¹ Habele mtu uya Kaisalia, china lyake Kolonelio ilume pambwa ya basolokoto ibele hukiswa Kiitalia. ² Mtugwa inyumbia, mmachii gwa milandu gw'Abeca gee na ndu gyake gyose, nage gubele hubaha batu lutangi luingi, na umsaba Abeca masuku mose. ³ Gumonine wa hululu umalo, nahi chuba mpungu lubanga malaika m'Abeca, gumchuile naumsambila, Kolonelio! ⁴ Gumlolile, gumonine booba na guganine, uli ii mlume? Gumsambile, usaba ube na lutangi lobe biahia hekulu na uba kengeleho u meso m'Abeca. ⁵ Bino, uhile batu Yafa, ukiite Simoni, gulihukiswa Pedelo. ⁶ Gee ii mgenyi gwa gumwe mtu, china lyake Simoni, mlongia gwa bibambi, ndu giake kili umpega gwa ichiba, guiusambila biolilingie uita. ⁷ na guya malaika gudogomine nage hanyuma gee nukia, Kolonelio gugitile ubakichi ba mndu kyake babili, na solokoto gumwechi, mtu gw'inyumbi mine gubele humgilila masuku mose. ⁸ Na heli huile ubasambila byose gubahilile ugia Yafa. ⁹ Lusugu lwa bubili, hababele hugia hokonauhia mmbuka, Pedelo kuselile ubutato ukia usaba, nahi chuba mkunyia meno. ¹⁰ Gumonine ndala gingi abisa, gubendiche uyaa na hababele huhiya guchiminye lwenyi, ¹¹ gumonine gulu ubugua, na ibia usala nahi ilamba yata, ilihusachiwa umasunga mage mana mpaga hasi. ¹² Mnda mwage mubele mioga gyose gya nyama cha magulu mana, na chugandala na tumonyi tuahegulu. ¹³ Lidi limchuilile Pedelo ugana, kimana ushinje uye. ¹⁴ haho Pedelo gugaile, nangu, mlume, yulu nishi naya itu yoyose yidogu na ihanyiwe na m'bindo. ¹⁵ Lidi limchuilile luendo lwa bubili, limganine, byose biahahachiwa n'Abeca, gogue usibigite bibe. ¹⁶ Bibyo bigilie nyendo chitatu, iya ibia igailue iyaka hekulu. ¹⁷ Pedelo gubulagene malanga yulu ya mamo malo, mamo malo mali hulisamba ii meli monine, baya batu bene bahililwe na Kolonelio, habahuile ubucha ndu gia Simoni, bagimene hambele ha mchango. ¹⁸ Bakitile, babudiche Simoni gulihugiswa Pedelo guihushama mmo mndu. ¹⁹ Pdelo gubele hulanga maya malo. Mtima gumsambile, hali batu batatu bali huenga. ²⁰ Bino kimana, sala ugie nabo, nangu umona booba, yulu mnene guhile o. ²¹ Pedelo gusalile uli baya batu, gukanine, nene noo gwamlihuenga. Muacha yulu yai? ²² Baganine, Kolonelio ilumepambua, mtu gwa kiine, mmachi gwa milandu gw'Abeca, guli na punda gibenju umoga gose gwa Bayahudi, gwasambilwa namalaika mmaha uhila batu oli, ugie undu gyake, yulu gahulile binywa uhuma obe. ²³ Gubagaile babe bagenyi bake, ata chuba lyake lya mabili, Pedelo guchuile hamwechi nabo, na bamwe babusua babele hushama Yafa balamene nake. ²⁴ Chuba lya mabili lyake bagingile Kaisalia. Na Kolonelio kubele hubahemba, gusumbiche babusua bake na makenda make. ²⁵ Pedelo hebele hugingila Kolonelio gutoboele umga gumkuilile umagulu naukinamina. ²⁶ Pedelo gumginuile, kuganine, kimana, na nene nii mtu nahi gokue. ²⁷ Hudogoma nage kugingile mndu, gumonine batu bengi basumbile. ²⁸ Gubasambile, benywe mugidi ugana bishi bisoga myahudi uba umwechi na gunge mmoga na ummenena, bino Abeca amonya, nashi mgite mtu gegese guina iyoo, gushilingie. ²⁹ Wa bibyo nachua wandagiswa, nashihonye, bino nihumpucha, iyinywa nai ya mwangitila? ³⁰ Kolonelio gugaile, hahuhita masugu matatu, moka mano mengo, chuba mpuku lubanga, nibele husaba mndu mwanyi, mtu gugimene umbele wanyi, mchuule bilamba biugema. ³¹ Gukanine, Kolonelio, usaba obe wahulichiwa na lutangi lobe luaengelechiwa umeso m'Abeca. ³² Bibyo hila batu bakie Yafa, umkite Simoni gulihugiswa Pedelo, kulihushama mndu mwa Simoni, mlongia kwa bibambi, hoka na umbega gwa ichiba, nage helichua kuidogoma nobe. ³³ Wa abilo nihilile batu olim na gokue waita bisoga uchua. Bino beswe bose tuli hano u meso m'Abeca, yulu tuhuliche binywa byose byoli mganinywe na mlume. ³⁴ Pedelo gubuguile anywa age na ukana, hinene namana ugana Abeca ashi na ugeganina. ³⁵ Yulu mmoga gogose mtu guimnyemia Abeca na ugila biakiine guikitabichiwa nage. ³⁶ Iya inywa yelibahilile bana b'Isilaeli, ulisamba mwano gubenju gwa talala gwa Yesu Kelesitu (noo mlume gwa bose). ³⁷ Iya ihiso benywe Galilaya, hanyuma ha uchunda ulisambile Yohana. ³⁸ Mwanogwa Yesu gwa Nazaleti, bimshininye Abeca mauta ma mtima Guhaha na uoma; nage nuchungulwa ubo na ubo ugila mgilo gubenju na uhonya bose bene babele humonywa na ihingili, yulu Abeca habele hamwechi nage. ³⁹ Bibyo beswe tumonine bibyo byose bieligilile m'ibaloo ya Bayahudi na Yelusalemu, mine gwabahakile na umsundia umti. ⁴⁰ Gugo mtu Abeca amchulile lusugu lwa butatu, na umitagamoneye hululu. ⁴¹ ushi ubatu bose, ii ubaya bamashahidi bena bahuile usobolwa n'Abeca, noo beswe, tulile na unywa hamwechi noge hanyuma ha uchua wake uhuma ubabu. ⁴² Gutulagile na tubusambile batu mwano na ubashuhudia ugana gee noo guhalwe na Abeca gaonone bali umwego na babu. ⁴³ Gugo bibuli byose bile humshuhudia, ugana wa china lyake gegese guiwasha guileelelwa bubi. ⁴⁴ Pedelo hebele hudogomabibyo binywa mtima guhaha gubakiluche bose bene bahuiliche iya inywa. ⁴⁵ Na baya bakile kumbi, babele bawashe, bagagilwe, batu bose bene bachuile na Pedelo, yulu bamioga nabo bagiluchiwa bipawa bya mtima guhaha. ⁴⁶ Yulu babahuliche balihudogoma wa Lidi na uginuna Abeca, haho Pedelo gugaile. ⁴⁷ Mnanyi gunabahaninya madi, bashichunjwe, batu bene bagiluchiwa mtima guhaha nahi beswe? ⁴⁸ Bibyo guganine bachunjwe wa china liake Yesu Kelesitu. Nabo bamsambile gashame nabo mamwe masugu.