¹ Bahilua nababusua babele uya ubayahudi bahuliche mwano ugana batu ba miogo nabo bawasha inywa y'Abeca. ² Pedelo helikile Yelusalemu, baya babele bawa m'bindo bam'bediche abisa. ³ Bamkanine, wagingila ubatu bashikile kumbi waya nabo. ⁴ Pedelo gutulile ubasambila lemba lemba, guganine, ⁵ Nibele husaba mmbuga gya Yafa, mtima gwanyi gubele nahi guube, nimo nine malo, ibia Isalile, nahi ilambe yata ilihusachiwa uhuma hekulu umasunga make mana isalile nene. ⁶ Niilolile na uucheelecha, nilangile, nimonine nyama chose cha magulu mana chahano hasii na nyama cha mlundu na chugandala, na tumonyi twa hegulu. ⁷ Nihuliche Lidi lihusambila, kemana, Pedelo, ushinjwe uye. ⁸ Niganine, nangu, mlume, yulu itu ya idoguna ihanyiwe na m'bindo ishinagingila ata mmanywa anyi. ⁹ Lidi linjuilile lwendo lwa bubili uhuma hekulu, bihahachiwe n'Abeca, ushibigite bidogu. ¹⁰ Ino ihisho igilie luendo lwa butatu, hanyuma bitu byose babibulile iyaka hekulu. ¹¹ Na lola, hoka haho batu batatu bakimanyu hambele ha ndu giatubelemo, bahililwe wandi uhuma Kaisalia. ¹² Mtima gusambile nagie nabo, ushibe na mashaka. Babusua mtuba bagile hamwechi nanyi, tugingile mndu gya guya mtu. ¹³ Gutusambile byeli mmonine malaika mine gugimene mndu mwake na gumganine, hila batu Yafa bagiumkita Simoni gulihugiswa Pedelo. ¹⁴ Noo gwiusambile binywa byene biuhonya gogue nandu giobe kyose. ¹⁵ Haho handitulile udogoma, mtima guhaha gubasalile nahi bigutusalile na beswe uya ubutulilo. ¹⁶ Niengeleche iya inywa ya mlume, bieliganine, Yohana guchundile wa madi winene, bibyo benywe mwichunjwe wa mtima guhaha. ¹⁷ Wa bibyo Abeca mine lungu abawa nabo karama choka chiya chetuhele beswe bene bawashiche mlume Yesu Kelesitu, nene ni nanyi nabachila bi Abeca? ¹⁸ Habahuliche bibyo binya bashamine pii, Bamkinuine Abeca, bakanine, bino, Abeca abaha bamioga nabo mtima guolibeca guhana mwego. ¹⁹ Baya basalie yulu ya aya ene achuile u mwano gwa lubu lwa Sitefano, basinine Feinike, Kipulo na Antiokia, balisambila iya inywa u Bayahudi kaa nangu ukinga mioke. ²⁰ Na bamwe batu bene babele Kipulo na Kilene, nabo habahiile Antiokia badogomine na Bayahudi ba Bayunani, balisambile mwano gubenju gwa mlume Yesu. ²¹ Uboo wa mlume ubele hamwechi nabo, batu bengi bawashiche, bagaluile mlume. ²² Gugo mwano gwa babo batu goo nuhiya mmatu ma ihyilo yine ibele mnda Yelusalemu; bammilile Balanaba gagye ndaa na Antiokia. ²³ Nage helihwile uhiya na ugimona keene gya Abetcha guseelele, gubatendelele bawatane na Mlume wa malanga ma mtima. ²⁴ Bululi gubele mtu msoga mgiluchu na Mtima wa Guhaha na uwasha; batu beengi balibiwe u lubi lwa Mlume. ²⁵ Hanyuma kugile Talso ummenga Saulo. ²⁶ Na helihuile ummona gumletile Antiokia. Bashamine alibu muaa guhima babele husumbila hamweci nalubunga ugikia batu bengi. na bakikiwa bakititue bakelesitu lwendo lutangi haya Antiokia. ²⁷ Moka mamo masuku bambua basalile uhuma Yelusalemu ugia Antiokia nahatusambile gumwe gwabo kugimene, china lyake Agabo,gumoninye wa washa wa mtima guhaha ugana ndala kyata kiichua alibu sii kyose gigima, nagio gichuile mengo ma masugu ma Kaudio. ²⁹ Na bagikiwa , kila gegese nahi bieli ginyunywe, balihuliche uhila mbwatilicho u babuswa nabo babele hushama ubayahudi. ³⁰ Bakilile bibyo, babahilile baulu mmaboo ma balanaba na Sauli.