi u mioga, na maolo na u bana Bisilaeli. ¹⁶ Yulu nmmonya biabingi bilingie gasusulwe yulu ya china lyanyi. ¹⁷ Anania gukile lwake, gukingile iya mndu, kumpiile maboo nugana, m'buswa Saulo, mlume gwapila, Yesu, gee mine guutobuele mndila giolichuile, bululi umone iyaka, ugiluchiwe mtima guhaha. ¹⁸ habo biguile uhuma umeso bitu nahi magamba, gee numona, gukimene, nuchunjwa. ¹⁹ Kulile iliwa, na uba nauoma. Gubele uya masuku mabuchu hamwechi na bagigiwa ba Dameski. ²⁰ Moka mamo mengu gutulile ulisamba mwano gwa Yesu mmasinagogi, gee ii mwana gw'Abeca. ²¹ Na bose bahulichiche bagakilwe baganine, gushi gugu gususule balilumbule lili china uya Yelusalemu? Na bino gwabahuchuila yaka iya ibalo ya ubahamba na ubahila u babibuli byata? ²² Sauli gugililile uba na uoma, gubadidibule bayahudi babele husama Dameski, ubasambila wahululu ugana guno noo Kelesitu. ²³ Hanyuma ha masugu mengi uhita, Bayahudi bahungile mmungo bammake. ²⁴ Sauli gumanine mihungo gyabo, bamibile chuba na busugu umchango gwa mbuka bammake. ²⁵ Bagigiwa ba Sauli bamkuhile mpusu na umsacha wibambacha bamsachiche mmtungu. ²⁶ Sauli helihuile Yelusalemu, gutondile ulilunga na bagigiwa, nabo bose babele hum'ua boba, bashigitabiche ugana gee ii mgigiwa. ²⁷ Bibyo Balnabo gumguhile, na umila ubakilwa, gubasambile byene bulimonine mlume mndila, na ugana gudokomine nage, na byeli lisammbile mwano wa uoma gwa china lya Yesu uya Dameski. ²⁸ Nage gubele hamwechi nabo Yelusalemu ugingila nautoboa. ²⁹ Gumsambile mwano gwa china lya mlume wa uoma, udogoma na ubachanya binywa Bayahudi ba Bayunani. Nabo baengile ummaga. ³⁰ Haha babushua habahulicha mwano bamkuhile mpago Kaisalia bamilile gakie Talso. ³¹ Lubungu lulitudiche u Bayahudi bose na Galilaya na Samalia, lugubawe, lugililile naubula u bobabwa mlume, nammungio gwa mtima guhaha. ³² Pedelo hebele huchungulwa-chungulwa bihana byose gubaundumwile bahaha babele hushama Lida. ³³ Gumonin gumwe mtu ubo china lyage Ainea, gugo mtu mlachu ubutanda miaa inana, msumua guilebe. ³⁴ Pedelo gumsambile Ainea, Yesu Kelesitu guohonya biuwa uligandile butanda, gee nukimana. ³⁵ Na babu bose babele hushama Lida na Shaloni bammonine na umgaluila mlume. ³⁶ Mgigiwa gumwechi gubele Yafa, china lyake Tabita, noo uguna Dolokasi (mana gyake kulungu), mmachana guko kubele mkilucha na bigilanywa bibenju na lutangi lwebele huhana. ³⁷ ha maya masugu gusuminywe, na uwa, na habahuile umgoga bam'giile ndu gyahegulu. ³⁸ Na yulu mbuga gya Lida kibele hoka na Yafa, na bagikiwa bahuliche Pedelo guli uya, bahilile batu babili weli, umtendelela na umsambila, ushisinge chuno wetu. ³⁹ Pedelo kuchuile na ukia nabo, habahiile bamseliche mndu giahekulu, bawilwa bose bagimene hoka nage, balihulila na uumonya mayo makanju nabilamba bielibele hutata Dolokasi maya mengo mebele hamwechi nabo. ⁴⁰ Pedelo gubatobuele bose hambuka, gubungile machui, gusabile, hanyuma gugilile iya itumba, guiganine, Tabita biua. Nage guhululile na ushama. ⁴¹ Gummele uboo gumkimie, nahehuile ubakita baya bahaha nabawilwa gumshaminye umbele wabo gubele poo. ⁴² Bimanyiye mbuga gyose gya Yafa, batu bengi bawashiche mlume. ⁴³ Bibyo Pedelo gushamine masuku mengi uya Yafa, mndu gya gumwe mtu china lyake Simoni, mlongia gwa bibambi.